කොළඹ බේරේ වැව සුරැකීමේ දැවැන්ත මෙහෙයුමක් රජය විසින් ආරම්භ කර ඇති අතර එහි ජලය දූෂණය වූ ස්ථාන 35ක් හඳුනා ගැනීමට ද පියවර ගෙන ඇත.
වසර ගණනාවක් අවිධිමත් නාගරීකරණය හා මිනිස් ක්රියාකාරකම් හේතුවෙන් දැඩි ලෙස අපවිත්ර වූ කොළඹ බේරේ වැව ප්රතිසංස්කරණය කර එහි ජලයේ ගුණාත්මකභාවය ඉහළ නැංවීමේ අරමුණින් මේ ව්යාපෘතිය ආරම්භ කර තිබෙන අතර ශ්රී ලංකා ඉඩම් සංවර්ධන සංස්ථාව, ශ්රී ලංකා වරාය අධිකාරිය ඇතුළු ආයතනය ගණනාවක සහය මෙයට හිමි වේ.
නගරයෙන් එකතු වන අපද්රව්ය, අපජලය සහ විවිධ කුණුකසළ වැවට එකතු වීම නිසා කාලයක් තිස්සේ බේරේ වැව අපවිත්ර වූ අතර, මෑතකාලීනව ඇල්ගී සහ සයනොබැක්ටීරියා ශීඝ්රයෙන් පැතිර යෑම හේතුවෙන් එහි ස්වාභාවික සෞන්දර්ය සම්පූර්ණයෙන්ම විනාශ වී තිබිණි. මෙම තත්ත්වය පරිසරයට මෙන්ම අවට ජීවත් වන ජනතාව සහ දිනපතා කොළඹ නගරයට පැමිණෙන ජනතාවට ද දැඩි සෞඛ්ය හා පාරිසරික බලපෑම් එල්ල කෙරිණි.
මේ සඳහා කඩිනම් විසඳුම් ලබාදීම වෙනුවෙන් බේරේ වැවේ අයිතිය සහ නඩත්තු කටයුතු භාර ශ්රී ලංකා වරාය අධිකාරිය සමඟ එක්ව, එහි ජලය නඩත්තු කිරීම සහ කළමනාකරණය කිරීමේ සෘජු වගකීම ශ්රී ලංකා ඉඩම් සංවර්ධනය කිරීමේ සංස්ථාව වෙත පවරා ඇත.
ඒ අනුව, ශ්රී ලංකා ඉඩම් සංවර්ධනය කිරීමේ සංස්ථාව විසින් බේරේ වැවේ ස්ථාන 35ක් ආවරණය වන පරිදි සිදු කරන ලද විශේෂ ජල සාම්පල පරීක්ෂාවකදී අනාවරණය වී ඇත්තේ, වැවේ ජලයේ නයිට්රජන්, පොස්පරස් සහ ඇමෝනියා වැනි අහිතකර රසායනික ද්රව්ය ඉතා ඉහළ මට්ටමක පවතින බවයි. එමෙන්ම ජලයේ ද්රාවිත ඔක්සිජන් ප්රමාණය (Dissolved Oxygen) ශීඝ්රයෙන් පහත හෙළන දූෂක ද්රව්ය රැසක් ද වැවට එකතු වී ඇති බව එම විද්යාත්මක පරීක්ෂණ මඟින් සනාථ වී තිබේ.
ඒ අනුව එහි පාවෙන කුණු සහ සුන්බුන් ඉවත්කිරීම. ආක්රමණශීලී ජලජ වල්පැළෑටි ඉවත් කර වැව් ඉවුරු පිරිසුදු කිරීම, ජලයේ තත්ත්වය නිරන්තරයෙන් නිරීක්ෂණය කරමින් දූෂණයට බලපාන මූලාශ්ර හඳුනා ගැනීම, ගංගාරාම විහාරස්ථානය ආසන්න නිරිතදිග බේරේ වැව් කලාපයේ වසර ගණනාවක් තිස්සේ එකතු වී ඇති රොන්මඩ ඉවත් කිරීමේ කටයුතු කඩිනම් කිරීම ඇතුළු ව්යාපෘති රැසක් මේ වන විට ක්රියාත්මක වේ.