එයාර් බස් ගනුදෙනුව සම්බන්ධයෙන් සිදු කරන විමර්ශනයකට අදාළව ප්රකාශයක් ලබාගැනීම සඳහා දකුණු පළාත් සභාවේ හිටපු ආණ්ඩුකාර විලී ගමගේ මහතා අල්ලස් හෝ දූෂණ චෝදනා විමර්ශන කොමිෂන් සභාවට ඊයේ (11) කැඳවා තිබිණි.
කොමිසම කරන ලද දැනුම්දීම අනුව ඊයේ පෙරවරුවේ එහි පැමිණි ඒ මහතා පැය දෙකක පමණ ප්රකාශයක් ලබා දී ඉන් පිටව ගියේය. මෙම සිද්ධිය සම්බන්ධයෙන් හිටපු ජනාධිපති මහින්ද රාජපක්ෂ, හිටපු ගුවන් සේවා ඇමැති පියංකර ජයරත්න මහත්වරුන්ට අද (12) පෙරවරුවේ අල්ලස් හෝ දූෂණ චෝදනා විමර්ශන කොමිෂන් සභාව වෙත පැමිණෙන ලෙස දැනුම් දී ඇත.
එයාර් බස් ගනුදෙනුවෙන් ලැබුණු බව පැවසෙන ඩොලර් මිලියන 2න් රුපියල් මිලියන 60ක් අවස්ථා තුනකදී හිටපු ජනාධිපති මහින්ද රාජපක්ෂ මහතාට සහ හිටපු ඇමැති පියංකර ජයරත්න මහතාට රුපියල් මිලියන 20ක් ලබා දුන් බවට එයාර් බස් ගනුදෙනුවේ ප්රධාන සැකකරුවකු ලෙස නම් කර ඇති ශ්රීලන්කන් ගුවන් සේවයේ හිටපු ප්රධාන විධායක නිලධාරි කපිල චන්ද්රසේන මහතා අල්ලස් කොමිසමට දිවුරුම් ප්රකාශයක් ලබා දෙමින් ප්රකාශ කර ඇති අතර ඊට අදාළ විමර්ශන අල්ලස් කොමිසම විසින් සිදු කරනු ලබයි.
මෙම සිද්ධියේ රක්ෂිත බන්ධනාගාරගතව සිටි ශ්රීලන්කන් ගුවන් සේවයේ හිටපු ප්රධාන විධායක නිලධාරි කපිල චන්ද්රසේන මහතා අධිකරණය නොමඟ යවමින් ව්යාජ ඇප දෙකක් තැන්පත් කර ඇප ලබා පිටව ගිය බවට අල්ලස් කොමිසම අධිකරණයට කරුණු දක්වමින් ඇප අවලංගු කර තිබුණු අතර එහි ඇප අවලංගු කිරීමට සිදු කළ නියෝගයෙන් පසු ඔහු සිටි කාමරය අගුළු දමා සියදිවි නසාගෙන තිබිණි.