ඇමතිකම් අදාල නෑ, වැඩේ ගොඩ දානවා යැයි ජාතික ජන බලවේගයෙන් කුරුණෑගල දිස්ත්‍රික්කයේ වැඩිම මනාප ලැබූ පාර්ලිමේන්තු මන්ත්‍රී නාමල් කරුණාරත්න මහතා පැවසීය.
ඇමතිකම් බලාගෙන වැඩ කළේ නැතැයිද එවැනි දේ ඔළුවේ කොහේවත් තිබුණේ නැතැයිද නාමල් කරුණාරත්න මහතා වැඩිදුරටත් සඳහන් කළේය.
පාර්ලිමේන්තු කටයුතු පිළිබඳව නවක මන්ත්‍රීවරුන් දැනුවත් කිරීමේ වැඩසටහනකට සහභාගී වීම සඳහා නාමල් කරුණාරත්න මහතා පාර්ලිමේන්තු සංකීර්ණයට පැමිණි අවස්ථාවේදී මාධ්‍යවේදියකු ඇසූ ප්‍රශ්නයකට පිළිතුරු දෙමින් ඔහු මේ බව පැවසීය.
විශාල ඡන්ද ප්‍රමාණයක් ලබා ගත් ඔබට අමාත්‍ය ධුරයක් නොලැබුණේ ඇයි දැයි එහිදී මාධ්‍යවේදියකු නාමල් කරුණාරත්න මහතාගෙන් විමසීය.
ඡන්දය දුන් සියලු ජනතාවට ගරු කරන අතර ස්තුතියද ප්‍රකාශ කරන බව කී මන්ත්‍රීවරයා එම ජනතාව තැබූ විශ්වාසය අබමල් රොනකින් වත් කඩන්නේ බිඳින්නේ නැති බව සඳහන් කළේය.