දිට්වා සුළි කුණාටුව හේතුවෙන් හානියට පත් ශ්රී ලංකාව නැවත ගොඩනැඟීම සඳහා හදිසි ආධාර රැස්කිරීමට යුනෙස්කෝ සංවිධානය පියවර ගෙන තිබේ.
ප්රංශයේ ශ්රී ලංකා තානාපතිනි හා යුනෙස්කෝවේ නිත්ය නියෝජිත මනීෂා ගුණසේකර මහත්මිය පැරිසියේ පිහිටි යුනෙස්කෝ මූලස්ථානයේ දී යුනෙස්කෝ අධ්යක්ෂ ජනරාල් කලීඩ් එල්-එනානි මහතා හමුවී තිබෙන අතර, එහිදී මේ සම්බන්ධයෙන් අවධානය යොමුව තිබේ.
දිට්වා සුළි කුණාටුවෙන් පසු යුනෙස්කෝවේ හදිසි ආධාර සහ ශ්රී ලංකාවට මධ්ය කාලීන සහ දිගුකාලීන සහයෝගය කෙරෙහි මෙම රැස්වීමේදී අවධානය යොමුව තිබේ. ආපදාවේ පරිමාණය සහ රජයේ නැවත ගොඩනැඟීමේ සැලැස්ම පිළිබඳව තානාපතිවරිය විසින් අධ්යක්ෂ ජනරාල්වරයාට කරුණු පැහැදිලි කර ඇත.
ගංවතුරෙන් හානි වූ ලේඛනාගාර වාර්තා ස්ථාවර කිරීම සහ සංරක්ෂණය කිරීම සඳහා යුනෙස්කෝව උරුම හදිසි අරමුදල යටතේ හදිසි ආධාර කඩිනමින් බළමුළු ගැන්වීම සඳහා රජයේ කෘතඥතාව පළකර තිබේ. ශ්රී ලංකා රජයට සහ ජනතාවට ශෝකය පළකර තිබෙන අධ්යක්ෂ ජනරාල්වරයා, යුනෙස්කෝවේ සහයෝගය සහ සහයෝගිතාව නැවත තහවුරු කර ඇත.
සංස්කෘතික උරුම ප්රතිසාධනය, පාසල් සහ මනෝ සමාජීය සහාය කෙරෙහි අවධානය යොමුකරන අධ්යාපන අංශයේ සහාය සහ යුනෙස්කෝවේ විද්යාත්මක වැඩසටහන් හරහා ජල විද්යාත්මක අවදානම් තක්සේරු කිරීම සහ පූර්ව අනතුරු ඇඟවීමේ පද්ධති ශක්තිමත් කිරීම සඳහා තාක්ෂණික සහයෝගීතාව ඇතුළුව ශ්රී ලංකාවේ අවශ්යතා සමඟ සමපාත වන ඒකාබද්ධ අන්තර් ආංශික ප්රතිචාරයක් අනුගමනය කිරීම සඳහා වන යුනෙස්කෝවේ අභිප්රාය ඔහු පෙන්වා දී තිබේ.
නවදිල්ලියේ පිහිටි යුනෙස්කෝ කලාපීය කාර්යාලය හරහා සහයෝගය ලබාදෙයි. සිය තේරීපත්වීම සහ ධුරයට පත්වීම පිළිබඳව ශ්රී ලංකාවේ සුබපැතුම් එක්කරමින්, තානාපතිවරිය ශ්රී ලංකාවේ විදේශ කටයුතු, විදේශ රැකියා සහ සංචාරක ඇමැති විජිත හේරත් මහතාගේ සුබ පැතුම් පණිවිඩයක් භාරදී ඇත. යුනෙස්කෝවේ වරමට සහාය දැක්වීමට ශ්රී ලංකාව දක්වන කැපවීම නැවත අවධාරණය කර ඇත.
ශ්රී ලංකාව යුනෙස්කෝව සමඟ අඛණ්ඩව සම්බන්ධ වීම පිළිබඳව අධ්යක්ෂ ජනරාල්වරයා අගමැති සහ යුනෙස්කෝ ජාතික කොමිසමේ සභාපතිනි හරිනි අමරසූරිය මෙණෙවිය සහ ඇමැති විජිත හේරත් මහතා වෙත කෘතඥතාව පළකර තිබේ.
මෙම රැස්වීමට යුනෙස්කෝ ලේකම් කාර්යාලයේ ජ්යෙෂ්ඨ නිලධාරීහු සහභාගි වූහ. අර්බුද සූදානම සහ ප්රතිචාර දැක්වීම සඳහා වන අංශයේ ප්රධානී අහමඩ් සවුචේ; සාමාජික රටවල් සමඟ සබඳතා සඳහා වන අංශයේ ප්රධානී ඕමාර් මොනිබ් සහ ආසියා හා පැසිෆික්, ප්රමුඛතා අප්රිකාව සහ විදේශ සබඳතා ඒකකයේ ප්රධානී මන් හා ට්රාන් මහත්වරු ද සහභාගී වී ඇත.