ශ්‍රී ලංකා රේගුව විසින් නිකුත් කරන ලද තාවකාලික දත්තවලට අනුව, 2024 ජුනි මාසයේදී වෙළඳ භාණ්ඩ අපනයන කාර්ය සාධනය ඇමෙරිකානු ඩොලර් මිලියන 1,031.2 ක් වූ අතර, එය 2023 ජුනි මාසයට සාපේක්ෂව 2.58% ක වර්ධනයක් වාර්තා කළේය. මෙයට ප්‍රධාන වශයෙන් හේතු වූයේ ඇඟලුම් සහ රෙදිපිළි, තේ, රබර් ආශ්‍රිත නිෂ්පාදන, පොල් ආශ්‍රිත නිෂ්පාදන, ආහාර පාන, කුළුබඩු සහ සාන්ද්‍ර ආශ්‍රිත නිෂ්පාදන අපනයන ඉපැයීම් ඉහළ යාමයි.
තවද, 2024 මැයි මාසයට සාපේක්ෂව 2024 ජුනි මාසයේ අපනයන කාර්ය සාධනය 1.97% කින් වැඩි විය. 2024 ජුනි මාසය සඳහා සේවා අපනයනවල ඇස්තමේන්තුගත වටිනාකම ඇමෙරිකානු ඩොලර් මිලියන 323.13 ක් වූ අතර එය 2023 ජුනි මාසයට වඩා 39.05% කින් වැඩි විය. එහි ප්‍රතිඵලයක් වශයෙන්, 2024 ජුනි මාසය සඳහා වෙළඳ භාණ්ඩ සහ සේවා යන දෙකම ඇතුළුව මුළු අපනයනය, 2023 අනුරූප කාලපරිච්ඡේදය හා සැසඳීමේදී 9.42% කින් ඉහළ ගොස්, ඇමෙරිකානු ඩොලර් මිලියන 1,354.32 ක අගයක් වාර්තා කළේය.
ශ්‍රී ලංකා අපනයන සංවර්ධන මණ්ඩලය විසින් නිකුත් කළ නවතම වාර්තාවක මේ බව සඳහන් වේ.
