අර්බුද අවස්ථාවේ දී රට හැර ගිය ගෝඨාභය රාජපක්ෂ ජනාධිපති ලෙස පත්කිරිම සම්බන්ධව තමන් ලජ්ජා වන බවත් අර්බුදය අවස්ථාවේ එම අර්බුදය භාරගෙන රට යථා තත්ත්වයට පත් කළ රනිල් වික්‍රමසිංහ ජනාධිපතිවරයාට රට ගොඩගැනීමට පුලුවන් බවත් තමිල් මක්කල් විඩුදලෛ පුළිකල් පක්ෂයේ නායක රාජ්‍ය අමාත්‍ය සිවනේසතුරෙයි චන්ද්‍රකාන්තන් හෙවත් පිල්ලෙයාන් පැවසුවේය.
ඔහු මේ බව පවසන්නේ අද (24) කල්අඩි හි පැවති පුලුවන් ශ්‍රී ලංකා ජන රැළිය අමතමිනි.
එහිදී පිල්ලෙයාන් මෙසේ ද පැවසීය.
මීට වසර දෙකකට පෙර පැවති ආර්ථික අර්බුදයත්, අරගලයත් නිසා රට අරාජික වුණා. ගෝඨාභය රාජපක්ෂ මහතාව ජනාධිපති ලෙස පත් කිරීමට දායක වීම සම්බන්ධයෙන් එදා මම මා ගැනම ලැජ්ජාවට පත් වුණා.
මීට වසර දෙකකට පෙර පැවති ඒ ඉතාම දුෂ්කර තත්ත්වයෙන් රට බේරා ගැනීමට ඉදිරිපත් වුණේ ජනාධිපති රනිල් වික්‍රමසිංහ මහතායි. එතුමාව ජනාධිපති ලෙස පත් කර ගැනීම සඳහා අපේ සහායද ලබා දුන්නා.
නැගෙනහිර සංවර්ධනය සඳහා කෘෂිකාර්මික, ධීවර හා කර්මාන්ත යන ක්ෂේත්‍රයන්හි ව්‍යාපෘති රැසක් ජනාධිපති රනිල් වික්‍රමසිංහ මහතා විසින් යෝජනා කර තිබෙනවා. ඒ සඳහා අප අවස්ථාව ලබා ගත යුතුයි.
ඒ වෙනුවෙන් ජනාධිපති රනිල් වික්‍රමසිංහ මහතා ගේ ජයග්‍රහණය වෙනුවෙන් නැගෙනහිර පළාතේ ගෙයින් ගෙට ගොස් ජනතාව පෙළ ගැස්වීමට අප කටයුතු කරනවා. එමඟින් ජනාධිපතිවරයාගේ ජයග්‍රහණය වගේම මේ දිස්ත්‍රික්කයේ ජනතාව ලෙස අපටද ජයග්‍රහණය කළ හැකි වෙනවා.