පාක්ෂිකයන්ට පමණක් රැකියා දෙන සංස්කෘතිය වත්මන් රජය අවසන් කළ බව ප්රවාහන, මහාමාර්ග, වරාය සහ සිවිල් ගුවන්සේවා ඇමැති බිමල් රත්නායක මහතා පැවසීය.
ඇමැතිවරයා මේ බව පැවසුවේ මාර්ග සංවර්ධන අධිකාරියේ අනියම් කම්කරුවන්ට ස්ථිර පත්වීම් ලිපි ප්රදානය කිරීමේ උත්සවයට එක්වෙමිනි.
මෙහිදී උතුරු, නැඟෙනහිර ඇතුළු දිවයිනේ පළාත් නවයම නියෝජනය වන පරිදි සේවකයන් 704 දෙනකුට ස්ථිර පත්වීම් ලිපි පිරිනැමීම සිදු කළ අතර, 2017 වසරෙන් පසු අධිකාරියේ ස්ථිර සේවයට අන්තර්ග්රහණය වූ මේ සේවක පිරිස දිවයිනේ සෑම දිස්ත්රික්කයකම සේවයට සක්රිය දායකත්වය දෙනු ඇත.
අරලියගහ මන්දිරයේ මහජන ශ්රවණාගාරයේදී පෙරේදා (08) පැවති මේ උත්සවයට එක්වෙමින් ඇමැතිවරයා වැඩිදුරටත් මෙසේ ද කීවේය.
“පසුගිය රජයන් දේශපාලනය ප්රධාන කරගෙන රාජ්ය ආයතනවලට බඳවා ගැනීම් සිදු කළා. මාර්ග සංවර්ධන අධිකාරිය ඇතුළු රාජ්ය ආයතන කොතරම් දේශපාලනීකරණය වූවා දැයි රටම දන්නවා. බඳවා ගැනීම් කළ හැටි, ස්ථිර කළ හැටි, කෝටි ගණන් මුදල් නාස්ති කළ හැටි දන්නවා. 2024 සැප්තැම්බර් මස 21 වැනිදා ජනතාව ගත් අභීත, නිවැරදි තීන්දුව මේ රට වෙනස් ගමනකට යොමු කළා. පසුගිය රජයන් හෘද සාක්ෂියක් නැතුව, නපුරු දේශපාලන අරමුණු ඇතිව කටයුතු කළා. එම යුගය නිමා කර අදූෂිත පාලනතන්ත්රයක් යටතේ සමානාත්මතාවෙන් ක්රියා කරන පාලනයක් දැන් බිහිවී තිබෙනවා.
මාර්ග සංවර්ධන අධිකාරිය පසුගිය කාලයේ විවිධ වර්ගීකරණ යටතේ බඳවා ගැනීම් සිදු කර තිබෙනවා. සේවක අයිතිවාසිකම් වෙනුවෙන් මේ රජය කැප වෙනවා. දේශපාලන හේතු නිසා, පරිපාලන හේතු නිසා රැකියා අයිතියට හානිවෙන්න බෑ. රැකියාවේ ස්ථිරභාවය කියන්නේ ජීවිතය පිළිබඳ ස්ථාවරභාවයක් ඇතිකිරීම. අද එය සිදු කර තිබෙනවා. මේ නිසා ජීවිතයට සැලැස්මක් හදාගන්න පුළුවන් වෙලා තියෙනවා. මේ රටේ හිටපු සමහර පාලකයන් නරක, නපුරු වැඩ කළේ තනිවම නොවේ. ඒවාට ව්යාපාරික කොටස්, නිලධාරී කණ්ඩායම්, සේවක පිරිස් තම ෙහංචයියන් ලෙස යොදා ගත්තා.
පසුගිය සැප්තැම්බර් මස 21 වැනිදා ඒ නපුරු සංස්කෘතිය නැති කර දූෂණයෙන් තොරව වැඩ කරන්න, ජනතාවට වග කියන පාලනයකට ජනතාව වරම දුන්නා. ඒ අනුව පාක්ෂිකයන්ට පමණක් සැලකූ එදා සංස්කෘතිය මේ අදූෂිත පාලනය යටතේ අපි අවසන් කළා.”
මේ අවස්ථාවට ප්රවාහන හා මහාමාර්ග නියෝජ්ය ඇමැති, වෛද්ය ප්රසන්න ගුණසේන, වරාය සහ සිවිල් ගුවන් සේවා නියෝජ්ය ඇමැති, ඉංජිනේරු ජනිත රුවන් කොඩිතුවක්කු, ජාතික ජන බලවේගයේ කොළඹ දිස්ත්රික් පාර්ලිමේන්තු මන්ත්රී චන්දන සූරියආරච්චි, ප්රවාහන, මහාමාර්ග, වරාය හා සිවිල් ගුවන් සේවා අමාත්යාංශයේ ලේකම්, මහාචාර්ය කපිල සී. කේ. පෙරේරා, මාර්ග සංවර්ධන අධිකාරියේ සභාපති ටී. පාස්කරන්, අධ්යක්ෂ ජනරාල් විමල් කණ්ඩම්බි, නියෝජ්ය අධ්යක්ෂ ජනරාල් විමල් රාජපක්ෂ යන මහත්වරුන් ඇතුළු පිරිසක් එක්ව සිටියහ.