ශ්රී ලංකාවේ මැණික් බැංකුවක් (Gem Bank) ස්ථාපිත කිරීම සම්බන්ධයෙන් ඉදිරිපත් වී ඇති සවිස්තරාත්මක යෝජනාවකට අදාළව කඩිනම් පියවර ගන්නා ලෙස ජනාධිපති කාර්යාලය විසින් අදාළ රාජ්ය ආයතන වෙත උපදෙස් ලබා දී ඇත.
මේ විශේෂ යෝජනාව ගෝලීය ප්රවර්ධන ජාත්යන්තර ආයතනයේ ප්රධාන විධායක නිලධාරි තිලකසිරි විතාරණ මහතා විසින් පසුගියදා(10) ජනාධිපතිවරයා වෙත ඉදිරිපත් කර තිබේ.
එම ලිපියට පෙරේදා (12) එනම් ලිපිය යවා පැය 48ක් ගතවීමටත් පෙර පිළිතුරු ලිපියක් සහ අදාළ වැඩපිළිවෙළ සම්බන්ධයෙන් ඉදිරි ක්රියාමාර්ග ගැනීමට කටයුතු සම්පාදනය කිරීම සම්බන්ධයෙන් ජනාධිපති ලේකම් කාර්යාලයට සහ එහි නිලධාරීන්ට ස්තුතිවන්ත වන බවද තිලකසිරි මහතා පැවසීය.
මැණික් ක්ෂේත්රයේ ප්රගමනය උදෙසා ඉදිරිපත් කරන ලද මේ යෝජනාවට අදාළ ලිපිලේඛන සහ අවශ්ය තොරතුරු ජනාධිපති කාර්යාලය වෙත මීට පෙර යොමුකර තිබිණි.
ජනාධිපති ලේකම්වරයා වෙනුවෙන් මහජන සම්බන්ධතා අංශයේ නියෝජ්ය අධ්යක්ෂ සී. ඒ. කේ. පරණමාන මහතා විසින් මේ යෝජනාව ඉදිරි කටයුතු සඳහා කර්මාන්ත සහ ව්යවසායකත්ව සංවර්ධන අමාත්යාංශයේ ලේකම්වරයාට සහ ජාතික මැණික් හා ස්වර්ණාභරණ අධිකාරියේ සභාපතිවරයා වෙත යොමුකර ඇත.