ඉදිරි වසර පහේදී ශ්රී ලංකාවේ ඩිජිටල් ආර්ථිකය ඩොලර් බිලියන 05ක ඉලක්කයක් කරා යොමු කිරීමට ජනාධිපති ලේකම් කාර්යාලය සැලසුම් කොට ඇතැයි ඩිජිටල් ආර්ථික කටයුතු පිළිබඳ ජනාධිපති උපදේශක ආචාර්ය හාන්ස් විජේසූරිය මහතා මහනුවරදී පැවසීය.
ඊට සමගාමීව ඩිජිටල් ශ්රම බළකාය ලක්ෂ 02ක් දක්වා පුළුල් කිරීමටත් සාමාන්ය ගනුදෙනු පිරිවැය 01%කට වඩා අඩු අගයක් කරා ගෙන ඒමටත් අපේක්ෂා කරන බවත් ඒ මහතා කීවේය.
ආචාර්ය හාන්ස් විජේසූරිය එසේ කියා සිටියේ, කෘත්රිම බුද්ධිය සහ ඩිජිටල් ආර්ථික මාර්ග වැඩසටහන සම්බන්ධයෙන් මධ්යම පළාතේ රාජ්ය නිලධාරීන් දැනුම්වත් කිරීම සඳහා ජනාධිපති ලේකම් කාර්යාලයේ මෙහෙයවීමෙන් මහනුවර දිස්ත්රික් ලේකම් කාර්යාලයේදී මෙම (26) පැවැති දැනුම්වත් කිරීමේ වැඩසටහනේදීය.
ඩිජිටල් ආර්ථික කටයුතු සම්බන්ධයෙන් දැනට ශ්රී ලංකාවේ නියෝජනය 3%ක් යැයි කී ඒ මහතා ඉදිරි වර්ෂ 05ක කාලෙය්දී එය 15%ක වර්ධනයක් දක්වා ගෙන එන බවත් ඒ යටතේ රජයේ ආයතන 75ක් පමණ ඩිජිටල්කරණයට ලක්වන බව ද පැවසුවේය.
රජයේ ඩිජිටල්කරණ සැලසුම් පැහැදිලි කිරීම සහ කෘත්රිම බුද්ධිය පිළිබඳව නිලධාරීන්ගේ දැනුම වර්ධනය කිරීමේ අරමුණින් ජනාධිපති ලේකම් කාර්යාලයේ සම්බන්ධීකරණයෙන් සංවිධානය කළ මෙම වැඩසටහන මධ්යම පළාත් සභාව, මහනුවර දිස්ත්රික් ලේකම් කාර්යාලය, ප්රාදේශීය ලේකම් කාර්යාල සහ රජයේ අනිකුත් ආයතනවල සියලුම විධායක නිලධාරීන්ගේ සහභාගිත්වයෙන් ක්රියාත්මක විය.
ඩිජිටල් ආර්ථික අමාත්යාංශය සහ තොරතුරු හා සන්නිවේදන තාක්ෂණ නියෝජිතායතනයේ හවුල්කාරිත්වයෙන් මෙම වැඩසටහන සංවිධාන විය. ජනාධිපති අතිරේක ලේකම් රොෂාන් ගමගේ, තොරතුරු තාක්ෂණ නියෝජිතායතනයේ අධ්යක්ෂ මණ්ඩල සාමාජිකයන් වන හර්ෂ පුරසිංහ, සමීෂ අබේසිංහ, මධ්යම පළාත් ප්රධාන ලේකම් අජිත් ප්රේමසිංහ, මහනුවර අතිරේක දිස්ත්රික් ලේකම් ලලිත් ඇටම්පාවල යන මහත්වරු ඇතුළු නිලධාරීහු රැසක් මෙම අවස්ථාවට සහභාගි වූහ.