මත්ද්රව්ය ජාවාරම්වලට හෝ සංවිධානාත්මක අපරාධවලට සම්බන්ධ පොලිස් නිලධාරීන් සිටී නම් ඒ තොරතුරු තමන්ට ලබා දෙන්නැයි පොලිස්පති, නීතිඥ ප්රියන්ත වීරසූරිය මහතා පැවසීය.
පොලිස්පතිවරයා මේ බව පැවසුවේ ගංජා ඇතුළු විස මත්ද්රව්ය සහ නීති විරෝධි මත්පැන් තුරන් කිරීමට ඌව පළාතේ සිදු කරන මෙෙහයුමට අදාළ සමාරම්භක උත්සවය පෙරේදා (14) තණමල්විල මූලස්ථාන පොලිස් පරිශ්රයේදී පැවති අවස්ථාවේදීය.
එහිදී වැඩිදුරටත් අදහස් දැක්වූ පොලිස්පතිවරයා මෙලෙස ද කීවේය.
“බලපෑමකින් තොරව නිදහසේ රාජකාරී කිරීමට හැකි දේශපාලන වටපිටාවක් තිබෙන මේ කාලයේත් මත්ද්රව්ය වැටලීම් කරන්න බැරි නම් එය පොලීසියේ දුර්වලතාවක්.
මේ මත්ද්රව්ය ව්යාපාරයේ අස්සක් මුල්ලක් නෑර ජාවාරම්කාරයන් පිරිලා ඉන්නවා. ඇතැම් රාජ්ය ආයතනවල වගේම පොලීසියේත් ඉන්නවා. මීට දින කිහිපයකට පෙර දිනකත් ග්රෑම් 700ක් එක්ක පොලීසියේ කෙනෙක් අත්අඩංගුවට ගත්තා. පොලිස් නිලධාරියෙක් කියලා නීතිය අඩුවෙන් ක්රියාත්මක කරන්නේ නෑ. ඔවුන්ටත් උපරිමයෙන් නීතිය ක්රියාත්මක කරනවා. එහි ප්රතිඵලයක් ලෙස මේ ජාවාරම්වලට සම්බන්ධ පොලිස් නිලධාරීන් 100කට අධික ප්රමාණයක් මේ වෙනකොට අත්අඩංගුවට අරන් තියෙනවා. ඒ අය සම්බන්ධයෙන් නීතිය තදින් ක්රියාත්මක වෙනවා වගේම ඔවුන් සේවයෙන් ඉවත් කරන්න අවශ්ය කටයුතු කරනවා.
රාජ්ය සේවයේ තවත් නිලධාරීන් කොටසක්, ත්රිවිධ හමුදා නිලධාරීන් කොටසක් මේ ව්යාපාරයේ ඉන්නවා. ඒත් එක්කම පොලීසියේ මත්ද්රව්යවලට ඇබ්බැහිවූ යම් කොටසක් හිටියා. ඒ කොටස සේවයෙන් පහකරන්න අවශ්ය කටයුතු කරනවා. පොලීසියේ අය කොච්චර අඩු වුණත් අපි ඒ කාර්යය කරනවා. මත්ද්රව්ය ජාවාරම්කාරයෙක් පොලීසියේ ඉන්න බෑ. මත්ද්රව්ය ඇබ්බැහි වූ පුද්ගලයන් පොලීසියේ ඉන්න බෑ. මත්ද්රව්ය ජාවාරම්කාරයන් එක්ක ඉන්න, ඔවුන් එක්ක සම්බන්ධකම් පවත්වන නිලධාරීන් ඉන්නවා නම් ඒ තොරතුරු මට දෙන්න. මම ඒ සම්බන්ධයෙන් ක්රියාත්මක වෙනවා. සංවිධානාත්මක අපරාධකරුවන් හා මත්ද්රව්ය සම්බන්ධයෙන් තොරතුරු ඇතොත් ඒවා මා වෙත ඍජුවම දැනුම් දෙන්න. මම ඒ සඳහා වහාම ක්රියාත්මක වෙනවා. මගේ ජංගම දුරකතනය පැය 24ම මහජනතාවට විවෘතව තියෙනවා.
