හිටපු සිවිල් ගුවන් සේවා ඇමැති පියංකර ජයරත්න මහතාට එරෙහිව පවරන ලද අල්ලස් නඩුව වරද පිළිගැනීම හෝ අල්ලස් කොමිසම නියම කරන වෙනත් කොන්දේසි සම්පූර්ණ කිරීමේ එකඟතාව යටතේ ඉල්ලා අස්කර ගන්නා ලෙස විත්තිය කළ ඉල්ලීමක් අල්ලස් හෝ දූෂණ චෝදනා විමර්ශන කොමිෂන් සභාව පසුගියදා ප්රතික්ෂේප කළේය. එම කරුණු දැක්වීම පිළිගත් මහාධිකරණ විනිසුරු රශාන්ත ගොඩවෙල මහතා පැමිණිල්ලේ සාක්ෂි විමසීමට නියෝග කළේය.
හිටපු ජනාධිපති මහින්ද රාජපක්ෂ මහතාගේ පදවි ප්රාප්තිය නිමිත්තෙන් පවත්වන ලද ‘දැයට කිරුළ’ ප්රදර්ශනයේ ගෙවීමක් සම්බන්ධයෙන් හිටපු සිවිල් ගුවන් සේවා ඇමැති පියංකර ජයරත්න මහතාට එරෙහිව අල්ලස් හෝ දූෂණ කොමිසම විසින් දූෂණය නමැති වරද යටතේ මෙම නඩුව පවරා තිබේ. එම නඩුව දූෂණ විරෝධී පනතේ 67 වගන්තිය යටතේ වරද පිළිගෙන වන්දියක් හෝ දඩයක් ගෙවීම මගින් හෝ කොමිසම නියම කරන වෙනත් කරුණු සම්පූර්ණ කිරීමේ එකඟතාව යටතේ ඉවත්කර ගන්නා ලෙස විත්තිය වෙනුවෙන් ජනාධිපති නීතිඥ ශවේන්ද්ර ප්රනාන්දු මහතා කළ ඉල්ලීමක් කළේය. එම වගන්තිය දූෂණ විරෝධී පනත යටතේ ගැනෙන සීමිත කාරණා සම්බන්ධයෙන් බව ප්රකාශ කළ අල්ලස් හෝ දූෂණ විමර්ශන කොමිසමේ සහකාර අධ්යක්ෂ ජනරාල් තනූජා බණ්ඩාර මහත්මිය විත්තිකරුට එම පනත වගන්තිය යටතේ ඉල්ලීමක් කිරීමේ හැකියාවක් නොමැති බව ප්රකාශ කළාය.
ඒ අනුව නඩුව විභාගයට ගැනීමට නියම කළ කොළඹ මහාධිකරණ විනිසුරු රශාන්ත ගොඩවෙල මහතා ඉදිරියේ චුදිතට චෝදනා කියවා දෙන ලදි. ලබන මැයි 6දා නඩුව යළි කැඳවේ.
අල්ලස් හෝ දූෂණ විමර්ශන කොමිසම විසින් පිංයකර ජයරත්න හිටපු ඇමැතිවරයාට විරුද්ධව මෙයට අමතරව තවත් නඩු 4ක් පවරා තිබේ.