අයහපත් කාලගුණයෙන් හානියට පත් මාර්ග 316න් 302ක්ම මේ වනවිට ප්රතිසංස්කරණය කර අවසන් බව මාර්ග සංවර්ධන අධිකාරියේ අධ්යක්ෂ ජනරාල් කේ.ඩබ්ලිව්. කණ්ඩම්බි මහතා පවසයි.
පසුගියදා ඇතිවූ අයහපත් කාලගුණ තත්ත්වයෙන් දිවයිනේ ප්රදේශ රැසක ගංවතුර සහ පස් කඳු නාය යාම හේතුවෙන් හානියට පත් මාර්ග 302ක් මේ වනවිට ගමනාගමනය සඳහා විවෘත කර ඇති බව කී ඒ මහතා ඉතිරි මාර්ග 14 මේ වනවිට කඩිනමින් ප්රතිසංස්කරණය කරමින් පවතින බවත් කියා සිටියේය.
හෙතෙම මේ අදහස් ප්රකාශ කළේ ආපදාවෙන් යළි නැඟිටින ශ්රී ලංකාවට, ප්රවාහන, මහාමාර්ග සහ නාගරික සංවර්ධන අමාත්යාංශය යටතේ සිදුකරනු ලබන යාවත්කාලීන තොරතුරු සම්බන්ධයෙන් දැනුම්වත් කිරීමේ විශේෂ මාධ්ය හමුවට එක්වෙමිනි. මෙම මාධ්ය සාකච්ඡාව ඊයේ (28) දින රජයේ ප්රවෘත්ති දෙපාර්තමේන්තු ශ්රවණාගාරයේදී පැවැත්විණි.
එහිදී වැඩිදුරටත් අදහස් දැක්වූ අධ්යක්ෂ ජනරාල්වරයා
‘දැනට ප්රතිසංස්කරණය කරමින් පවතින මාර්ග 14ට දැඩි හානි සිදුව තිබෙනවා. ඉන් මාර්ග 09ක් මධ්යම පළාත තුළත් මාර්ග 02ක් ඌව පළාත තුළත් උතුරු පළාතේ මාර්ග 02ක් සහ වයඹ පළාතේ එක් මාර්ගයක් ලෙසත් පවතිනවා. මධ්යම පළාතේ ‘පේරාදෙණිය – රිකිල්ලගස්කඩ මාර්ගය’, ‘ගලහ – දෙල්පිටිය මාර්ගය’, ‘නාවලපිටිය – දොලොස්බාගේ මාර්ගය’, ‘මාතලේ – ඉලුක්කුඹුර – ලග්ගල මාර්ගය’, ‘කලල්පිටිය – උකුවෙල – ඇල්කඩුව මාර්ගය’, ‘මොරගහකන්ද – වැල්ලව මාර්ගය’, ‘ගොන්බොරුඔය – බලපොකුණ මාර්ගය’, ‘කන්දෙහන්දිය – අදිකාරම්ගොඩ – ලොග්ගල්ඔය මාර්ගය’, ‘රම්බොඩ – පුසුල්පිටිය මාර්ගය’ සංවර්ධනය කරමින් පවතිනවා. මේ අතරින් පේරාදෙණිය – රිකිල්ලගස්කඩ මාර්ගය දින 10ක් ඇතුළත ඉදිකිරීම් නිම කිරීමට කටයුතු කරන අතර, මාතලේ – ඉලුක්කුඹුර – ලග්ගල මාර්ගය සති තුනකින් නිම කිරීමට අපේක්ෂා කරනවා. කලල්පිටිය – උකුවෙල – ඇල්කඩුව මාර්ගයට දරුණු හානි සිදුව ඇති බැවින් ඊට නව මාර්ග කොටසක් ඇතුළත් කිරීමට සිදුව තිබෙනවා. ඒ සඳහා ඉඩම් අත්පත් කරගැනීම කළයුතු වෙනවා. එමෙන් ම මොරගහකන්ද – වැල්ලව මාර්ගයට පාලමක් ස්ථාපිත කළයුතු වෙනවා.