ගෑස් පැටවූ ලොරි දෙකක් තිබියදීත් ගෑස් නොමැති බවට දැන්වීමක් ප්රදර්ශනය කර ගෑස් බෙදා නොහැර සඟවාගෙන සිටි හාලිඇළ ප්රදේශයේ ව්යාපාරික ස්ථානයකට එරෙහිව නීතිමය පියවර ගත් බදුල්ල දිස්ත්රික් පාරිභෝගික කටයුතු පිළිබඳ අධිකාරියේ ජ්යෙෂ්ඨ විමර්ශන නිලධාරි අමිල රත්නායක මහතා පැවසීය. බදුල්ල දිස්ත්රික් පාරිභෝගික අධිකාරි කාර්යාලය වෙත ලද පැමිණිල්ලක් මත නිලධාරීන් විසින් පෙරේදා (11) එම ස්ථානය වෙත ගොස් පරීක්ෂා කිරීමේදී අදාළ ව්යාපාරික ස්ථානයේ ගේට්ටු ඉබි යතුරු දමා වසා තිබී ඇත. NO GAS යනුවෙන් දැන්වීමක් ද ප්රදර්ශනය කර තිබුණු බව අමිල රත්නායක මහතා සඳහන් කළේය.
පාරිභෝගික කටයුතු පිළිබඳ අධිකාරියේ නිලධාරීන් එම ව්යාපාරික ස්ථානය විවෘතකර පරීක්ෂා කිරීමට පියවර ගෙන ඇත. එහිදී ඒ තුළ ගෑස් පැටවූ ලොරි රථ දෙකක් තිබුණු බව අමිල රත්නායක මහතා සඳහන් කරයි.
ඒ පිළිබඳව සිදු කළ ප්රශ්න කිරීම්වලදි එම ගෑස් තොග බදුල්ල දිස්ත්රික්කයේ වෙනත් ප්රදේශවලට යැවීමට ඇති තොග බවට එහි කළමනාකාරවරිය විසින් ජ්යෙෂ්ඨ විමර්ශන නිලධාරි අමිල රත්නායක මහතාට පවසා තිබේ. ඒ වන විටත් ගෑස් ලබා ගැනීමට පැමිණි පාරිභෝගිකයන් රැසක් එම ස්ථානයේ සිට ඇත. ඔවුන් වෙත ලොරිවල පටවා තිබූ ගෑස් ලබාදීමට කටයුතු කළ බවත් ගෑස් සන්තකයේ තබාගෙන තොගයේ නොමැති බව පැවසූ ව්යාපාරිකයාට එරෙහිව බදුල්ල මහේස්ත්රාත් අධිකරණයේ නඩු පැවරීමට කටයුතු කළ බවත් අමිල රත්නායක මහතා වැඩිදුරටත් පැවසීය.