2026 වසරේදී මේ රටේ ආබාධිත පුද්ගලයන් වෙනුවෙන් ජාත්යන්තර මට්ටමේ පිළිගත් ‘පතුල පහළ බස්’ (Low Flow bus) රථ 10 ක් ගෙන්වා ජාතික ප්රවාහන සේවයට එක් කරන බව පාර්ලිමේන්තු මන්ත්රි සුගත් වසන්ත ද සිල්වා මහතා පසුගියදා (03)පැවසීය. ආබාධ සහිත තැනැත්තන් පිළිබඳ අයිතිවාසිකම් පනත මේ වසරේදී සම්මත කිරීමටත්, ප්රවේශ පහසුකම් පිළිබඳ යාවත්කාලීන කරන ලද රෙගුලාසි ගැසට් කිරීම සිදු කරන බවත් ඒ මහතා හොරණදී පෙරේදා (03) පැවසීය. එහිදී ඒ මහතා මෙසේද කීවේය.
“ආබාධ සහිතවූවන් පිළිබඳ ප්රතිපත්තිය මේ වසරේ සකසා අවසන් කරන බවත් මේ සියල්ල හරහා අයිතිවාසිකම්වලින් හෙබි බලගැන්වුණු ආබාධ සහිත පුරවැසියකු බිහිකිරීමට බලාපොරොත්තු වෙනවා. ආර්ථික, දේශපාලනික වශයෙන් පමණක් නොව සංස්කෘතික වශයෙනුත් අන්තර්කරණිය වූ සමාජයේ ආබාධ සහිත පුද්ගලයන්ටත් අභිමානවත් වූ ජීවිතයක් ලබාදීම වෙනුවෙන් අපි කටයුතු කරනවා.
ජාතික ජන බලවේග රජය බලයට පත් වී වසරක් ගෙවන මේ මොහොතේ මේ රටේ ආබාධ සහිත වූ පුද්ගලයන්ට විශාල වැඩ කොටසක් කිරීමට හැකිවී තිබෙනවා. ආබාධ සහිත පුද්ගලයන් සඳහා වූ ගෙවීම් විශාල ලෙස ඉහළ දමා තිබෙනවා. අනෙක වැදගත්ම කාරණය කිසිදු සීමාවකින් තොරව සෑම ප්රාදේශිය ලේකම් කොට්ඨාසයකටම මේ සඳහා මුදල් ප්රතිපාදන වෙන්කර තිබෙනවා. ආබාධ සහිත පුද්ගලයකුට පොරොත්තු ලේඛනයේ නොසිට අදාළ දීමනාවලට ලියාපදිංචි වී ඒ දීමනා ගත හැකිය. මේ ආදි වශයෙන් ඔවුන්ගේ දෛනික ජිවිත පවත්වාගෙන යෑමට අත දෙන අතරම ඔවුන් මේ රටේ සම අයිතිවාසිකම් ඇති රටේ සමාජ ආර්ථික ක්රියාවලියට බද්ධ වූ මිනිසුන් බවට පත් කිරීමේ කටයුතු ආරම්භ කර තිබෙනවා.”
“විපක්ෂයට යන එන මං නැති නිසා සිල්ලර කතන්දර අල්ලගෙන මාධ්යට ඇවිත් ජනතාව චූන් කරමින් ඉන්නවා. නමුත් මේ රටේ අතිබහුතර ජනතාව විපක්ෂයේ මේ සිඟිති ආතල්වලට රැවටෙන්නේ නැහැ. එයාල කළ කී දේවල් ජනතාවට අමතක නැතැයිද සුගත් වසන්ත මන්ත්රීවරයා කීවේය.”