කොටවිල, වැලිගම පොලිස් බල ප්රදේශයට අයත් දෙණිපිටිය ප්රදේශයේ සිදු කළ වැටලීමකදී කසිප්පු ඉස්කාගාරයක් පවත්වාගෙන ගිය පුද්ගලයෙකු අත්අඩංගුවටගෙන රක්ෂිත බන්ධනාගාරගත කර තිබේ.
මෙම සැකකාර පුද්ගලයා පොලිසිය මගහරිමින් සිටියදී කොටවිල පොලිසියට ලද තොරතුරක් මත අත්අඩංගුවට ගෙන තිබිණි.
අත්අඩංගුවට ගත් පුද්ගලයා ඊයේ (නොවැ. 26) මාතර වැඩබලන මහේස්ත්රාත්වරයා වෙත ඉදිරිපත් කිරීමෙන් පසු නොවැම්බර් මස 30 දක්වා රක්ෂිත බන්ධනාගාරගත කර තිබේ.
අදාළ සැකකරුගේ දියණිය සුරාබදු කාර්යාලයේ රාජකාරියේ නිරත වන බව හෙළි වී ඇත.
නොවැම්බර් 10 වන දා නිවසේ තිබී කසිප්පු බෝතල් විස්සක් සහ එම නිවස ආසන්නයේ පිහිටි ලඳු කැලෑවක් තුළ තිබී ගෝඩා මිලි ලීටර් පනස් පන්දහස් පන්සීයක් සොයාගෙන තිබිණි.
සැකකාර පුද්ගලයා සමග ඔහුගේ බිරිඳ සහ මධ්යසාර පෙරීමට උපයෝගී කර ගත් ගෑස් ලිප හා සිලින්ඩරය ද එම කටයුතු සඳහා සහය දුන් සැකකරුවෙකු ද අත්අඩංගුවට ගෙන නොවැම්බර් 16 වන දා කොටවිල අධිකරණය මාතර මහේස්ත්රාත් වෙත ඉදිරිපත් කර තිබිණි.
සැකකරුවන් වරද පිළි නොගත් නිසා වැඩිදුර පරීක්ෂණ සඳහා 2024 පෙබරවාරි 18 දින දක්වා මෙම නඩුව කල් තබා තිබේ.
මීට පෙර දෙවතාවක් ම මෙම සැකකාර සැමියා සහ බිරිඳට කොටවිල පොලීසිය මගින් නීති විරෝධී මත්පැන් පෙරීම සම්බන්ධයෙන් නඩු පවරා ඇති අතර එම නඩු තවමත් විභාග වෙමින් පවතින බව අප වාර්තාකරු සඳහන් කරයි.
සැකකරු පාපෝච්චාරණය කර ඇත්තේ, ඔහුට වැලිගම පොලිසියේ නඩු දාහතරක්, මාතර පොලිසියේ නඩු තුනක් සහ කොටවිල පොලිසියේ නඩු තුනක් ඇති බව ත් සමස්ත නඩු විස්සක් ඇති බව ත් ය.