මහනුවර ඇසළ පෙරහර මංගල්යයේ අවසන් රන්දෝලි මහ පෙරහර නැරඹීම සඳහා පනවා තිබෙන ඇතැම් ස්ථානවල ආසන මිල රුපියල් 40,000ක් දක්වා ඉහළ දමා තිබේ. මහනුවර ඇසළ පෙරහරේ අවසන් රන්දෝලි මහ පෙරහර අද (27) වීදි සංචාරය කරයි.
පෙරහර ශ්රී දළදා මාලිගාව අබියසින් රාත්රී 6.43ට උතුරු දිශාභිමුඛව පිටත්ව දළදා වීදිය, යටිනුවර වීදිය, කන්දේ වීදිය, ඩී.එස්. සේනානායක වීදිය ඔස්සේ ගමන් ගෙන රජ වීදියෙන් ඉහළටවිත් ගෙවදීමට නියමිතය.
මෙදින සධාතුක කරඬුව වැඩම කරන මංගල හස්ති රාජයා උඩුවියන් සහිතව පාවඩ මතින් ගමන් කිරීම විශේෂත්වයකි.
ශ්රී දළදා මාලිගාවේ පෙරහර ගෙවදීමෙන් පසු සධාතුක කරඬුව රැගත් පෙරහර මධ්යම රාත්රියේදී යළි ආදාහන මළුව ගෙඩිගේ රජ මහා විහාරස්ථානය දක්වා පැමිණ කරඬුව එහි තැන්පත් කරනු ලබයි.
අනතුරුව දේවාල පෙරහර හෙට (28) අලුයම ගැටඹේ තොට දක්වා ගමන් කර දිය කැපීමේ මංගල්යය පැවැත්වීමටත් පසුව දවල් පෙරහර හෙට (28) වීදී සංචාරය කිරීමටත් නියමිතය. මහනුවර මහ නගර සභාව මඟින් අවසන් රන්දෝලි මහ පෙරහර ක්වින්ස් කොරිඩෝවේ සිට නැරඹීම සඳහා ආසන පනවා තිබෙන අතර එහි පළමු පෙළ ආසනයක මිල නියම කර ඇත්තේ රුපියල් 28,000කටය.
එම ආසන සියල්ල විකිණී අවසන් බව නාගරික කොමසාරිස් ඉන්දිකා අබේසිංහ මහත්මිය පැවසුවාය. පෙරහර ආසන වැඩි මිලට අලෙවි කරන බවට තොරතුරු තමන්ටද ලැබී තිබෙන බවත් ආසන සම්බන්ධයෙන් මිල පාලනයක් කිරීමේ හැකියාව පෙරහර භාරයට නොමැති බවත් එහි සභාපති, ගඟවට කෝරළය ප්රාදේශීය ලේකම් අමිල නවරත්න මහතා පැවසීය.
ජනතාවට දරාගත නොහැකි ලෙස පෙරහර ආසන මිල ඉහළ දැමීම නතර කිරීම සඳහා මිල පාලන ක්රමයක් හඳුන්වාදීමේ දැඩි අවශ්යතාවක් තිබෙන බවත් ලබන වසරේ සිට එවැනි වැඩපිළිවෙළක් හඳුන්වාදීම සඳහා යෝජනා ඉදිරිපත් කිරීමට කටයුතු කරන බවත් ඒ මහතා කීය.
පෙරහර ගමන් කරන වීදි සියල්ල ඊයේ (26) දහවල් වනවිට ජනතාවගෙන් පිරී ඉතිරී ගොස් තිබුණු අතර ඇතැම් පිරිස් නගරයේ වීදිවල ඉටි රෙදි එළා ඉඩ අල්ලා ඒවා රුපියල් 3000 – 4000 වැනි මිල ගණන්වලට විකිණීමේ සිද්ධි ද පොලීසියට වාර්තා වී තිබිණි.
ඇතැම් ස්ථානවල රාජකාරියේ නිරත පොලිස් නිලධාරීන් ඔවුන්ගේ ඥාතීන් පෙරහර වීදිවලට යොමු කිරීම සම්බන්ධයෙන් ලැබුණු තොරතුරු මත ඉහළ නිලධාරීන් විසින් ඔවුන් ගෙන්වා අවවාද කර තිබෙන බවද දැනගන්නට ඇත.