ත්රිකුණාමලය කොටුව පාරේ ශ්රී සම්බුද්ධ ජයන්ති විහාරස්ථානයට අයත් තාවකාලිකව ඉදිකළ ගොඩනැඟිල්ලේ දැනට කළ ඉදිකිරීම් ඒ ආකාරයෙන් තබන ලෙසත් නව ඉදිකිරීම් හෝ වෙනස්කම් නොකරන ලෙසත් ත්රිකුණාමලය ප්රධාන මහේස්ත්රාත් එම්.එන්.එම්.සම්සූදීන් මහතා විහාරාධිකාරී හිමියන්ට ඊයේ (19) නියෝග කළේය.
ත්රිකුණාමලය පොලිස් අධිකාරි ජේ.එල්. අජිත් කුමාර වරාය පොලිස් ස්ථානාධිපති ප්රධාන පොලිස් පරීක්ෂක කේ.ඩබ්.ජී.එස්.කේ. සමරසිංහ මහත්වරු ඉදිරිපත් කළ BR/1784/01/PC/25 දරන බී වාර්තාව සැලකිල්ලට ගෙන මහේස්ත්රාත්වරයා මෙම නියෝගය නිකුත් කළේය.
ත්රිකුණාමලය ඩච් බේ වෙරළ තීරයේ ශ්රී සම්බුද්ධ ජයන්ති විහාරාධිකාරි හිමි තාවකාලික ගොඩනැඟිල්ලක් ඉදිකරන බවට වෙරළ සංරක්ෂණ හා වෙරළ සම්පත් කළමනාකරණ දෙපාර්තමේන්තුව කළ පැමිණිල්ලක් අනුව දෙපාර්ශ්වයක් අතර ඇතිවූ ආරවුලක් සම්බන්ධයෙන් පොලීසිය මෙම බී වාර්තාව ඉදිරිපත්කර තිබුණි.
ඉදිරිපත්වූ කරුණු සැලකිල්ලට ගත් මහේස්ත්රාත්වරයා අදාළ ඉදිකිරීම් හා සිදු කළ පරීක්ෂණවල ප්රගතිය දැක්වෙන වාර්තාවක් ලබන 26 දා අධිකරණයට ඉදිරිපත් කරන ලෙස වරාය පොලීසියට නියම කෙරිණි. මේ අතර අදාළ අධිකරණ නියෝගයේ පිටපත් රෝහල්ගත වී සිටින විහාරාධිකාරි හිමිට හා දායක සභාවේ ලේකම්වරයාට භාරදීමට පියවර ගෙන තිබුණි.