එළැඹෙන අය-වැයේදී නව බදු හඳුන්වා නොදීම රජයේ අපේක්ෂාව බවත්, පනවා ඇති ඇතැම් බදු ප්රතිශත අඩු කිරීමට ඉදිරියේදී අවධානය යොමු කරන බවත් ජනාධිපති අනුර කුමාර දිසානායක මහතා ජපානයේ වෙසෙන ශ්රී ලාංකිකයන් හමුවේ ප්රකාශ කළේය.
ජපානයේ සංචාරයක නිරතව සිටින ජනාධිපතිවරයා එහි සිටින ශ්රී ලාංකික ප්රජාව ටෝකියෝ හි Reiyukai ශාලාවේදී ඊයේ (28) හමු විය. එහිදී ජනාධිපතිවරයා පැවසුවේ එළියේ ගොඩනැඟෙන ආර්ථිකය තුළ ආර්ථික වර්ධන ඉලක්ක සපුරාගැනීම රජයේ අපේක්ෂාව වන බවයි.
එහිදී වැඩිදුරටත් අදහස් දැක්වූ ජනාධිපතිවරයා මෙලෙස ද කීවේය.
“පසුගිය වසරේ රාජ්යතාන්ත්රික සබඳතාවල සමබරතාව ආරක්ෂා කරගැනීමට ශ්රී ලංකාව සමත් වී තිබෙනවා. තවදුරටත් ආර්ථිකයේ සහ වෙළෙඳපොළ තුළ ජාතික සීමා නොමැති ලෝකයක රටකට තනිව ඉදිරියට යා නොහැකියි. යහපත් රාජ්යතාන්ත්රික සබඳතා තුළ ශ්රී ලංකාව ලෝකය හමුවේ ඉහළට ඔසවා තැබීමට කටයුතු කරනවා.
එසේම රට ඉදිරියට ගෙන යෑමට නම් ජාතික සමගිය නිර්මාණය කළ යුතුයි. රට තුළ කිසිදු ජාතිවාදී ගැටුමක් උත්සන්න නොවූ වසරක් ලෙස පසුගිය වසර ලංකා ඉතිහාසයට එක් වෙනවා. ශ්රී ලංකාවේ ජීවත්වන සහ රටින් පිට සිටින කිසිදු ශ්රී ලාංකිකයෙක් පෞද්ගලික වරප්රසාද හෝ වරදාන අපේක්ෂාවෙන් වත්මන් රජය බලයට පත් කරගැනීමට කටයුතු කළේ නෑ. එම සියලු දෙනා අපේක්ෂා කළ පරිවර්තනය වෙනුවෙන් අද රජය කැපවී කටයුතු කරනවා. රජයේ වසරක ගමන් මඟෙහි සාර්ථකත්වය මැනිය යුත්තේ ඒ මත පදනම්වයි.
රටේ බිඳ වැටුණු ආර්ථිකය ගොඩනඟමින් ආර්ථික ස්ථාවරත්වය ඇති කිරීම, නීතියේ විධානයේ ආධිපත්යය තහවුරු කිරීම, දූෂණ වංචාවලින් තොර පාලනයක් ඇති කිරීම, රාජ්ය යන්ත්රණය කාර්යක්ෂම කිරීම වැනි ජනතාව අපේක්ෂා කළ නව පරිවර්තන වෙනුවෙන් ඉකුත් වසරේ රජය සැලකිය යුතු වැඩ කොටසක් ඉටු කර තිබෙනවා. ගොඩනැඟෙමින් තිබෙන ශ්රී ලංකාවට නොබියව පැමිණ ආයෝජනය කර, රට දිනවීමේ ගමනේ කොටස්කරුවන් බවට පත්වන ලෙසත් ජපානයේ වෙසෙන ශ්රී ලාංකිකයන්ගෙන් ඉල්ලා සිටිනවා. ඒ වෙනුවෙන් අවශ්ය සියලු පහසුකම් සපයා දීමට රජය සූදානම්.”
ජපානයේ ශ්රී ලංකා තානාපති කාර්යාලය සහ ස්වේච්ඡා සංවිධානවල එකමුතුවෙන් සංවිධාන කර තිබූ මේ හමුවට ජපානයේ වෙසෙන මහා සංඝරත්නය, ආගමික පූජකවරුන්, වෘත්තීයවේදීන්, විශ්වවිද්යාල සිසුන් ඇතුළු විශාල පිරිසක් එක්ව සිටියහ.