මෙම වසරේ මුල් මාස පහ තුළ ශ්රී ලංකාවේ අපනයන ක්ෂේත්රය අමෙරිකානු ඩොලර් මිලියන 7,300 ඉක්මවූ සුවිශේෂි ආදායමක් වාර්තා කර ඇති බව අපනයන සංවර්ධන මණ්ඩලයේ සභාපති හා ප්රධාන විධායක නිලධාරි මංගල විජේසිංහ මහතා පැවසීය. අපනයන ප්රගතිය හා ඉදිරි ඉලක්ක පිළිබඳව දැනුවත් කිරීමට රජයේ ප්රවෘත්ති දෙපාර්තමේන්තුවේ ඊයේ (06) පැවති මාධ්ය හමුවට එක්වෙමින් ඔහු මේ බව සඳහන් කළේය.
මෙම අපනයන ආදායම සඳහා ප්රධාන වශයෙන් ඇඟලුම්, පොල් ආශ්රිත නිෂ්පාදන සහ රබර් කර්මාන්තය දායක වී ඇත. විශේෂයෙන්ම ශ්රී ලංකාවේ සමස්ත අපනයන ආදායමෙන් 30% සිට 32% දක්වා ප්රමාණයක් ඇඟලුම් කර්මාන්තය මඟින් හිමිකර දෙයි. 2026 වසරේ මුල් මාස පහ තුළ පමණක් එමඟින් අමෙරිකානු ඩොලර් මිලියන 2,063ක ආදායමක් උපයා තිබේ. ශ්රී ලාංකේය නිෂ්පාදිත ඇඟලුම් සඳහා අමෙරිකා එක්සත් ජනපදය ප්රධාන වෙළෙඳපොළයි.
එක්සත් රාජධානිය, ඉතාලිය, ජර්මනිය, නෙදර්ලන්තය සහ ඉන්දියාව රටවලට ද සැලකිය යුතු ප්රමාණයක් අපනයනය කෙරේ. රබර් හා රබර් ආශ්රිත නිෂ්පාදන ක්ෂේත්රය ද සැලකිය යුතු වර්ධනයක් පෙන්වයි. මෙම වසරේ මුල් මාස පහ තුළ එමඟින් ඩොලර් මිලියන 404ක ආදායමක් වාර්තා වී තිබේ. එය පසුගිය වසරේ අනුරූප කාලයට සාපේක්ෂව 5%ක වර්ධනයකි. එමෙන්ම පොල් තෙල් සහ පොල් කිරි වැනි වටිනාකම් එකතු කළ නිෂ්පාදන සඳහා ජාත්යන්තර වෙළෙඳපොළේ ඉහළ ඉල්ලුමක් පවතින බව සභාපතිවරයා පෙන්වා දුන්නේය.
අපනයන ක්ෂේත්රය තවදුරටත් ශක්තිමත් කිරීම සඳහා නව අපනයන සංවර්ධන සැලැස්මක් ද මේ වන විට එළිදක්වා ඇත. එහි ප්රධාන ඉලක්කය වන්නේ ඉදිරි වසර පහක කාලය තුළ අමෙරිකානු ඩොලර් බිලියන 8කට අධික අපනයන ආදායමක් උපයා ගැනීමයි. මේ සඳහා නවීන තාක්ෂණය භාවිත කරමින් දේශීය නිෂ්පාදන හැකියා වර්ධනය කිරීමටත්, ලෝක වෙළෙඳපොළේ පවතින ඉල්ලුම අනුව රබර් වැනි කර්මාන්ත ශක්තිමත් කිරීමටත් රජය විශේෂ අවධානයක් යොමු කර ඇත. මෙමඟින් රට තුළ විශාල රැකියා අවස්ථා ප්රමාණයක් බිහිකරමින් ශ්රී ලංකාවේ අපනයන ආර්ථිකය තවදුරටත් ස්ථාවර කිරීම රජයේ අපේක්ෂාව යැයි ද හෙතෙම වැඩිදුරටත් කීවේය.