ලෝක වාර්තාවක් අලුත් කරමින් 52 හැවිරිදි පුද්ගලයකුගේ වකුගඩුවෙන් කිලෝ 3.1ක් බරැති දැවැන්ත වකුගඩු ගලක් සාර්ථකව ඉවත් කිරීමට ත්රිකුණාමලය මහ රෝහලේ වෛද්යවරු සමත්ව තිබේ.
වෛද්ය විද්යා ඉතිහාසයේ මෙතෙක් වාර්තා වී තිබූ බරම වකුගඩු ගල පිළිබඳ වාර්තාව සම්පූර්ණයෙන්ම උඩුයටිකුරු කරමින් මෙරට වෛද්ය ක්ෂේත්රය අත්කරගත් මෙම සුවිශේෂී ජයග්රහණය ජාතික හා ජාත්යන්තර මට්ටමින් ත්රිකුණාමලය රෝහල හා ශල්යකර්මය සිදු කළ වෛද්ය කණ්ඩායම පිළිබඳව දැඩි කතාබහට ලක්ව ඇති ප්රධානපෙළේ සිදුවීමක් බවට පත්ව ඇත.
මෙම අතිශය සංකීර්ණ හා විස්මිත ශල්යකර්මය ත්රිකුණාමලය මහ රෝහලේ වකුගඩු ශල්ය වෛද්ය විශේෂඥ ප්රගලාදන් බාලක්රිෂ්ණන් මහතාගේ ප්රධානත්වයෙන් නිර්වින්දන වෛද්ය විශේෂඥ අමිල ජයකොඩි, වෛද්යවරුන් වන එම්.එම්. රිෂ්ලි, ජේ.එම්. ඉහ්සාන්, සී. ප්රගලාදන් යන මහත්වරු ඇතුළු කාර්ය මණ්ඩලයක සහභාගිත්වයෙන් සාර්ථකව නිම කරන ලදි.
මීට පෙර 2003 වසරේ බ්රසීලයෙන් වාර්තා වී තිබූ කිලෝ 1.9ක බරින් යුත් ලොව විශාලතම වකුගඩු ගලේ වාර්තාව අබිබවා යමින්, මෙවර කිලෝ 3යි ග්රෑම් 100ක් ලෙස වාර්තා වූ මෙම දැවැන්ත ගල ඉවත් කිරීම ශ්රී ලංකාවේ සෞඛ්ය අංශය ඉහළට ඔසවා තැබීමට සමත් වූ සුවිශේෂී සන්ධිස්ථානයකි.
ශ්රී ලංකාවේ රෝහල් පද්ධතියේ පවතින වෘත්තීය විශිෂ්ටත්වය සහ වෛද්යවරුන්ගේ සුවිශේෂී කුසලතා මනාව පෙන්නුම් කරන මෙම සංසිද්ධිය, ඉදිරියේදී මෙරට වෛද්ය හා ශල්යකර්ම ක්ෂේත්රයේ නව පර්යේෂණ සහ සෞඛ්ය ප්රමිතීන් ඉහළ නැංවීම සඳහා මහත් රුකුලක් වනු ඇත. දේශීය වෛද්ය ක්ෂේත්රය ලැබූ මෙම අනුපමේය ජයග්රහණය මෙරට රෝහල් කාර්ය මණ්ඩලවල කැපවීම සහ දක්ෂතාව ජාත්යන්තරය හමුවේ යළිත් වරක් තහවුරු කළ අවස්ථාවක් ලෙස ඉතිහාසගත වේ.