රජයේ ප්රසම්පාදන ක්රියා පටිපාටියෙන් බැහැරව නීත්යනුකූල නොවන ව්යාපෘති කිරීම තුළින් හිටපු ඇමැති රංජිත් සියඹලාපිටිය විසින් රාජ්ය මුදල් රුපියල් 62,340,233ක් වංචා කිරීම පිළිබඳ සාපරාධී ලෙස පරිහරණය කර ඇති බවට අල්ලස් හෝ දූෂණ චෝදනා විමර්ශන කොමිෂන් සභාව වෙත පැමිණිල්ලක් ලැබී තිබේ.
නාස්තිය, දූෂණයට එරෙහි පුරවැසි බලය සංවිධානය විසින් කොමිසම වෙත මෙම පැමිණිල්ල යොමු කර තිබේ.
2013 අම්පාර හාඩි විද්යාලයේ පැවති දැයට කිරුළ ජාතික ප්රදර්ශනයේ මුදල්වලින් අරන්තලාව භික්ෂු ස්මාරකය ඉදි කිරීම සඳහා රුපියල් 12,500,000ක් ඇමැති රංජිත් සියඹලාපිටිය විසින් වංචනිකව ලබා ගෙන ඇතැයි එම පැමිණිල්ලේ සඳහන් කර ඇත.
එසේම අම්පාර හාඩ් විද්යාලයේ පැවති දැයට කිරුළ ජාතික ප්රදර්ශනයේදී ප්රදර්ශන භූමියෙන් පිටත ඝන අපද්රව්ය කළමනාකරණය සඳහා ඇමැති සියඹලාපිටිය විසින් රු.14,000,000ක් රජයේ මුදල් අනීතිකව වංචා කර ලබාගෙන ඇති බවත් 2012 අනුරාධපුර දැයට කිරුළ ප්රදර්ශන භූමියේ සමරු ඵලකය ඉදිකිරීම තුළින් රජයේ මුදල් රුපියල් 8,226,400ක් ඇමැති රංජිත් සියඹලාපිටිය විසින් වංචනිකව ලබාගෙන සාපරාධී පරිහරණය කර ඇති බවත් එහි දක්වා ඇත.
2012 අනුරාධපුර දැයට කිරුළ ප්රදර්ශනයේ තිබූ බීච් වොල්බෝල් තරග සඳහා වැලි සැපයීම යටතේ ඇමැති රංජිත් සියඹලාපිටිය විසින් රු.2,217,600ක මුදලක් අයුතු ලෙස වංචා කර ඇති බව ද දක්වා ඇත. 2012 අනුරාධපුර දැයට කිරුළ ප්රදර්ශනයේදී මාධ්ය කලාපයේ කුටි වායු සමීකරණය කිරීම ආවරණය කිරීම තුළින් ඇමැති රංජිත් සියඹලාපිටියගේ සෘජු මැදිහත්වීමෙන් රජයේ මුදල් රුපියල් 9,078,104ක් වංචා කර ඇති බවද දක්වා ඇත. 2012 අනුරාධපුර දැයට කිරුළ ප්රදර්ශනයේ රැස්වීම ශාලාව හා මඩුවක් ඉදිකිරීම හා වායුසමීකරණය කිරීම නිසා රජයට අත් වූ පාඩුව රුපියල් 7,708,858කි. 2012 අනුරාධපුර දැයට කිරුළ ප්රදර්ශනයේ පෝලින් සකස් කිරීමට බට සැපයීම වෙනුවෙන් රජයේ මුදල් 8,602,271ක් වැය කර ඇතැයිද එම සංවිධානය යොමු කර ඇති පැමිණිල්ලේ සඳහන් කර තිබේ.
ඉහත සඳහන් රාජ්ය මුදල් වංචනික ලෙස අත්පත් කරගෙන දූෂණය නම් වරද සිදු කර ඇති බව පෙනී යන බව කියවේ. රාජ්ය නිලධාරීන්, දේශපාලන අධිකාරිය හා අනෙකුත් පිරිසට එරෙහිව නීතිය ක්රියාත්මක කර එම රාජ්ය මුදල් නැවත අය කර ගන්නා ලෙස එම සංවිධානය අල්ලස් කොමිසමෙන් ඉල්ලා ඇත.