ආගමික හෝ සංස්කෘතික ක්රියාකාරකම් සඳහා සතුන් යොදාගැනීමට හැකි නමුත්, එවැනි සතෙකුගේ කකුලට මුදුවක්, දම්වැලක් දමා ගෙල වටා සිරකිරීම, කම්බියකින් හිරකිරීම ඇතුළු කරුණු ගණනාවක් තහනම් කර දක්වමින් නව සත්ව සුබසාධන පනත ගැසට් මගින් ප්රකාශයට පත්කර ඇත.
අධික ලෙස ඇවිද්දවීම, බර පැටවීම, වධහිංසා පැමිණවීම, වේදනාවක් ඇතිවන පරිදි දම්වැලකින් හෝ ලණුවකින් බැඳ තබා ගැනීම හෝ සීමා කිරීම ද මෙම පනතින් තහනම් කර ඇත.
සත්වයන්ගේ ආරක්ෂාව වෙනුවෙන් සත්ව සුබසාධන උපදේශක කමිටුවක් පිහිටුවන අතර, ඊට නිලබලයෙන් පත්වන පුද්ගලයන් එකොළොස් දෙනකු සහ අදාළ අමාත්යවරයා විසින් පත් කරනු ලබන නියෝජිතයන් ද ඇතුළත්ය.
කෘෂිකර්ම, පශු සම්පත්, ඉඩම් හා වාරිමාර්ග ඇමැතිවරයාගේ නියමය පරිදි සකසා ඇති මෙම නව සත්ව පනත සකසා ඇත්තේ සත්වයන් කෙරෙහි කරුණාව, දයාව, නිසි සැලකිල්ල සහ සතුන්ගේ ආරක්ෂාව සහ සුබසාධනය, යහපැවැත්ම සුරක්ෂිත කිරීම වෙනුවෙනි.
සතුන් ප්රවාහනය, කොටුකර තැබීම, විකිණීම, පැටවුන් බෝකිරීම, ආහාර සැපයීම, ආරක්ෂාව ඇතුළු කරුණු ගණනාවක් සඳහා අවධානය යොමු කරමින් ඊට අදාළ ප්රතිපත්ති සකසා ඇති අතර, ඒවා කඩකර වැරදිකරුවන් වුවහොත් දඩ මුදල් පැමිණවීම, බන්ධනාගාරගත කිරීම සහ එම දෙකටම යටත් වන පරිදි ප්රතිපත්ති සකස් කර ඇත.
මෙම නව පනත යටතේ සත්වයන්ට ක්රෑර ලෙස සැලකීම, ක්රෑර ලෙස සත්වයන් මැරීම, ගර්භණී සත්වයන් මැරීම, උගුල් අටවා අල්ලා ගැනීම, පක්ෂීන් නීති විරෝධී ලෙස හිරකර තබා ගැනීම, රෝගාතුරවූ සතුන් පොදු ස්ථානවල මියයෑමට සැලසීම, සුදුසුකම් නැති අය සතුන්ට ප්රතිකාර කිරීම, නීති විරෝධී ලෙස වඳ භාවයට පත් කිරීම, විලවුන් ආදිය පරීක්ෂා කිරීමට යෙදවීම, විකිණීමේදී වේදනාවට පත්වන ලෙස තැබීම, දඩයම සඳහා තැබීම, හිංසාකාරී ප්රවාහනය, අවුරුදු 10 ට අඩු තැනැත්තෙකුට සතුන් විකිණීම, පොදු ස්ථානයක සතුන් විකිණීම ඇතුළු තවත් කරුණු නීතියෙන් දඬුවම් ලැබිය හැකි වැරදි බවට පත් කර තිබේ.
Source – Divaina(එරික් ගාමිණී ජිනප්රිය)