හිටපු සිවිල් ගුවන් සේවා ඇමැති පියංකර ජයරත්න මහතා විසින් අල්ලස් හෝ දූෂණ චෝදනා විමර්ශන කොමිෂන් සභාව වෙතින් කළ ඉල්ලීමක් එම කොමිසම විසින් ප්රතික්ෂේප කර තිබේ. තමන්ට එරෙහිව පවරන ලද අල්ලස් නඩුව වරද පිළිගැනීම හෝ අල්ලස් කොමිසම නියම කරන වෙනත් කොන්දේසි සම්පූර්ණ කිරීමේ එකඟතාව යටතේ ඉල්ලා අස්කර ගන්නා ලෙසයි ඔහු විසින් ඉලා සිටියේ.
එම ප්රතික්ෂේප කිරීම පිළිගත් මහාධිකරණ විනිසුරු රශාන්ත ගොඩවෙල මහතා පැමිණිල්ලේ සාක්ෂි විමසීමට නියෝග කළේය. හිටපු ජනාධිපති මහින්ද රාජපක්ෂ මහතාගේ පදවි ප්රාප්තිය නිමිත්තෙන් පවත්වන ලද ‘දැයට කිරුළ’ ප්රදර්ශනයේ ගෙවීමක් සම්බන්ධයෙනුයි හිටපු සිවිල් ගුවන් සේවා ඇමැති පියංකර ජයරත්න මහතාට එරෙහිව නඩු පවරා තිබුණේ. ඊට අදාළ නඩුවේ වැඩිදුර සාක්ෂි විභාගය ජූනි 30දා පැවැත්වීමට නියමිතයි.
මහාධිකරණ විනිසුරු රශාන්ත ගොඩවෙල මහතා ඉදිරියේ ඊයේ (06දා) පැමිණිල්ලේ 3 හා 4 සාක්ෂිකරුවන්ගේ සාක්ෂි විමසීම අවසන් විය. අල්ලස් හෝ දූෂණ විමර්ශන කොමිසමේ සහකාර අධ්යක්ෂ ජනරාල් තනූජා බණ්ඩාර මහත්මිය පැමිණිල්ල මෙහෙයවූ අතර ජනාධිපති නීතිඥ ශවේන්ද්ර ප්රනාන්දු මහතා විත්තිය වෙනුවෙන් පෙනී සිටියේය. අල්ලස් හෝ දූෂණ විමර්ශන කොමිසම විසින් පිංයකර ජයරත්න හිටපු ඇමැතිවරයාට විරුද්ධව තවත් නඩු 4ක් පවරා තිබේ.