බලය, ධනය ඉස්සරහ නීතිය නැමෙන්නැති බව ජනතාවට පළමු වැනි වතාවට පේන්න අරගෙන තිබෙන බව සෞඛ්ය හා ජනමාධ්ය ඇමැති වෛද්ය නලින්ද ජයතිස්ස මහතා පැවසීය. රනිල් වික්රමසිංහ මහතා අත්අඩංගුවට ගෙන බන්ධනාගාර ගත කිරීම සම්බන්ධයෙන් මාධ්යවේදීන් ඇසූ ප්රශ්නවලට පෙරේදා (24) පිළිතුරු දෙමින් ඇමැතිවරයා මේ බව ප්රකාශ කළේය.
ඒ අනුව අධිකරණය සහ පරීක්ෂණ ගැන ජනතාවට විස්වාසයක් එමින් පවතින බව ද හෙතෙම කීවේය. මේගොල්ලෝ ඔක්කොම එක වල්ලේ පොල් වගේ සහ එක අත්තේ වහල ඉන්න කරුල්ලෝ ටික වගේ යන්න මනාව තේරුම්ගත හැකි බව ද ඒ මහතා කියා සිටියේය.
ඇමැතිවරයා වැඩිදුරටත් මෙසේ ද පැවසීය.
“පසුගිය කාලයක් පුරා අපරාධ පරීක්ෂණ දෙපාර්තමේන්තුව කරන ලද පරීක්ෂණවල ප්රතිඵලයක් විදියට අධිකරණයට කරුණු වාර්තා කරලා අධිකරණයෙන් තමයි රනිල් වික්රමසිංහ හිටපු ජනාධිපතිවරයා රක්ෂිත බන්ධනාගාරගත කරන්න කියලා තීරණයක් ලබාදී තිබෙන්නේ. කවුරු හරි අභියෝග කරනවා නම්, ඇප ලබා නොදීම, බන්ධනාගාරගත කිරීම වැරැදි කියලා ඒ අයට පුළුවන් අධිකරණයේ කරුණු ඉදිරිපත් කරන්න.
නිමල් සිරිපාල ද සිල්වට හරි, නාමල් රාජපක්ෂට හරි, දයාසිරි ජයසේකරට හරි නීති, කබාය දාගෙන ඇවිත් ඔය එළියේ මාධ්ය වෙත දෙන වොයිස් කට් උසාවියේදි කිව්ව නම් හරි. කරුණු තිබෙනව නම් රනිල් වික්රමසිංහ හිටපු ජනාධිපතිවරයාට ඇප ලබා නොදීම වැරැදි කියන කරුණු උසාවියට ඉදිරිපත් කරන්න පුළුවන්. මාධ්යයට කියලා වැඩක් නැහැ. ඒ වගේම සුපුරුදු පරිදි බන්ධනාගාරගත කළාට පස්සේ බන්ධනාගාර රෝහලට ගියා.
රෝහලේදි යම් යම් පැමිණිලි කළ නිසා ජාතික රෝහලට ඇතුළත් කරලා තිබෙනවා. වෛද්යවරු ඒ ගැන පරීක්ෂණ කරගෙන යනවා. විශේෂඥ වෛද්යවරු ඊට මැදිහත් වෙලා ඉන්නවා. තව මාස කිහිපයකින් ජනාධිපති වෙනවා කියන පුද්ගලයට තමයි මේ අසනීප ගොඩක් තිබෙන්නේ. රජයේ වගකීම තමයි ඒ අසනීප දිහා බලලා එතුමට හොඳ ප්රතිකාර කරලා එතුමගේ සෞඛ්ය තත්ත්වය ඉහළ නංවල දෙන එක. රජය විදියට අපි ඒ වැඩේ කරනවා.
