කෙහෙළිය රඹුක්වැල්ල හිටපු ඇමැතිවරයාගේ පුත්රයා වන ක්රිකට් ක්රීඩක රමිත් රඹුක්වැල්ලට අයත් දේපළ 4ක් මේ වන විට තහනම් කර ඇති බවත් ඉන් දේපළ දෙකක් නඩුව අසා නිමවන තෙක්ම තහනම් කර ඇති බව අල්ලස් හෝ දූෂණ කොමිසම ඊයේ (13දා) අධිකරණයට දැනුම් දුන්නේය.
විත්තිකරු ඇමැතිවරයාගේ පෞද්ගලික ලේකම්වරයා ලෙස කටයුතු කළ සමයේ අල්ලස් ගැනීමෙන් හෝ අල්ලසකින් උපයාගත් දේපළ පරිවර්තනය කිරීමෙන් ලබාගත් වත්කම් හා මුදල්වල හිමිකාරීත්වය දැරීමේ චෝදනාව යටතේ මෙම නඩුව ගොනුකර ඇත.
කොළඹ මහාධිකරණ විනිසුරු මොහොමඩ් මිහාල් මහතා හමුවේ ඊයේ (13දා) නඩුව විභාගයට ගත් අවස්ථාවේ ඇප මත මුදාහැර සිටින විත්තිකරු අධිකරණය ඉදිරියේ පෙනී සිටියේය.
එහිදී පැමිණිල්ල මෙහෙයවන අල්ලස් කොමිසමේ සහකාර අධ්යක්ෂ ඉසංකා සිරිවර්ධන මහත්මිය කරුණු දක්වමින් නඩුවට සාක්ෂිකරුවකු හා බැංකු ගිණුම් 7ක විස්තර නඩු භාණ්ඩ ලෙස අලුතින් අධිචෝදනා පත්රයට එකතු කරන බව දැනුම් දුන්නාය.
ඒ අනුව අල්ලස් හෝ දූෂණ කොමිසමේ අයථා වත්කම් විමර්ශන අංශයේ ස්ථානාධිපති ඉන්දික ධර්මවංශ මහතා පැමිණිල්ලේ 8 වැනි සාක්ෂිකරු ලෙස සාක්ෂි ලේඛනයට ඇතුළු කිරීමට අවසර හිමිවිය.
ඉන්පසු පැමිණිල්ල විසින් සංශෝධිත සාක්ෂි ලැයිස්තුව සහ නඩු භාණ්ඩ ලේඛනයේ පිටපත් අධිකරණයට භාර දෙන ලදි.
මෙම ලේඛන භාර දීමෙන් පසු අධිචෝදනා පත්රයේ දක්වා ඇති සියලු ලේඛන විත්තියට භාරදී අවසන් බව පැමිණිල්ලේ නීතිඥවරිය කියා සිටියාය.
2022 වසරේ ජනවාරි මස 01 වැනිදා සහ 2023 වසරේ සැප්තැම්බර් මස 14 වැනිදා අතර දක්වා කාලසීමාව තුළ රුපියල් 296,566,444.76ක් වටිනා වත්කම් හා දේපළ උපයාගෙන ඉන් රුපියල් 275,302,616.06ක වටිනාකමකින් යුත් මුදල් හා දේපළ උපයාගත් ආකාරය හෙළිදරව් කිරීමට අපොහොසත් වීමේ චෝදනා මත විත්තිකරුට එරෙහිව දූෂණ විරෝධි පනත යටතේ චෝදනා ගොනු කිරීම සිදුව ඇත.
විත්තිකරුට එරෙහිව අධිචෝදනා 3ක් නඟා ඇති අතර 2025 වසරේ සැප්තැම්බර් 12දා නඩුව පැවරීම සිදුවිය. අධිචෝදනා පත්රයේ වත්කම් හා දේපළ මිලදී ගැනීම්, බැංකු ගිණුම් 41ක් පිළිබඳ තොරතුරු දක්වා ඇත. විත්තිකරුට එරෙහිව පැමිණිලේ සාක්ෂිකරුවන් 86 දෙනකු නම්කර තිබේ.
විත්තිකරු රුපියල් පනස්දාහක මුදල් ඇපයක් හා රුපියල් ලක්ෂ 10 බැගින් වූ ශරීර ඇප දෙකක් මත මුදාහැරීම සිදුව ඇති අතර විදේශ ගමන් තහනමක් ද පනවා ඇත. පෙබරවාරි 11 වැනිදා නඩුව යළි කැඳවේ.
විත්තිය වෙනුවෙන් ජනාධිපති නීතිඥ කාංචන රත්වත්ත පෙනී සිටි අතර අල්ලස් කොමිසමේ සහකාර අධ්යක්ෂ ඉසංකා සිරිවර්ධන මහත්මිය පැමිණිල්ල මෙහෙය වූවාය.