වත්මන් රජය යටතේ අවස්ථා දෙකකදී ඉහළ නංවන ලද පෞද්ගලික අංශයේ අවම ජාතික වැටුප, මෙතෙක් සිය සේවකයන්ට ලබා නොදුන් ආයතන සම්බන්ධයෙන් වහාම පරීක්ෂණ පවත්වන ලෙස කම්කරු නියෝජ්ය අමාත්ය මහින්ද ජයසිංහ මහතා කම්කරු දෙපාර්තමේන්තුවට උපදෙස් ලබා දී ඇත.
වත්මන් රජය බලයට පත්වීමෙන් පසු පෞද්ගලික අංශයේ අවම ජාතික වැටුප සහ දෛනික වැටුප 71% ක ඉහළ ප්රතිශතයකින් වැඩි කර ඇති බව නියෝජ්ය අමාත්යවරයා අවධාරණය කළේය . නියෝජ්ය අමාත්යවරයා මේ බව කියා සිටියේ රාජ්ය බැංකුවක සේවයේ නියුතු පෞද්ගලික ආරක්ෂක අංශ නිලධාරීන්ට මෙම නීත්යනුකූල අවම වැටුප නොගෙවීම සම්බන්ධයෙන් ලැබුණු පැමිණිලි සලකා බැලීම සඳහා කම්කරු දෙපාර්තමේන්තුවේ පසුගිය (13) දා පැවති සාකච්ඡාවකට එක්වෙමිනි.
මෙම තීරණය ක්රියාත්මක නොකරන ආයතන පිළිබඳව සොයා බැලීම කම්කරු දෙපාර්තමේන්තුවේ වගකීමක් බව ද කම්කරු නියෝජ්ය අමාත්ය මහින්ද ජයසිංහ මහතා පෙන්වා දුන්නේය.
වත්මන් රජය බලයට පත්වීමට පෙර පෞද්ගලික අංශයේ අවම ජාතික වැටුප රුපියල් 17,500ක් වූ අතර අවම දෛනික වැටුප රුපියල් 700ක් ලෙස පැවතිණි. රජයේ නව ප්රතිපත්ති අනුව එය අදියර දෙකක් යටතේ ඉහළ නංවන ලදි.
ඒ අනුව අවම ජාතික වැටුප රුපියල් 27,000 දක්වාත්, අවම දෛනික වැටුප රුපියල් 1,080 දක්වාත් ඉහළ දැමිණි. දෙවන අදියර ලෙස 2026 ජනවාරි 01 සිට අවම ජාතික වැටුප රුපියල් 30,000 දක්වාත්, අවම දෛනික වැටුප රුපියල් 1,200 දක්වාත් යළිත් වරක් වැඩි කරන ලදි.
කම්කරු අමාත්යාංශයේ පැවති මෙම සාකච්ඡාව සඳහා අදාළ පෞද්ගලික ආරක්ෂක ආයතනවල ඉහළ කළමනාකාරීත්වය මෙන්ම කම්කරු දෙපාර්තමේන්තු නිලධාරීහු ද සහභාගි වී සිටියහ.