ආපදා තත්ත්වයෙන් හානියට පත් ශ්රී ලංකාව නැවත ගොඩනැඟීම වෙනුවෙන් ආරම්භ කර තිබෙන ‘ශ්රී ලංකාව නැවත ගොඩනැඟීමේ’ අරමුදල සඳහා රුපියල් ලක්ෂ 30ක් (අමෙරිකානු ඩොලර් 10,000) පමණ පරිත්යාග කිරීමට අමෙරිකා එක්සත් ජනපදයේ වොෂින්ටන්හි වෙසෙන ශ්රී ලාංකිකයන් පියවර ගෙන තිබේ.
වොෂින්ටන්හි බෞද්ධ විහාර පරිශ්රයේදී උතුරු අමෙරිකාවේ ප්රධාන සංඝනායක සහ වොෂින්ටන් බෞද්ධ විහාරයේ විහාරාධිපති මහරගම ධම්මසිරි නාහිමියන්ගේ අනුග්රහය යටතේ පැවති ‘ශ්රී ලංකාව නැවත ගොඩනැඟීම: ආහාර සල්පිල’ සංවිධාන කිරීමෙන් මේ අරමුදල එක්රැස් කරගෙන ඇතැයි විදේශ කටයුතු අමාත්යාංශය පවසයි.
ඒ අනුව මේ උත්සවයේ සම සංවිධායක සම්පත් ඇලෙක්සැන්ඩර් මහතා විසින් අමෙරිකාවේ ශ්රී ලංකා තානාපති මහින්ද සමරසිංහ මහතාට අදාළ මුදල නිල වශයෙන් පිළිගන්වා තිබේ. වාසනා රාජපක්ෂ, සමදරා ජයරත්න, ශානක ජයවර්ධන, තිලංක නිෂාඩ් මහත්ම මහත්මීන් ඇතුළු සංවිධායකයන්ද, අරමුදල් රැස්කිරීමේ අවස්ථාවට සහභාගි වූ සහ දායක වූ ශ්රී ලංකා ප්රජාවේ අනෙකුත් සාමාජිකයන්ද මේ අවස්ථාවට එක්ව ඇත.
එම මූල්ය පරිත්යාගය වොෂින්ටන් ඩී. සී. බෞද්ධ විහාරයේදී මහරගම ධම්මසිරි නාහිමියන් ඉදිරියේ සිදු විය. ශ්රී ලාංකේය ප්රජාවගේ ත්යාගශීලී දායකත්වයට තානාපතිවරයා ස්තූතිය පළ කර තිබෙන අතර, අමෙරිකා එක්සත් ජනපදය පුරා සිටින ශ්රී ලාංකේය සම්භවයක් ඇති අමෙරිකානුවන් තනි තනිව හෝ සාමූහිකව මේ අරමුදලට සැලකිය යුතු දායකත්වයක් දී ඇති බව සඳහන් කර තිබේ.
ඒ අනුව මේ ඩොලර් 10,000ක පරිත්යාගයත් සමඟ සමස්තයක් ලෙස අමෙරිකානු ඩොලර් 27,000ක් (රුපියල් 8,358,000) මේ වනවිට තානාපති කාර්යාලයට භාර දී ඇති බව තානාපති මහින්ද සමරසිංහ මහතා සඳහන් කර තිබෙන අතර, ශ්රී ලංකා මහ බැංකුව විසින් පිහිටුවන ලද ශ්රී ලංකාව නැවත ගොඩනැඟීමේ අරමුදලට එම මුදල බැර කිරීමට නියමිතව තිබේ.
මෑතකාලීන ව්යසනකාරී ගංවතුරෙන් පසු ශ්රී ලංකාව නැවත ගොඩනැඟීමට ත්යාගශීලී සහයෝගයක් දීම සම්බන්ධයෙන් ශ්රී ලංකා රජය වෙනුවෙන් තානාපති මහින්ද සමරසිංහ මහතා මහරගම ධම්මසිරි නාහිමියන්ට සහ එක්සත් ජනපදයේ ශ්රී ලාංකික ප්රජාවට සිය කෘතඥතාව පිරිනමා ඇත. ශ්රී ලාංකිකයන්ගේ අඛණ්ඩ කැපවීම වෙනුවෙන් තානාපතිවරයා ඔවුන්ට ප්රශංසා කර තිබෙන අතර, ඔවුන්ගේ ප්රශංසනීය උත්සාහයන් පවත්වා ගැනීමට දිරිමත් කර තිබේ.