කොළඹ බැස්ටියන් මාවතේ මධ්යම බස් නැවතුම්පොළ මාස 10කින් සංවර්ධනය කර, ලබන අලුත් අවුරුද්දට පෙර ජනතා අයිතියට පත් කිරීමට ප්රවාහන මහාමාර්ග වරාය හා සිවිල් ගුවන්සේවා අමාත්යාංශය තීරණය කර තිබේ.
ශ්රී ලංකා ගුවන් හමුදාවේ ඉංජිනේරු සහාය ගෙන සංවර්ධනය කරන මේ ව්යාපෘතියට වැය වන මුදල රුපියල් මිලියන 355ක් ලෙස ඇස්තමේන්තු කර ඇත. අදියර තුනක් යටතේ සිදු කරන මේ ව්යාපෘතිය ආරම්භ කර දින 300ක් ඇතුළත අවසන් කිරීමට නියමිත අතර, නවීන පහසුකම් යටතේ සංවර්ධිත නව බස් නැවතුම්පොළ 2026 අලුත් අවුරුද්දේ ජනතා අයිතියට පත් කිරීමට සැලසුම් කර තිබේ.
මෙහි ඉදිකිරීම් අවසන් වන විට නවීන ආපනශාලා, දුම්රිය, ලංගම ඇතුළු බස් තොරතුරු ගතහැකි වන ලෙස නවීන තොරතුරු මධ්යස්ථානයක්, මෙහෙයුම් මැදිරියක් ස්ථාපිත කිරීමට පියවර ගෙන ඇත. ලංගම බස් රථ රියැදුරන්ගේ විවේක කාමර, වැසිකිළි පහසුකම් ඇතුළු අංශ නවීකරණය කිරීමට ද අවධානය යොමුව ඇත.
මෙහි ප්රසම්පාදන කටයුතු ලංගම විසින් සිදු කරන අතර, ඉදිකිරීම් කටයුතු ශ්රී ලංකා ගුවන් හමුදාවේ නිලධාරීන්ගේ ඍජු අධීක්ෂණය යටතේ සිදු කෙරේ. තාක්ෂණ නිලධාරීන්ගේ සේවා ලබා ගැනීමට ද නියමිතය.
මේ ඉදිකිරීම් සම්බන්ධයෙන් සාකච්ඡා වට කිහිපයක් පවත්වා ඇති අතර, ඊට අදාළ ශක්යතා අධ්යයනයක් ද සිදු කර තිබේ. එම ඉදිකිරීම්වලට අදාළව නව අදහස් සහ යෝජනා ඉදිරිපත් කරන ලෙස ප්රවාහන මහාමාර්ග වරාය හා සිවිල් ගුවන්සේවා ඇමැති බිමල් රත්නායක මහතා ලංගම සේවකයන්ගෙන් ඉල්ලා සිටියේය.
මේ අවස්ථාවට එක් වූ ඇමැතිවරයා ලංගම රියැදුරන් රැඳී සිටින විවේක කාමර ඇතුළු කාර්යාල ස්ථාන නිරීක්ෂණය කිරීමට ද එක් විය. එහිදී සේවකයන් කියා සිටියේ දශක ගණනාවකට පසු එම ස්ථානයට පැමිණි පළමු ඇමැතිවරයා බිමල් රත්නායක මහතා බවත්, ඒ වෙනුවෙන් ඔවුන්ගේ ස්තූතිය පුද කරන බවත්ය. මේ අවස්ථාවට එක්වූ ශ්රී ලංකා ගුවන් හමුදාවේ ඉදිකිරීම් සිවිල් ඉංජිනේරු අධ්යක්ෂ ජනරාල් එයාර් වයිස් මාෂල් වජිර සේනාධීර මහතා ද ව්යාපෘතිය ගැන අදහස් දැක්වීය.
එම අවස්ථාවට ආරක්ෂක අමාත්යාංශයේ ලේකම් සම්පත් තුයියකොන්තා, ශ්රී ලංකා ගුවන් හමුදාපති එයාර් මාෂල් බන්දු එදිරිසිංහ, මාණ්ඩලික නිලධාරි එයාර් වයිස් මාෂල් ලසිත සුමනවීර, ආරක්ෂක අමාත්යාංශයේ මාධ්ය ප්රකාශක කර්නල් නලින් හේරත්, බස්නාහිර පළාත් විශේෂ කාර්ය බළකායේ කැඳවුම්කරු, ආචාර්ය සංජය පෙරේරා මහත්වරුන්, ආයතන ප්රධානීන් ඇතුළු ලංගම සේවකයෝ එක්ව සිටියහ.