මිහින්තලේ සිප්පුකුලම ප්රදේශයේ මේ දිනවල සැරිසැරු වනඅලියෙක් පන්දම්වලින් කිසියම් පිරිසක් විසින් පුලුස්සා තුවාල කිරීමෙන් පසු ගෙවත්තක තුවාල සහිතව අසාධ්ය තත්ත්වයෙන් වැටී සිට ප්රතිකාර ලබමින් සිටියදී ඊයේ (16දා) අවාසනාවන්ත ලෙස ජීවිතක්ෂයට පත්වූ බව වනජීවී දෙපාර්තමේන්තුව පවසයි.
මේ සම්බන්ධයෙන් වනජීවී නිලධාරීන් සහ පොලීසිය විමර්ශනයක් ආරම්භ කර ඇත.
වනඅලියාව පුලුස්සන වීඩියෝවක්ද විමර්ශන අංශ වෙත ලැබී තිබේ. එය කිසියම් අයෙක් විසින් ජංගම දුරකතනයකින් මහ රෑ වීඩියෝගත කළ එකකි.
මෙම වනඅලියාගේ ඉදිරි පාදයේ යම් තුවාලයක් නිසා ගමන ද ඉතාමත් මන්දගාමී බව ප්රදේශවාසීන් පවසයි.
එම වනඅලියා ඉකුත් (15) දින රාත්රියේ මිහින්තලේ සීප්පුකුලම ප්රදේශයේ අඹගහවෙල හන්දියේදී පුලුස්සා ඇති බව සඳහන්ය. පිලිස්සුම් තුවාල ලැබූ එම වනඅලියා ඊයේ (16) උදෑසන මිහින්තලේ සීප්පුකුලම අඹගහවෙල ප්රදේශයේ ගෙවත්තක ඉතා අසාධ්ය තත්ත්වයෙන් වැටී සිටින අයුරු දක්නට ලැබුණි. අනුරාධපුර අඩවි වන නිලධාරී කාර්යාලයේ නිලධාරීන් පැමිණ වනඅලියාට අවශ්ය ප්රතිකාර කටයුතු සිදුකරනු ලැබීය. ඊයේ (16 දා) වනජීවී අංශ නිලධාරීන් පශු වෛද්ය කණ්ඩායම් එක්ව වන අලියාගේ ජීවිතය බේරා ගැනීම සඳහා දැඩි පරිශ්රමයක් දරමින් සිටි අතර, ප්රතිකාර ලබමින් සිටියදී එම අලියා මෙලෙස ජීවිතක්ෂයට පත්විය.
අසාධ්ය තත්ත්වය තත්ත්වයේ ගිලන්ව සිටි මෙම වන අලියාගේ මරණයට නිශ්චිත හේතුව දැන ගැනීම සඳහා පශ්චාත් මරණ පරීක්ෂණය සිදු කිරීමට නියමිතව තිබූ බවද වනජීවී දෙපාර්තමේන්තුවේ ප්රකාශකයෙකු මෙහිදී සඳහන් කළේය.
මෙම වන අලියාගේ ඇසක් අන්ධව සහ ශ්රවණාබාධයෙන් ප්රදේශයේ වගාවන් විනාශ කරමින් සැරි සැරූ බව එහිදී ප්රදේශවාසීහු පිරිසක් පැවසූහ.