විදේශ ප්රේෂණ ලැබීමේ පවතින ධනාත්මක ප්රවණතාවය හමුවේ 2026 වසර අවසන් වන විට මෙරට විදේශ සංචිත ප්රමාණය ඇමරිකානු ඩොලර් බිලියන 9ක ඉලක්කය කරා සාර්ථකව රැගෙන යා හැකි බව මුදල් හා ක්රමසම්පාදන නියෝජ්ය අමාත්ය මහාචාර්ය අනිල් ජයන්ත ප්රනාන්දු මහතා පවසයි.
පාර්ලිමේන්තුවේදී අදහස් දක්වමින් නියෝජ්ය අමාත්යවරයා සඳහන් කළේ 2026 වසරේ ගතවූ මුල් මාස හත තුළ පමණක් විදේශගත ශ්රමිකයන්ගෙන් ඩොලර් බිලියන 5කට අධික ප්රේෂණ ප්රමාණයක් මෙරටට ලැබී ඇති බවයි.
රජය මෙම ඉලක්කයන් පිළිබඳව දැඩි විශ්වාසයකින් පසුවන බවද හෙතෙම අවධාරණය කළේය.
2028 වසරේදී ගෙවීමට ඇති දැවැන්ත විදේශ ණය වාරිකයන් සඳහා සූදානම් වීමේ අරමුණින් විදේශ විනිමය මූලාශ්ර විවිධාංගීකරණය කිරීමටත්, සෘජු විදේශ ආයෝජන (FDI) වැඩි වශයෙන් ආකර්ෂණය කර ගැනීමටත් රජය මේ වන විටත් සැලසුම් සකස් කරමින් සිටින බව නියෝජ්ය අමාත්යවරයා මෙහිදී පෙන්වා දුන්නේය.
විශේෂයෙන්ම 2028 අප්රේල් මාසයේදී පමණක් ඩොලර් බිලියන 3.9ක ණය මුදලක් ආපසු ගෙවීමට ශ්රී ලංකාවට සිදුවන බවද ඔහු සිහිපත් කළේය.
පාර්ලිමේන්තු මන්ත්රී රවි කරුණානායක මහතා යොමු කළ ප්රශ්නයකට පිළිතුරු දෙමින් මහාචාර්ය අනිල් ජයන්ත ප්රනාන්දු මහතා වැඩිදුරටත් කියා සිටියේ, සාම්ප්රදායික නොවන ක්ෂේත්ර ඔස්සේ විදේශ ආදායම් ඉහළ නැංවීමටත්, ජාත්යන්තර ශ්රම වෙළඳපොළේ ඉහළ වැටුප් සහිත රැකියා සඳහා ශ්රමිකයන් යොමු කිරීමටත් අවශ්ය මූල්ය උපායමාර්ග මේ වන විට ක්රියාත්මක වෙමින් පවතින බවයි.
ආයෝජන, අපනයන සහ ප්රේෂණ යන අංශ තුනම ශක්තිමත් කරමින් ශුද්ධ විදේශ විනිමය ගලා ඒම වැඩි කිරීම රජයේ ප්රමුඛතම අවධානයට ලක්ව ඇති බවද ඔහු සඳහන් කළේය.