භික්ෂුවක් වරදක් කළොත් මේ සමාජයේ මුළු භික්ෂු සමාජයම කනපිට ගහන්න ඇතැමුන් ක්රියා කරන බව ඉත්තෑකන්දේ සද්ධාතිස්ස හිමියෝ ගාල්ලේ කච්චිවත්ත දීපදුත්තාරාමයේ පැවති රැස්වීමක දී පෙරේදා (18) පැවසූහ.
ශ්රී ලංකා පොදුජන පෙරමුණේ ගාල්ල දිස්ත්රික් භික්ෂු සංවිධානය ආරම්භ කිරීමේ අවස්ථාවට එක්වෙමින් සද්ධාතිස්ස හිමියෝ මේ බව පැවසූහ.
එහිදී සද්ධාතිස්ස හිමියෝ මෙසේ ද කීහ.
“සමහරු හිතාගෙන ඉන්නවා භික්ෂූන් වහන්සේලා කන්න නැතිව මහණ කරපු අය කියලා. ඔව්, අපි කන්න නැතිව ගෙනත් දාපු අය. හැබැයි අපි කන්න නැතිව ගෙනත් දැම්මත් දන් වළඳා නිකන් හිටියේ නැහැ. රට ගොඩනඟන කාර්යයේ සහ රට ආරක්ෂා කරන කාර්යය කළා මිසක් රටට අහිතකර දේවල් කර නැහැ.
අපි එක එල්ටීටී කාරයො එක්කවත් ෆොටෝ අරගෙන නැහැ. නවාතැනක් දී නැහැ. අනුග්රහය දක්වා නැහැ. ඒක අපේ හයිය හාමුදුරුවනේ. ඒ නිසා අපට වගකීමක් තිබෙනවා මේ රට වෙනුවෙන් යමක් කරන්න. ඒකයි භික්ෂුවට පහර දෙන්නේ. නිරාගමිකයන් භික්ෂුවට පහර දෙනවා. ඇයි භික්ෂුවට පහර දෙන්නේ. භික්ෂුවට ගහලා සංස්කෘතිය ඒ අයගේ දේවල් කරගන්න ලේසියි. රජුන් තනන්නේ භික්ෂුව නම් ඒ භික්ෂුව විනාශ කළාම රජුන් තනන්න බැරි වෙන්නයි එහෙම කරන්නේ. ඒ නිසා හාමුදුරුවනේ අපට නොයෙක් කතා කියමින් භික්ෂුව වට්ටන්න පුළුවන්නම් ඒ වට්ටන්න පුළුවන් හැම තැනකම වට්ටනවා.
කවුරුහරි හාමුදුරු කෙනෙක් වරදක් කළොත් මේ සමාජයේ මුළු භික්ෂු සමාජයම කනපිට ගහන්න හදනවා. පසුගිය කාලේ කිව්වා පන්සලට යන්න එපා.දන් දෙන්න එපා කියලා. ෆේස්බුක්වල ගැහුවා, යූ ටියුබ්වල ගැහුවා, දන් දෙන්න එපා කියලා. හැබැයි අපේ මිනිස්සු ඒ දෙන්න එපා කිව්වට පස්සෙ වැඩි වැඩියෙන් දන් දුන්නා. ඒක තමයි බෞද්ධයාගේ හැටි. මේ සිංහලයාගේ හැටි එහෙමයි හාමුදුරුවනේ. අපි කවදාවත් වැටෙන්නේ නැහැ. භික්ෂුව වට්ටන්නත් අමාරුයි. තළන්න බැහැ. කවදාවත් භික්ෂුව කියන්නේ තළන්න තළන්න මුවහත් වන ජාතියක්. ඒක නිසා මිනිස්සු හිතාගෙන ඉන්නවා නම් අපට ගහල වට්ටන්න, අපි වැටෙන්නේ නැහැ. ඒ ගහන එකාට හැරිලා අපි ගැහුවොත් උන්ට දුවන්න පාරවල් මදි. අපි හැමදාම කළේ රට වෙනුවෙන් සිට ගැනීමයි.