මෙරට වෙළෙඳ, ඩිජිටල් ආර්ථික, ආයෝජන සහ වෘත්තීය පුහුණු ඇතුළු ක්ෂේත්ර රැසකට සෙත සැලසෙන ව්යාපෘති රැසක් රැගෙන
ජර්මානු ෆෙඩරල් ජනරජයේ නිල සංචාරය සාර්ථකව නිම කරමින් ජනාධිපති අනුර කුමාර දිසානායක මහතා ඊයේ (15) පෙරවරුවේ දිවයිනට පැමිණියේය.
මෙම නිල සංචාරයේදී ජනාධිපතිවරයා ජර්මානු ජනාධිපති ෆ්රෑන්ක්-වෝල්ටර් ස්ටයින්මියර් (Frank-Walter Steinmeier), ජර්මානු විදේශ ඇමැති ජොහාන් වඩෆුල් (Dr. Johann Wadephul) සහ ජර්මානු ආර්ථික සහයෝගීතා සහ සංවර්ධන ඇමැති රීම් අලබලි-රඩොවන් (Reem Alabali-Radovan) මහත්ම මහත්මීන් හමු වී ද්වීපාර්ශ්වික සාකච්ඡාවල නිරත විය.
එහිදී රජයේ ප්රමුඛතා මත පදනම්ව වෙළෙඳ, ඩිජිටල් ආර්ථික, ආයෝජන සහ වෘත්තීය පුහුණු ආදී ක්ෂේත්රයන්හි දෙරටේ සහයෝගීතාව පුළුල් කෙරෙන නව මාර්ග පිළිබඳ සොයා බැලීම කෙරෙහි විශේෂ අවධානයක් යොමු කෙරිණි.
මීට අමතරව, ජනාධිපතිවරයා ජර්මනියේ සංචාරක හා චාරිකා කර්මාන්ත සංගම්වල (Tourism and Travel Industry Associations) නියෝජිතයන්ගේ හමුවකටද සහභාගී විය. ජර්මනියේ වාණිජ හා කර්මාන්ත මණ්ඩලය විසින් එම සංගම් මූලස්ථානයේදී (DIHK) සංවිධානය කරනු ලැබූ ව්යාපාරික සංසදයට සහභාගී වූ ජනාධිපති අනුර කුමාර දිසානායක මහතා එහි ප්රධාන දේශනයද සිදු කළේය. එමෙන්ම ජනාධිපතිවරයා සිය නිල සංචාරය අතරතුර ජර්මනියේ වාසය කරන ශ්රී ලාංකික ප්රජාව හමුවීමටද කටයුතු කළේය.
මෙම සංචාරයට ජනාධිපතිවරයා සමඟ විදේශ කටයුතු, විදේශ රැකියා සහ සංචාරක ඇමැති විජිත හේරත් මහතා සහ රජයේ ජ්යෙෂ්ඨ නිලධාරීහු පිරිසක් සහභාගී වූහ.