ලංකා සීනි සමාගමේ 2020 – 2023 කාලයේ හිටපු ප්රධාන මෙහෙයුම් නිලධාරියකු තම වැටුපට අමතරව සමාගමේ අනුමැතියකින් තොරව දීමනා කිහිපයක් ලෙස ලබාගෙන ඇති රුපියල් ලක්ෂ 12කට අධික මුදල නැවත අය කර ගන්නා ලෙස ඒ සම්බන්ධයෙන් විමර්ශන කළ නිලධාරීන් සමාගමේ සභාපතිවරයාට නිර්දේශ කර තිබේ. මොහු මෙසේ වසර තුනක කාලයක් තුළ අනීතික ලෙස ලබාගෙන ඇති සම්පූර්ණ මුදල රුපියල් 1,222,867.91ක් වේ. ඔහු 2020.03.01 –
2023.02.28 දක්වා කාලයේ සීනි සමාගමේ සේවය කර ඇති අතර වැටුපට අමතරව මේ දීමනා ලබාගෙන ඇත්තේ සමාගමේ සභාපතිවරයාගේ හෝ මූල්ය මණ්ඩලයේ අනුමැතියකින් තොරවය.
අදාළ පුද්ගලයා මේ වනවිට සේවය අවසන් කර ඇති නමුත්, ආයතන සංග්රහයේ වගන්ති උල්ලංඝනය කරමින් නිසි අනුමැතියකින් තොරව ලබාගෙන ඇති මෙම මුදල් ඔහුගෙන් නැවත අය කරගත හැකි බව ද විමර්ශන නිලධාරීන් සිය නිර්දේශවලින් පෙන්වා දී තිබේ.
මෙහෙයුම් නිලධාරියාගේ සේවා කාලය තුළ හිමි වැටුප් හා දීමනාවලට අමතරව නිසි අනුමැතියකින් තොරව පෞද්ගලික දීමනා ලෙස රුපියල් 301,747ක මුදලක් ලබාගෙන ඇත. එමෙන්ම අනුමත සංග්රහ වියදමට වඩා රුපියල් 96,403.50ක මුදලක් සමාගමේ සභාපතිවරයා විසින් පරිහරණය කළ වියදම් සේ සලකා පැලවත්ත ඒකකයේ සමාජ ශාලාවේ වැය සංකේතවලට එකතු කර තිබේ. නිල නිවෙසේ වියදම් සඳහා තවත් රුපියල් 76,124ක මුදලක් සාවද්ය ලෙස පරිහරණය කර ඇත. පැලවත්ත නිල නිවෙසේ භාරකරු අනුමැතියකින් තොරව පෞද්ගලික නිවෙසේ සේවයට යොදා ගැනීම වෙනුවෙන් පැලවත්ත ඒකකයෙන් වැටුප් ලෙස එම සේවකයාට රුපියල් 383,838ක් හා අතිකාල ලෙස රුපියල් 143,632ක් ගෙවා ඇති අතර එහි එකතුව 51,7470ක් වේ. දුරකතන බිල්පත් හා අන්තර්ජාල පහසුකම් සඳහා අනුමත මුදලට වැඩියෙන් රුපියල් 123,823 ලබාගෙන ඇති අතර, විෂබීජ නාශක ලීටර 185ක් අනුමැතියකින් තොරව නිකුත් කිරීම වෙනුවෙන් ආසන්න රුපියල් 107,300ක් වැය කර තිබේ. මේ සියල්ලට ආයතනයෙන් රුපියල් 1,222,867.91ක මුදලක් ගෙවීම් කර ඇත.
මීට අමතරව ආයතනික නිෂ්පාදන විවිධ ආයතන හා පුද්ගලයන්ට පරිත්යාග කර ඇති බවත් පෙන්වාදෙන නිරීක්ෂකයන් එහි පිරිවැය ගණනය කර, එම මුදල ද අය කරගත යුතු බවත් සඳහන් කර තිබේ.
එසේම, හිටපු මෙහෙයුම් නිලධාරිවරයාට ආධාර අනුබල දුන් සෙසු නිලධාරීන් වන ආයතනයේ ජ්යෙෂ්ඨ ගණකාධිකාරි, නියෝජ්ය සාමාන්යාධිකාරි, ආගන්තුක නිවාස කළමනාකරු සම්බන්ධයෙන් ද ඉදිරි පියවර ගන්නා ලෙස එම නිර්දේශවල සඳහන් වේ.