නියෝජ්‍ය කථානායකවරයා ලෙස තමන් පාර්ලිමේන්තුවේ සිටි කාලයේදී භාවිත කළ නිල නිවෙස නීත්‍යනුකූලව රාජ්‍ය පරිපාලන හා ස්වදේශ කටයුතු අමාත්‍යාංශය වෙත භාර දී ඇති බව පාර්ලිමේන්තුවේ හිටපු නියෝජ්‍ය කථානායක අජිත් රාජපක්ෂ මහතා අවධාරණය කරයි.
තමා නිල නිවාසයේ සිටි කාලයට අදාළ සියලු විදුලි බිල්, ජල බිල් ගෙවා අවසන් කර අදාළ වාර්තා ඔක්තෝබර් මස 01 වැනිදා රාජ්‍ය පරිපාලන හා ස්වදේශ කටයුතු අමාත්‍යාංශයට භාර දී ඇති බවද හිටපු නියෝජ්‍ය කථානායක අජිත් රාජපක්ෂ මහතා පවසයි.
ඊට අමතරව ඔක්තෝබර් මස 01 වැනිදා දක්වා නිල නිවාසයට අදාළ කුලී මුදල ද සම්පූර්ණයෙන්ම ගෙවා අවසන් කර ඇති බව පාර්ලිමේන්තුවේ හිටපු නියෝජ්‍ය කථානායක අජිත් රාජපක්ෂ මහතා අවධාරණය කරයි.
අදාළ inventory (භාණ්ඩ ලේඛනය) පරීක්ෂා කිරීම සඳහා නිල නිවාසයේ යතුර ද භාර දී ඇති බව හිටපු නියෝජ්‍ය කථානායක අජිත් රාජපක්ෂ මහතා සිහිපත් කරයි.
එවැනි අවස්ථාවකදී තමා තවම නිල නිවාසය භාර දී නොමැති බවට ඇතැම් මාධ්‍ය ගෙන යන සාවද්‍ය ප්‍රචාරය තරයේ ප්‍රතික්ෂේප කරන බවත්, ඒ සම්බන්ධයෙන් තමා බලවත් ලෙස කනගාටුවට පත්වන බවත් ප්‍රකාශ කරන පාර්ලිමේන්තුවේ හිටපු නියෝජ්‍ය කථානායක අජිත් රාජපක්ෂ මහතා මෙම සාවද්‍ය පුවත නිවැරැදි කිරීමට කඩිනමින් කටයුතු කරන ලෙසද ඉල්ලීමක් කරයි.