සූර්ය බලශක්තියෙන් ක්රියාත්මක වන විදුලි උත්පාදක යන්ත්රයක් (සෝලා ජෙනරේටරයක්) පළමු වරට මෙරටේදීම නිපදවා හඳුන්වා දීමට ශ්රී ලාංකීය නිර්මාණකරුවෙක් සමත්ව ඇත.
ශ්රී ලංකාව තුළදීම පළමු වරට එවැනි නිෂ්පාදනයක් කිරීමට සමත් වූ මේ නිර්මාණකරුවා වයඹ පළාත කේන්ද්ර කර ගත් දුෂ්කර ගම් ප්රදේශයක් වන නිකවැරටියෙන් බිහිවූ අයකු වීමද විශේෂත්වයකි. ඔහු නමින් සරත් දිසානායකය. ශ්රී ලංකාව තුළ සූර්ය බලශක්ති පද්ධති සවි කිරීමෙහි නිරත සමාගමක් වන ඊසෝන් එනර්ජි සමාගමේ නිර්මාතෘවරයාය.
ලෝකයේ බලශක්ති නිර්මාණ ක්ෂේත්රයේ ප්රධානතම නිෂ්පාදකයින් වන චීනය , අමෙරිකාව ,ජපානය , දකුණු කොරියාව වැනි දියුණු රටවල් හා සමානවම මේ අපූරු නිර්මාණය දේශීය වශයෙන් සාර්ථකව නිපදවීමට සරත් දිසානායක නම් නිර්මාණකරුවා සමත්ව සිටීම විශේෂත්වයකි.
“පවර් මාස්ටර්” යනුවෙන් නම්කර තිබෙන ඔහුගේ මේ නව නිර්මාණය වයඹ පළාත් ආණ්ඩුකාර තිස්ස වර්ණසූරිය , කුරුණෑගල නගරාධිපති නීතිඥ ආනන්ද සහබන්දු සහ මුදල් අමාත්යාංශයේ වෙෙළඳ ජාතික තනි කවුළු පද්ධති ව්යාපෘතියේ අධ්යක්ෂ නීලකාන්ත වන්නිනායක මහත්වරු ඇතුළු විශාල පිරිසකගේ සහභාගිත්වයෙන් කුරුණෑගලදී එළිදැක්වීම සිදු කෙරිණි.
අතින් ගෙන යා හැකි ජංගම යන්ත්රයක් සේම එක තැනක ස්ථාපිත කළ හැකි යන්ත්රයක් වශයෙන්ද ඔහු තම නිෂ්පාදනය එළිදක්වා ඇත. අතින් ගෙන යා හැකි විදුලි උත්පාදක යන්ත්රය නිවාසවලට විදුලිය සපයා ගැනීමට සහ එළිමහනේ කෘෂිකාර්මික කටයුතු සඳහා ප්රයෝජනයට ගත හැකි අතර , අනෙක් යන්ත්ර වර්ගය මහා පරිමාණයෙන් විදුලිය සපයා ගැනීම සඳහා යොදා ගැනීමට හැකියාව පවතින ආකාරයට නිර්මාණය කර තිබේ. වහලයේ සවි කරන සූර්ය පැනල මාර්ගයෙන් විදුලි උත්පාදක යන්ත්රයේ බැටරි ආරෝපණය වීම සිදු කෙරේ.
මේ සඳහා අවශ්ය කොටස් කීපයක් පමණක් චීනය සහ ඩුබායි රටවලින් ආනයනය කර තිබෙන අතර අනෙක් සියලුම කොටස් ඔහු නිකවැරටියේ පිහිටි තම කර්මාන්ත ශාලාවේදීම නිර්මාණය කර තිබීමද තවත් විශේෂත්වයකි. ගෘහස්ථ විදුලි උත්පාදක යන්ත්රය කිලෝ වොට් 1.2 සිට 6.2 දක්වාත් , ස්ථාපිත විදුලි උත්පාදක යන්ත්රය කිලෝවොට් 6.2 සිට 10 දක්වාත් බල උත්පාදනයකින් යුක්තය. මේ සෑම
යන්ත්රයක්ම බාහිරට ශබ්දය නිකුත් නොවන ආකාරයට නිර්මාණය කර තිබීමද විශේෂත්වයකි.
පාසල් අධ්යාපනය නිමකර පොලිස් නිලධාරියකු ලෙස රැකියාවක නිරත වූ සරත් දිසානායක මහතා පොලිස් සේවයෙහි නිරතව සිටියදීම විදුලි කාර්මික ශිල්පය හදාරා ඇත. ඉන් අනතුරුව සේවයෙන් ඉවත්ව උසස් විදුලි කාර්මික ශිල්පීය පුහුණුවක් ලබා ඒ ඔස්සේ තම දැනුම වැඩිදියුණු කරගෙන මෙරටට සූර්ය බලශක්තිය හඳුන්වා දුන් 2010 වසරේ සිටම ඒ සඳහා තම අවධානය යොමු කර ඇත. පසුව 2011 වසරේදී තමන්ගේම ආයතනයක් පිහිටුවාගෙන සූර්ය විදුලිබල පද්ධති සවි කිරීමේ ව්යාපාරයකින් ව්යාපාරික ක්ෂේත්රයට පිවිසි ඔහු ඒ ඔස්සේ දිනෙන් දින අලුත් වන තාක්ෂණික දැනුම මනාව අවබෝධ කරගෙන මෙම නව නිර්මාණය එළිදැක්වීමට සමත්ව සිටී.