ජනාධිපති නීතිඥ මෛත්රී ගුණරත්න මහතා ලංකා ගල්අඟුරු සමාගමේ සභාපතිවරයාව සිටි 2015-2016 කාලයේ නොරොච්චෝලේ ලක්විජය බලාගාරයට ගල්අඟුරු මිල දී ගැනීමේදී මෙරටට අමෙරිකානු ඩොලර් 1,575,630ක පමණ පාඩුවක් සිදුව ඇතැයි ගල්අඟුරු ගනුදෙනු සහ එයින් විදුලිය උත්පාදනයේදී වංචා, දූෂණ සිදුවී ඇතිදැයි විමර්ශනය කෙරෙන විශේෂ ජනාධිපති කොමිසමේදී පෙරේදා (8) හෙළිදරවු විය.
ගල්අඟුරු ආනයනය සම්බන්ධයෙන් ලංකා ගල්අඟුරු සමාගම සහ ලිබර්ටි කොමොඩාටීස් සමාගම අතර මුලින් ඇති කරගත් ගිවිසුමේ කොන්දේසි පසුව වෙනස් කිරීම හේතුවෙන් මෙම අලාභය සිදුව ඇතැයි විදුලිබල හා පුනර්ජනනීය බලශක්ති අමාත්යාංශයේ හිටපු අතිරේක ලේකම් ඩී. අමරතුංග මහතා කොමිසම හමුවේ සාක්ෂි දෙමින් කියා සිටියේය.
ලක්විජය බලාගාරයට ගල්අඟුරු සැපයීමේදී සම්පූර්ණ කළ යුතු තාක්ෂණික තත්ත්වයන් හා ප්රමිතීන් නොතිබුණහොත් සැපයුම්කාර පාර්ශ්වයෙන් අය කළ හැකිව තිබූ දඩ මුදල ගණනය කිරීමේ සූත්රය ලංසු ලේඛනයේ තිබුණාට වඩා වෙනස් කිරීම විශාල ගැටලුවක් යැයි මෙහිදී සාක්ෂිකරු වැඩිදුරටත් විස්තර කළේය.
එමඟින් සැපයුම්කරුට වාසිදායක තත්ත්වයක් ඇති වීමෙන් මෙම පාඩුව සිදු වී තිබුණු අතර ඒ අනුව මෙයින් ගල්අඟුරුවල ගුණාත්මක බවට සහ මිල ගැළපීම්වලට දැවැන්ත බලපෑමක් වී ඇතැයි හිටපු අතිරේක ලේකම්වරයා පෙන්වා දුනි.
මේ අනුව ලංසු කෙටුම්පතෙහි ගල්අඟුරුවල අඩංගු සල්ෆර් ප්රතිශතයට අදාළව මිල අඩු කිරීම 0.1%ක් වශයෙන් සඳහන් කෙරුණ ද එය අවසන් ගිවිසුමේදී 10%ක් වශයෙන් වෙනස් කිරීමෙන් මෙම බරපතළ ගැටලුව ඉස්මතු වී තිබිණි. ගල්අඟුරුවල අඩංගු අළු සම්බන්ධයෙන් ද එවකට වෙනසක් කර ඇති අතර ඒ අනුව ගල්අඟුරුවල ප්රමිතියේ ගැටලු මතුවුවහොත් සැපයුම්කරුගෙන් අය කළ හැකි වූ දඩ මුදල අතිශයින් පහළ අගයක් ගන්නා ලදැයි සාක්ෂිකරු පැවසීය.
ගල්අඟුරු ආනයනයේදී රජයට පාඩු නොවන්නට තිබූ විශාල ආරක්ෂාවක්, රැකවරණයක් මෙයින් වැළකී තිබුණු බවට සාක්ෂිකාර හිටපු අතිරේක ලේකම්වරයා කොමිසම හමුවේ අවධාරණය කළේය. එය එසේ නොවීමෙන් ක්ෂණික ගල්අඟුරු මිලදී ගැනීම් වාර 3කදී ඉකුත් 2015-2016 කාලයේදී සැපයුම්කාර ලිබර්ටි කොමොඩාටීස් සමාගමට වැඩිපුර අමෙරිකානු ඩොලර් මිලියන 1.57කට වැඩි මුදලක් ගෙවා තිබුණු බවද කීය.
මේ පිළිබඳ විශේෂ ලිපියක් හෙට පත්රයේ පළවේ