ශ්රී ලංකා – ස්වීඩන සහයෝගීතාව තවදුරටත් ශක්තිමත් කරමින් තවත් ආයෝජන ශ්රී ලංකාවට ගෙනඒමට සූදානම් බව ස්වීඩනය ප්රකාශ කරයි. ශ්රී ලංකා රජයේ ස්ථිරසාර හා අධිෂ්ඨානශීලී පියවර ස්වීඩනය විමසිල්ලෙන් බලා සිටින බව ද තව තවත් ආයෝජන ශ්රී ලංකාවට රැගෙන ඒම වෙනුවෙන් අදාළ ආයතන සමඟ කටයුතු කිරීමට බලාපොරොත්තු වන බව ද ශ්රී ලංකාවේ ස්වීඩන තානාපති ජෑන් තෙස්ලෙෆ් මහතා පවසයි.
නවදිල්ලියේ නේවාසිකව සිටින ශ්රී ලංකාවේ ස්වීඩන තානාපති ජෑන් තෙස්ලෙෆ් මහතා විදේශ කටයුතු අමාත්යාංශයේදී විදේශ කටයුතු, විදේශ රැකියා සහ සංචාරක ඇමැති විජිත හේරත් මහතා මුණගැසුණු අවස්ථාවේ මේ බව සඳහන් කළේය.
තානාපතිවරයා සමඟ ස්වීඩන වෙළෙඳ හා ආයෝජන කවුන්සිලයේ නියෝජිත පිරිසක් ද ව්යාපාරිකයන් කිහිප දෙනෙකු ද එක්ව සිටි අතර ශ්රී ලංකා රජය ගත වූ වසරක කාලයේ ලබා ඇති ප්රගතිය තානාපතිවරයාට විස්තර කර දුන් ඇමැතිවරයා, ආර්ථිකයේ සෑම අංශයක්ම දියුණු වෙමින් පවතින බවත්, අනාගතය පිළිබඳ සුබවාදී බලාපොරොත්තුවෙන් රජය කටයුතු කරන බවත් පැහැදිලි කළේය. ස්වීඩනය ශ්රී ලංකාවේ දියුණුවට ඉතිහාසය පුරා කර ඇති සේවය හා ව්යාපාරික අංශයේ කර තිබෙන ආයෝජන පිළිබඳව ද අගය කළේය.
සංචාරක ව්යාපාරය දියුණු කිරීමටත්, අලුත් ආයෝජන අවස්ථා ස්වීඩන ව්යාපාරිකයන් මඟින් ඇති කිරීමටත් ස්වීඩන රජයේ සහාය ඉල්ලා සිටි විදේශ ඇමැතිවරයා, ශ්රී ලංකාවේ ඇඟලුම් කර්මාන්තයේ සහ ඛනිජ හා කැණීම් කටයුතුවල ආයෝජන අවස්ථා රැසක් පවතින බැවින් එම අවස්ථා කෙරෙහි ආයෝජකයන් උනන්දු කරන ලෙස ද ඉල්ලා සිටියේය.
ශ්රී ලංකා රජයේ ස්ථිරසාර හා අධිෂ්ඨානශීලී පියවරයන් ස්වීඩනය විමසිල්ලෙන් බලා සිටින බවද තව තවත් ආයෝජන ශ්රී ලංකාවට රැගෙන ඒමට, අදාළ ආයතන සමඟ කටයුතු කිරීමට බලාපොරොත්තු වන බවද මෙම හමුවේ දී තානාපතිවරයා දැනුම් දුන්නේ ය. ශ්රී ලංකාවේ කුරුඳු ස්වීඩනය තුළ කෙතරම් බහුලව පරිභෝජනය කරන්නේ ද යත් සෑම ගෘහයකම ශ්රී ලංකාවේ කුරුඳු යොදාගනිමින් ආහාරපාන වර්ග සකස් කරන බැවින් ශ්රී ලංකාවේ කුරුඳු ස්වීඩනයට ආනයනය කිරීම තව තවත් ඉහළ යා හැකි බවද ඒ මහතා සදහන් කළේය.
දැනට වාර්ෂිකව 14000ක් පමණ ස්වීඩන සංචාරකයන් ශ්රී ලංකාවට පැමිණෙන අතර දිවයින තුළ පවතින ස්වභාව සෞන්දර්යය, ජෛව විවිධත්වය හා ආකර්ෂණීය වෙරළ තීරය ස්වීඩන ජනතාව තව තවත් ඇදගනු ඇතැයි ද ප්රකාශ කළ තානාපතිවරයා, දැනට ස්වීඩනයේ සිට ශ්රී ලංකාවට පැමිණීම සඳහා ඍජු ගුවන් ගමන් නොමැති වීම අඩුපාඩුවක් බවත් ඒ පිළිබඳව සොයා බලන ලෙසත් ඉල්ලා සිටියේය.
ස්වීඩනයේ නිෂ්පාදනය කරන විදුලි බලයෙන් ක්රියා කරන මගීන් ගෙනයන බෝට්ටු සංචාරක ව්යාපාරය සඳහා නොයෙක් රටවල භාවිත කරන අතර එම බෝට්ටු භාවිතය පිළිබඳව හා සංචාරක ප්රවාහනයට යොදාගන්නා ආකාරය පිළිබඳව වීඩියෝවක් ද ඇමැතිවරයා වෙත ඉදිරිපත් කළේය. මෙම බෝට්ටු නිෂ්පාදන සමාගම ශ්රී ලාංකික සමාගමක් සමඟ එක්ව ව්යාපාර ආරම්භ කිරීම සඳහා ආයෝජන කිරීමට සාකච්ඡා පවත්වමින් යන බවද තානාපතිවරයා වැඩිදුරටත් පෙන්වා දුන්නේය.
ශ්රී ලංකාවේ ශිෂ්ය ශිෂ්යාවන් උසස් අධ්යාපනය ලබා ගැනීම සඳහා ස්වීඩන විශ්වවිද්යාලවලට බහුලව යොමුවන බවත් එය ඉදිරියේ දී විශාල වශයෙන් වර්ධනය කිරීමට ස්වීඩන රජය කටයුතු කිරීමට බලාපොරොත්තු වන බව ද තානාපතිවරයා දැනුම් දුන්නේය.