එයා ජනාධිපති හරි, දේශපාලන නායකයා හරි කරන්න ගිය අය තේරුම් ගන්න ඕන මොන වගේ කෙනෙක් ද මේ නායකයා කරන්න හැදුවේ කියලා. ඒ අයට ඒ බය දැනෙන එක සාධාරණයි. ඒගොල්ලෝ තමයි දන්නේ ඒ අය කරපු මූල්ය වංචා, දූෂණ, හොරකම්, අපරාධ, කප්පම් ගැනීම්, පැහැර ගැනීම් ආදී සියලු දේවල්වලට තමන් කොතරම් සම්බන්ධ ද කියලා. පරීක්ෂකයන් දන්නේ ඒකෙන් ස්වල්පයයි.
පරීක්ෂා කරගෙන යනකොට තමයි අපරාධ පරීක්ෂණ දෙපාර්තමේන්තුවට හරි අල්ලස් කොමිසමට හරි තේරෙන්නේ ඒවයි දිග පළල, බරපතළකම. ඒ නිසා බය වෙනවා. ඒක කරන්න දෙයක් නැහැ. නීතිය ක්රියාත්මක වෙනවා. රටේ ජනතාවට පළමු වැනි වතාවට පේන්න අරගෙන තියෙනවා බලය, ධනය ඉස්සරහ නීතිය නැමෙන්නේ නැහැ කියලා. ඒ අනුව අධිකරණය ගැන විශ්වාසයක් එමින් පවතිනවා ජනතාවට.
පරීක්ෂණ ගැන විශ්වාසයක් ජනතාවට එමින් පවතිනවා. ඒ අනුව රට ඉස්සරහට යමින් තිබෙනවා. මේ ආකාරයට නීතිය සාධාරණව හා සමානව රටේ ක්රියාත්මක වෙනව කියන එක රට සම්බන්ධයෙන් හොඳ ප්රතිරූපයක් ජාත්යන්තරයට ගෙන යන්නත් වැදගත් වේවි.
ලක්ෂ 166ක මූල්ය වංචාවක් කරපු සාමාන්ය පුරවැසියෙක් හිටියා නම් ඔහුට නීතිය ක්රියාත්මක වෙන්නේ නැද්ද. ප්රාදේශීය සභා මන්ත්රීවරයකුට මේක වුණා නම් නීතිය ක්රියාත්මක වෙන්නේ නැද්ද. මේගොල්ලෝ ඔක්කොම එක වල්ලේ පොල් වගේ එක අත්තේ වහල ඉන්න කරුල්ලෝ ටික.
හරි ලේසියි තේරුම් ගන්න මේගොල්ලෝ කවුද කියන එක. වැඩිදුර විස්තර ඕන නම් රනිල් වික්රමසිංහ හිටපු ජනාධිපතිවරයා ගැන ඒගොල්ලෝම දාපු වොයිස් කට් ටික ආයේ දාල බැලුවා නම් ඒ අය පෙනී සිටින්නේ කොයි වගේ අයෙක් ගැන ද කියලා. ජනාධිපති කාර්යාලයෙ මුදල් උපයෝගි කරගෙන පෞද්ගලික කටයුතුවලට අපි කවුරුවත් යෙදවිලා නැහැ. ඇයි රනිල් වික්රමසිංහ මහතාගේ පාර්ශ්වය විටින් විට මේ සංචාරය පිළිබඳ ලියකියවිලි වෙනස් කළේ.
මම දැක්කා නීතිපති දෙපාර්තමේන්තුව කරුණු ඉදිරිපත් කරනවා. අධිකරණයට ඒවා දිහා බැලුවට පස්සේ ජනතාවට තේරෙනවා ඒගොල්ලෝම මේක වරදක් කියලා දැනගෙන විටින් විට, විටින් විට එම ලියකියවිලි වෙනස් කළා කියන එක. කොහොම වුණත් මේක අධිකරණය ඉස්සරහා තිබෙන කටයුත්තක්. ඔය එක එක තර්ක ඉදිරිපත් කරන අයට නීතිඥ ලෝගුව දාගෙන ගිහිල්ලා උසාවියෙදි කරුණු ඉදිරිපත් කරන්න පුළුවන්. ඒව හරි නම්, අධිකරණයේදි ඒවා පිළිගන්නේ නැත්නම්, ප්රතික්ෂේප කරයි. අපි අධිකරණයට භාර දීල තියෙන්නේ. “