අභිනව නිවහල් පෙරමුණේ නායකයා ලෙස පෙනී සිටිමින් කබානා ඉදිකිරීමේ ව්යාපෘතියක් වෙනුවෙන් මුදල් එකතු කර එම ව්යාපෘතිය ක්රියාත්මක නොකිරීම සම්බන්ධයෙන් මුදල් ලබාදුන් පුද්ගලයන් කළ පැමිණිලි මත අත්අඩංගුවට ගත් අමිත් වීරසිංහ නමැති අය රුපියල් කෝටි 10ක පමණ මුදලක් වංචා කර තිබෙන බව පොලිස් පරීක්ෂණ මඟින් අනාවරණය වී තිබෙන බව තෙල්දෙණිය පොලීසිය පවසයි.
ව්යාපෘතිය සඳහා මුදල් ආයෝජනය කළ පුද්ගලයන් 18 දෙනකු මේ වන විට පොලීසියට පැමිණිලි ඉදිරිපත් කර තිබෙන අතර අදාළ මුදල් මාස තුනක් තුළ පැමිණිලිකරුවන්ට යළි ලබා දීමට අමිත් වීරසිංහ මහතා අධිකරණයේ දී එකඟතාව පළකර තිබේ.
සිද්ධිය සම්බන්ධයෙන් තෙල්දෙණිය පොලීසිය මඟින් සැකපිට අත්අඩංගුවට ගත් අමිත් වීරසිංහ රක්ෂිත බන්ධනාගාරගත කර සිටි අතර ඊයේ (02) නඩුව කැඳවූ අවස්ථාවේ අදාළ මුදල් ගෙවන බවට ඔහු නීතිඥයින් මඟින් අධිකරණයට දැනුම් දී ඇත.
සෑම ඉරිදා දිනකම පෙරවරු 10.00ත් දහවල් 12.00ත් අතර තෙල්දෙණිය පොලීසියේ විශේෂ අපරාධ විමර්ශන ඒකකයේ පෙනී සිටින ලෙසද අධිකරණය මඟින් අමිත් වීරසිංහට නියෝග කර තිබේ.
විදෙස් ගමන් තහනමක්ද අධිකරණය මඟින් ඔහුට පනවා තිබෙන අතර අගෝස්තු මස 03 වැනි දින යළි නඩුව කැඳවීමට නියමිතය. මධ්යම පළාත් නියෝජ්ය පොලිස්පති සුදත් මාසිංහ මහතාගේ උපදෙස් මත තෙල්දෙණිය පොලිස් මූලස්ථානාධිපති ප්රධාන පොලිස් පරීක්ෂක එම්.ඩී. චන්ද්රපාල මහතා ඇතුළු කණ්ඩායමක් සිද්ධිය සම්බන්ධයෙන් විමාර්ශන සිදු කරයි.