ත්රිකුණාමලය තෙල් ටැංකි සංකීර්ණය සංවර්ධනය කිරීමේ මීළඟ අදියර යටතේ තෙල් ටැංකි 29 ක් ප්රතිසංස්කරණය කිරීම සහ නව තෙල් නල මාර්ගයක් ඉදිකිරීමේ කටයුතු ඉදිරි වසර දෙක ඇතුළත නිම කිරීමට ලංකා ඛනිජ තෙල් සංස්ථාව බලාපොරොත්තු වේ.
The Sunday Morning පුවත්පත කළ විමසීමකට පිළිතුරු දෙමින් ලංකා ඛනිජ තෙල් සංස්ථාවේ කළමනාකාර අධ්යක්ෂ ආචාර්ය මයුර නෙත්තිකුමාරගේ සඳහන් කර ඇත්තේ, අදාළ තෙල් ටැංකි 29 සඳහා වන යෝජනා කැඳවීමේ ලේඛන මේ වන විට සූදානම් කර ඇති අතර, ඒ සඳහා ප්රසම්පාදන කමිටුවල අනුමැතිය ලැබෙන තෙක් සිටින බවයි.
“අපි වසර දෙකක් ඇතුළත මෙම ටැංකි 29 සංවර්ධනය කිරීමට බලාපොරොත්තු වෙනවා. යෝජනා කැඳවීමේ ලේඛන සඳහා අනුමැතිය හිමිවූ වහාම අපි ඒවා ප්රසිද්ධ කරනවා,” යැයි ද ඔහු පවසයි.
වර්තමානය වන විට ඛනිජ තෙල් සංස්ථාව විසින් තෙල් ටැංකි දෙකක ප්රතිසංස්කරණ කටයුතු අවසන් කර ඇති අතර, තවත් තෙල් ටැංකි තුනක් අලුත්වැඩියා කිරීම සඳහා ටෙන්ඩර් කැඳවා ඇත.
ආචාර්ය නෙත්තිකුමාරගේට අනුව, මෙම සංකීර්ණයේ ඇති සමස්ත තෙල් ටැංකි 99 අතුරින් ටැංකි 61 ක හිමිකාරිත්වය ශ්රී ලංකාව සහ ඉන්දියාව එක්ව පිහිටුවා ගත් Trinco Petroleum Terminal Ltd. සමාගම සතුවන අතර, ටැංකි 24 ක් ලංකා ඛනිජ තෙල් සංස්ථාව සතුවේ. ඉතිරි තෙල් ටැංකි 14 හිමිකාරිත්වය LIOC සමාගම සතුවේ.
යෝජිත නව තෙල් නල මාර්ගය ලංකා ඛනිජ තෙල් සංස්ථාව මගින් ඉදිකිරීමට නියමිත අතර, එයද වසර දෙකක කාලයක් ඇතුළත නිම කිරීමට අපේක්ෂා කරන බව ආචාර්ය නෙත්තිකුමාරගේ වැඩිදුරටත් සඳහන් කරයි.
ත්රිකුණාමලය වරාය, තෙල් ටැංකි සංකීර්ණය, නව නල පද්ධතිය සහ චීන වරාය ගුවන්තොටුපළ යන ස්ථානයන්හි සංවර්ධන කටයුතු නිරීක්ෂණය කිරීම සඳහා වරාය, සිවිල් ගුවන්සේවා සහ බලශක්ති අමාත්ය අනුර කරුණාතිලකගේ ප්රධානත්වයෙන් විශේෂ නිරීක්ෂණ චාරිකාවක්ද සංවිධානය කර තිබිණි.
මෙම සංවර්ධන ව්යාපෘති මගින් ශ්රී ලංකාවේ බලශක්ති ආරක්ෂණභාවය තහවුරු වන අතර ඉන්ධන ගබඩා කිරීමේ සහ බෙදාහැරීමේ ධාරිතාව ඉහළ යනු ඇතැයි අපේක්ෂා කෙරේ.