අඩු ආදායම්ලාභී ලොතරැයිපත් අලෙවි සහයකයන්ගේ දරුවන් වෙනුවෙන් ජනාධිපති අරමුදලෙන් අධ්යාපනික ශිෂ්යත්ව පිරිනැමීමේ වැඩපිළිවෙළක් ආරම්භ කරයි. එහි සමාරම්භක වැඩසටහන කථානායක ජගත් වික්රමරත්න මහතාගේ ප්රධානත්වයෙන් උතුරු මැද පළාතෙන් ආරම්භ කෙරිණි.
අනුරාධපුර පළාත් සභා ශ්රවණාගාරයේදී පැවති මේ උත්සවයේදී උතුරු මැද පළාතේ ලොතරැයි අලෙවිකරණයේ යෙදෙන සහයකවරුන්ගේ දරුවන් 65 දෙනෙකු වෙනුවෙන් ශිෂ්යත්ව පිරිනැමිණි. ලොතරැයිපත් අලෙවියෙන් ජනාධිපති අරමුදලට ලැබෙන මූල්ය දායකත්වය අගය කරමින් ක්රියාත්මක වන මෙම වැඩසටහනෙන් දිවයිනේ සියලුම පළාත් ආවරණය වන පරිදි, 1 ශ්රේණියේ සිට උසස් පෙළ දක්වා ඉගෙනුම ලබන දරුවන්ට ශිෂ්යත්ව පිරිනැමේ.
ජනාධිපති අරමුදල වෙත අද ලැබෙන සෑම රුපියලකම ප්රතිලාභ, සහන ඇවැසි ජනතාවටම හිමි වන බව කථානායක වෛද්ය ජගත් වික්රමරත්න මහතා මෙහිදී පැවසීය. මෙම වසරේ (2026) ජනවාරි 01 සිට ජූනි 30 දක්වා මාස 6ක කෙටි කාලය තුළ 22,000ක් වන සංවර්ධන ලොතරැයි අලෙවි නියෝජිත ජාලය විසින් ජනාධිපති අරමුදල වෙනුවෙන් රුපියල් මිලියන 5,112ක අතිවිශාල මූල්ය දායකත්වයක් සපයා තිබෙන බව කථානායකවරයා සඳහන් කළේය.
මෙම අවස්ථාව මෙතෙක් තම ශක්තිය නොහඳුනාගෙන සිටි ලොතරැයි අලෙවිකරුවන් තම ශක්තිය රටට පෙන්වන අවස්ථාවක් බවත්, ඒ වෙනුවෙන් එම සියලුදෙනා වෙත ස්තුතිය පුද කරන බවත් පැවසීය.
“වසර 50ක ඉතිහාසයක් ඇති ජනාධිපති අරමුදල සැබෑ ලෙසම ජනතාවගේ අරමුදලක් බවට පත් වුණේ පසුගිය වසරේ සිටයි. අද එය ඩිජිටල්කරණය සමඟ ප්රාදේශීය ලේකම් කාර්යාල මට්ටමට විමධ්යගත වී තිබෙනවා. ජනාධිපති අරමුදල යනු තවදුරටත් කොළඹට සීමාවූ දුරස්ථ ආයතනයක් නොවන අතර, ජනතාවට ග්රාම නිලධාරිවරයා සහ ප්රාදේශීය ලේකම් කාර්යාලය මඟින් ඉතා පහසුවෙන් ළඟා විය හැකි සැබෑ ජනහිතකාමි සේවාවක් බවට පත් කර තිබෙනවා.
ශ්රී ලංකාව ලෝකයේ වේගයෙන්ම සංවර්ධනය වන රටක් බවට පත්කිරීමේ ජාතික මෙහෙවර තුළ සියලු දෙනා එකාවන්ව රැක බලාගනිමින් එකට එක්ව කටයුතු කරමුයි සියලු දෙනාට ආරාධනා කරනවා.” යැයිද කීවේය.
නිවාස ඉදිකිරීම් සහ ජල සම්පාදන ඇමැති වෛද්ය සුසිල් රණසිංහ මහතා, ජනාධිපති අරමුදලේ ලේකම් සහ ජනාධිපති ජ්යෙෂ්ඨ අතිරේක ලේකම් රෝෂන් ගමගේ යන මහත්වරු ද මෙහිදී කතා කළහ.
අනුරාධපුර දිස්ත්රික් පාර්ලිමේන්තු මන්ත්රීවරුන් වන සේන නානායක්කාර, පී.ඩී.එන්.කේ. පලිහේන, උතුරුමැද පළාත් ප්රධාන ලේකම් ජේ.එම්.ආර්.පී. ජයසිංහ මහත්වරුද, ජනාධිපති අරමුදලේ පාලක මණ්ඩල සාමාජික ජේ. ආර්. පී. ජයකොඩි, සංවර්ධන ලොතරැයි මණ්ඩලයේ සභාපති/ ප්රධාන විධායක නිලධාරි එම්.ආර්.එච්.ස්වර්ණතිලක, ජාතික ලොතරැයි මණ්ඩලයේ සභාපති එම්.ඩී. සිරිල් ඇන්තනී පෙරේරා මහත්වරු සහ පළාතේ රාජ්ය නිලධාරීහු, උතුරු මැද පළාත් ජ්යෙෂ්ඨ නියෝජ්ය පොලිස්පති සහ ආරක්ෂක අංශ ප්රධානීහු ඇතුළු පිරිසක්ද මෙම අවස්ථාවට එක්ව සිටියහ.