ශ්රී ලංකාවේ බෝට්ටු නිෂ්පාදන කර්මාන්තය නව විදේශ විනිමය උපයන ප්රධාන ආර්ථික ක්ෂේත්රයක් බවට පත් කිරීමට රජය අවධානය යොමු කර ඇති බව කර්මාන්ත හා ව්යවසායකත්ව සංවර්ධන ඇමැති සුනිල් හඳුන්නෙත්ති මහතා පැවසීය.
බේරුවලදී ඉදිවූ මෙරට පළමු බෝට්ටු ක්රියාත්මක කිරීමේ අංගණය විවෘත කිරීමේ උත්සවයට පසුගියදා (11) එක්වෙමින් ඇමැතිවරයා මේ බව සිහිපත් කළේය.
ශ්රී ලංකාවේ අනාගත ආර්ථික සංවර්ධන ක්රියාවලියේ ප්රමුඛතම අපනයන ක්ෂේත්රයක් ලෙස හඳුනාගෙන ඇති බෝට්ටු නිෂ්පාදන කර්මාන්තයේ ප්රවර්ධනය උදෙසා ඉදිකළ මෙරට පළමු බෝට්ටු ක්රියාත්මක කිරීමේ අංගණය (Boat Launching Ramp) මෙයයි.
රුපියල් මිලියන 76ක පිරිවැයකින් බේරුවල ධීවර වරාය අසල මේ අංගණය ඉදි කර තිබේ.
මෙරට නිෂ්පාදනය කරන බෝට්ටු ක්රියාත්මක කිරීම සඳහා පවතින අවශ්යතාව සලකා බලමින් කර්මාන්ත හා ව්යවසායකත්ව සංවර්ධන අමාත්යාංශය මේ ව්යාපෘතිය ක්රියාත්මක කර ඇත . බෝට්ටු හා බෝට්ටු ආශ්රිත නිෂ්පාදන කර්මාන්තය ශ්රී ලංකාවේ ඉදිරි ආර්ථික සංවර්ධනයේ අත්යවශ්ය අංගයක් ලෙස හඳුනාගෙන ඇති බැවින් මේ නව පහසුකම මඟින් එම කර්මාන්තයට විශාල දායකත්වයක් ලැබෙනු ඇතැයි අපේක්ෂා කෙරේ.
මෙතෙක් බෝට්ටු නිෂ්පාදකයන්ට තම නිෂ්පාදන මුහුදට ක්රියාත්මක කිරීම සඳහා ධීවර වරායන් මත යැපීමට සිදුවූ නමුත්, නව ක්රියාත්මක කිරීමේ මධ්යස්ථානය හරහා ගැටලුවට ස්ථිර විසඳුමක් ලැබෙන බවත් ඇමැතිවරයා ප්රකාශ කළේය. එමෙන්ම මේ පහසුකම බෝට්ටු නිෂ්පාදකයන්ට පමණක් නොව සංචාරක කර්මාන්තයට සහ පෞද්ගලික බෝට්ටු හිමියන්ට ද ප්රයෝජනවත් වන බව ඔහු පෙන්වා දුන්නේය.
බෝට්ටු මහාමාර්ග ඔස්සේ ප්රවාහනය කිරීමේදී විශාල වියදම් සහ ප්රායෝගික ගැටලු රැසක් මතුවන බව පෙන්වා දුන් ඇමැතිවරයා, එම නිසා ක්රියාත්මක කිරීමේ මධ්යස්ථාන ආශ්රිතව බෝට්ටු නිෂ්පාදන කර්මාන්තශාලා ස්ථාපිත කිරීමට පියවර ගත යුතු බව අවධාරණය කළේය.
ශ්රී ලංකාවේ බෝට්ටු නිෂ්පාදන තාක්ෂණය මේ වන විට ජාත්යන්තර වෙළෙඳපොළෙහි තරගකාරී මට්ටමකට පැමිණ ඇති බව පැවසූ ඇමැතිවරයා, මෙරට නිෂ්පාදිත බෝට්ටු මොරිෂස් ඇතුළු රටවල් වෙත අපනයනය කෙරෙන අතර තවත් විදේශීය ඉල්ලුම් ද ඉහළ යමින් පවතින බව සඳහන් කළේය.
මේ ව්යාපෘතියට රුපියල් මිලියන 76ක ආයෝජනයක් කර තිබුණද එය වියදමක් නොව රටට විදේශ විනිමය උපයා දෙන ආයෝජනයක් ලෙස සැලකිය යුතු බව ද ඔහු පැවසීය. 2030 වන විට අමෙරිකානු ඩොලර් බිලියන 36ක අපනයන ආර්ථිකයක් කරා ළඟාවීමේ ජාතික ඉලක්කය සපුරා ගැනීමට මෙවැනි ව්යාපෘති අත්යවශ්ය බව ද ඇමැතිවරයා අවධාරණය කළේය.
ධීවර හා කර්මාන්ත අමාත්යාංශ එක්ව ක්රියාත්මක කළ මේ ව්යාපෘතිය, ශ්රී ලංකාවේ නාවික නිෂ්පාදන කර්මාන්තයේ නව පරිච්ඡේදයක් ආරම්භ කරන අතර, ඉදිරියේදී බෝට්ටු නිෂ්පාදනයෙන් ඔබ්බට ගොස් ‘Made in Sri Lanka’ නාමයෙන් කුඩා හා මධ්ය පරිමාණ නැව් නිෂ්පාදනය දක්වා රට ගෙන යා හැකි බවත් ඇමැතිවරයා වැඩිදුරටත් සඳහන් කළේය.
කර්මාන්ත හා ව්යවසායකත්ව සංවර්ධන අමාත්යාංශයේ ලේකම් තිලකා ජයසුන්දර මහත්මිය ඇතුළු පිරිසක් මේ අවස්ථාවට එක්ව සිටියහ.