ශ්රී ලංකාව ඉහළ මැදි ආදායම් ලබන රටක් ලෙස හඳුනා ගැනීමත් සමඟ ඉදිරියේදී ආයෝජන රටට ගලා ඒමේ ප්රවණතාව ඉහළ යෑමේ වැඩි හැකියාවක් පවතින බව පේරාදෙණිය විශ්වවිද්යාලයේ ආර්ථික හා සංඛ්යාන විද්යා දෙපාර්තමේන්තුවේ ජ්යෙෂ්ඨ මහාචාර්ය වසන්ත අතුකෝරාළ මහතා පවසයි.
අදාළ වර්ගීකරණය තුළ ඉහළ මැදි ආදායම් ලබන රටවල් කාණ්ඩයට අලුතින් ඇතුළත් කර ඇත්තේ රටවල් පහක් පමණක් බවත්, ශ්රී ලංකාව ස්වශක්තියෙන් නැඟීසිටීමට උත්සාහ කරන රටක් බවත් මේ තුළින් නිරූපණය වන බව ඒ මහතා පෙන්වා දුන්නේය. පේරාදෙණිය විශ්වවිද්යාලයේදී සිදු කළ මාධ්ය හමුවේ අදහස් දක්වමින් පසුගියදා (2) මහාචාර්යවරයා මේ බව පැවසූ අතර, හෙතෙම වැඩිදුරටත් මෙසේද කියා සිටියේය.
‘ශ්රී ලංකාව මේ වන විට ඉහළ මැදි ආදායම් ලබන රටක් ලෙස හඳුනාගෙන තිබෙනවා. අපි 1996 දක්වා හිටියේ පහළ ආදායම් ලබන රටක් ලෙසයි. නමුත් 1997 සිට 2017 දක්වා පහළ මැදි ආදායම් ලබන රටක් විදිහට ජාත්යන්තරය අපව හඳුනා ගත්තා. පසුව 2018දී ඉහළ මැදි ආදායම් ලබන රටක් බවට පත් වුණත් 2019දී නැවතත් අපි පහළ මැදි ආදායම් ලබන රටක් ලෙස හඳුනා ගත්තා. අනතුරුව 2024 දක්වාම අපි හිටියේ ඒ තත්ත්වයේයි. අපේ රටේ දළ දේශීය නිෂ්පාදනය ඩොලර් බිලියන 108 ඉක්මවා යාමක් පසුගිය වසරේදී අපි දකිනවා. මේ නිසා
ඒකපුද්ගල ආදායමේ සැලකිය යුතු වර්ධනයක් දක්නට ලැබුණා. දළ දේශීය නිෂ්පාදනය තුළ බිහිවන ඒකපුද්ගල ආදායම ඩොලර් 5,003ක් පමණ දක්වා වර්ධනය වීමක් දකින්න ලැබුණා. ලෝක බැංකුව මෙම ගණනය කිරීම් කරන්නේ අප විසින් ඒකපුද්ගල ආදායම ගණනය කරන ක්රමයට නෙවෙයි. ඔවුන් ‘ඇට්ලස්’ නම් වූ ක්රමය පදනම් කර ගනිමින් වෙනත් රටවල් සමඟ සිදු කරනු ලබන ගනුදෙනු, ඒවායෙහි බර තැබීම්, විනිමය අනුපාතිකයේ සිදුවන වෙනස්වීම් වගේම රටවල් අතර උද්ධමනය ආදී සියලු කරුණු කෙරෙහි අවධානය යොමු කරමින් තමයි ගණනය කිරීම සිදු කරන්නේ. ඒ අනුව අපේ ඒකපුද්ගල ආදායම ඩොලර් 4,670ක් විදිහට හඳුනාගෙන තියෙනවා. ඉහළ මැදි ආදායම් තත්ත්වයෙන් රටක් ලෙස හඳුනා ගැනීම සඳහා අවශ්ය වෙන්නේ ඒකපුද්ගල ආදායම ඩොලර් 4,635ක වගේ ප්රමාණයක්. අපේ එම අගය ඩොලර් 4,670ක අගයක තිබෙන නිසා අපි ඉහළ මැදි ආදායම් රටක් ලෙස හඳුනා ගැනීම සිදු කර තිබෙනවා. පසුගිය 2024 හා 2025 වසරවලදී අපි සියයට 5ක පමණ ආර්ථික වර්ධන වේගයක් ලබා ගත්තා. ලෝක බැංකුව කළ ගණනය කිරීමේ ක්රමවේදය අනුව 2024දී ඒකපුද්ගල ආදායම ඩොලර් 3,870ක පමණ අගයක් ගත්තා. මේක 2025 වන විට ඩොලර් 4,670ක් දක්වා වර්ධනය වෙනවා. ඒකපුද්ගල ආදායම ඩොලර් 800කින් පමණ ඉහළ ගොස් තිබෙන බවක් තමයි මේ අනුව පෙනී යන්නේ. මේ නිසා අපි ඉහළ මැදි ආදායම් ලබන රටක් ලෙස හඳුනාගෙන තිබෙනවා. මේ වර්ගීකරණය අනුව ලෝකයේ රටවල් 5ක් පමණයි ඉහළ මැදි ආදායම් ලබන කාණ්ඩයට අලුතින් ඇතුළත් කර තිබෙන්නේ. ඒ අතර පිලිපීනය, වියට්නාමය වැනි රටවල් ද තියෙනවා. ලංකාවත් ඒ තැනට පත්වීම ඉතා වැදගත් කාරණයක් ලෙස අපට හඳුනා ගන්න පුළුවන්.
‘ලෝකය තුළ රටක් ලෙස අපි ඉහළ මැදි ආදයම් ලබන රටක් බවට පත්වන විට ඇතැම් අවස්ථාවල සහන ණය අනාගතයේදී නොලැබී යෑමේ අවදානමක් ඇති විය හැකියි. වෙනත් රටවල් මඟින් කරන ආධාර අඩු වීමේ හැකියාවක් ද පවතිනවා. මේ තුළින් එවැනි දේත් සිදුවීමේ ප්රවණතාවක් පවතින බව අපි තේරුම් ගැනීම වැදගත්. අනෙක් පැත්තෙන් අපි ස්වශක්තියෙන් නැඟී සිටින බවක් මේ තුළින් නිරූපණය වෙනවා. අනුන්ගේ ආධාර මත අපට යැපෙන්න අවශ්ය නැහැ කියන පණිවිඩය ලෝකයට යනවා. ආයෝජකයන් අපේ රට කෙරෙහි දක්වන විශ්වාසය මේ ඔස්සේ ඉහළ යා හැකියි. මේ තුළින් රටට ආයෝජන ගලා ඒමේ වැඩි ප්රවණතාවක් ඇති විය හැකියි.’