අපට ලැබී තියෙන බලතලත් එක්ක අතීතයේ ඉඳන්ම මත්පැන් අල්ලනවා. වෙනත් දූෂණ වැරදිවලට සම්බන්ධ පුද්ගලයන් අල්ලනවා. හැබැයි මෙහෙම ඇල්ලුවා කියලා කිසිම දේක අඩුවක් වෙලා නෑ. එන්න එන්න ඒවා වැඩි වුණා. මත්ද්රව්ය භාවිතය නිසා ඇති වන සෞඛ්ය ගැටලුවලට වඩා ඒ හා බැඳුණු තවත් සමාජ ප්රශ්න මේ වන විට සමාජයේ නිර්මාණය වෙලා තියෙනවා. දවසකට 09කට ආසන්න ප්රමාණයක් රිය අනතුරුවලින් මිය යනවා. සදාකාලික අබ්බගාත වන පිරිසත් ඒ වගේමයි. මේ සිදු වන අනතුරු පිළිබඳව අපි විශ්ලේෂණය කර බැලුවාම අනාවරණය වුණේ රිය අනතුරුවලට මුහුණු දුන් බොහෝ දෙනෙක් මත්ද්රව්ය භාවිතය නිසා මෙලෙස අනතුරුවලට ලක්ව ඇති බවයි. සමාජය තුළ ඉතාමත් ව්යසනකාරී ලෙස පවුල් ආරවුල් ඇතුළු සමාජ ප්රශ්න රැසක්ම නිර්මාණය වෙලා තියෙනවා. මේ ගමන යන්න සියලු දෙනාගේම සහාය අවශ්යයි. පොලීසියට විතරක් මේක තනියම කරන්න බෑ. අද ඌව පළාතේ ආරම්භ කරන මේ වැඩසටහනත් ජනාධිපතිවරයා ආරම්භ කළ ‘ඉවත්වෙනු’ වැඩසටහනට සමගාමීව සිදු කරන්නක්.
මත්ද්රව්ය ජාවාරම් කරන පුද්ගලයන් අල්ලනවා වගේම ඇබ්බැහි වෙලා ඉන්න පිරිස් පුනරුත්ථාපනය කිරීමටත් අවශ්ය පියවර ගෙන තිබෙනවා. ඒ නිසා මහජනයා විශ්වාස කරන පොලීසියක් නිර්මාණය කිරීම අවශ්යයි. පසුගිය වසරේදී හෙරොයින් ටොන් 02ක්, අයිස් මත්ද්රව්ය ටොන් 04ක්, ගංජා ටොන් 15ක්, කොකේන්, මත් පෙති, මත් කරල් මිලියන 05ක් විතර අත්අඩංගුවට ගෙන තිබෙනවා. මේවා සමාජ ගත වුණා නම් එයින් වෙන්න තිබූ ව්යසනය හිතාගන්නවත් බෑ. මේ අපි අල්ලපු මත්ද්රව්ය අපි දන්නේ නෑ කොතරම් ප්රමාණයක් සමාජගත වෙලා ද කියලා. ඒ නිසා මේ තරම් නිදහසක් තියෙන වටපිටාවක් තුළත් අපට මේ වැටලීම් කරන්න බැරි නම් ඒක පොලීසියේ දුර්වලකමක්.”
මේ අවස්ථාවට ඌව පළාත භාර ජ්යෙෂ්ඨ නියෝජ්ය පොලිස්පති මහේෂ් සේනාරත්න, මොනරාගල දිසාව භාර නියෝජ්ය පොලිස්පති නිහාල් තල්දූව මහත්වරුන්, ඌව පළාත නියෝජනය කරන කොට්ඨාස භාර ජ්යෙෂ්ඨ පොලිස් අධිකාරීවරුන්, සහකාර පොලිස් අධිකාරිවරුන්, පොලිස් ස්ථාන 48හි ස්ථානාධිපතිවරුන්, තණමල්විල ප්රාදේශීය ලේකම් ඇතුළු රාජ්ය නිලධාරීහු එක්ව සිටියහ.