රාජගිරිය මංසන්ධියේ දෛනිකව පවත්නා අධික රථවාහන තදබදය අවම කිරීමට සැලසුම් කරමින් කොළොන්නාව ඇළ මාර්ගය හරහා රුපියල් මිලියන 2,598ක් වැය කරමින් ද්විත්ව මංතීරු සහිත නව පාලමේ ඉදිකිරීම් මේ වන විට වේගවත් කර ඇත.
මීටර් 600ක දිගකින් යුත් මේ පාලමේ පළල මීටර් 10කි. ශ්රී ලංකා රජයේ දේශීය මූල්ය ප්රතිපාදන යටතේ මේ පාලමේ ඉදිකිරීම් කටයුතු සිදුවේ.
මේ නව පාලමේ ඉදිකිරීම් කටයුතුවල ප්රගතිය සොයාබැලීමේ නිරීක්ෂණ චාරිකාවක ප්රවාහන හා මහාමාර්ග නියෝජ්ය ඇමැති වෛද්ය ප්රසන්න ගුණසේන මහතා පෙරේදා (12) නිරත විය.
ඇතුළුකෝට්ටේ – අංගම්පිටිය සහ රාජගිරිය – නාවල පාසල් මාවත නව පාලම මඟින් සම්බන්ධ කෙරේ.
ප්රවාහන,මහාමාර්ග,වරාය සහ සිවිල් ගුවන් සේවා අමාත්යාංශයේ මූලිකත්වයෙන් මාර්ග සංවර්ධන අධිකාරියේ ඉදිකිරීම් අංශයේ සේවා දායකත්වයෙන් ක්රියාත්මක මේ පාලම් ව්යාපෘතියේ සංවර්ධන කටයුතු මේ වන විට 94% කින් පමණ අවසන් කර ඇත.මීට සමගාමීව කෝට්ටේ අංගම්පිටිය, නාවල පාසල් මාවත ඇතුළු ප්රවේශ මාර්ග ද සංවර්ධන කෙරේ.
මේ නිරීක්ෂණයට එක්වූ නියෝජ්ය ඇමැතිවරයා මෙසේ පැවසීය.
“පසුගිය රජය සමයේ ඇතිවූ ආර්ථික අර්බුද සමඟ නතර කර තිබූ මේ පාලමේ සංවර්ධන කටයුතු දැන් අරඹා තිබෙනවා. සංවර්ධන කටයුතුවලට අවශ්ය මුදල් රජය සතුව පවතිනවා. තනි ආයතනයක් විදිහට, මහාමාර්ග සංවර්ධනයට විශාල මූල්ය ප්රතිපාදනයක් වෙන් වී තිබෙනවා. නාස්තිය, දූෂණය අවම කරමින් රජය ආර්ථික දර්ශකවලට ළඟාවෙනවා.
ජාතික ප්රසම්පාදන කාර්යයන් විනිවිදභාවයෙන් යුතුව කරමින් රජය රටේ ආර්ථික සංවර්ධනයට කැපවී සිටිනවා. පසුගිය වසරට සාපේක්ෂව වියදම් අඩු කරන අතරම, ආදායම් මාර්ග වර්ධනය කිරීමට කටයුතු කර තිබෙනවා. විදේශ ප්රේෂණ, ඍජු විදේශ ආයෝජන, රාජ්ය ආදායම වර්ධනයට අවශ්ය පසුබිම සකස් සකස් කරමින් ඉලක්ක වෙත ගමන් කිරීමට රජය සමත් වී තිබෙනවා.
ලංගම පෞද්ගලික බස් රථ සහ දුම්රිය සේවාව කාර්යක්ෂම කිරීමට අවශ්ය පියවර රජය විසින් ගනු ලබන බවත් එහිදී රජයේ ඉලක්ක වෙත යෑමට අවශ්ය විසඳුම් පරිපාලනමය වශයෙන් ගැනීමට සිදුවෙනවා.”
මාර්ග සංවර්ධන අධිකාරියේ සහ රාජ්ය සංවර්ධන හා නිර්මාණ නීතිගත සංස්ථාවේ නිලධාරීහු රැසක් මේ අවස්ථාවට එක්ව සිටියහ.