රත්මලාන, බඩෝවිට ප්‍රදේශයේ ඇළ මාර්ගයක් ඊයේ (05) පෙරවරුවේ සිට රතු පැහැගැන්වී තිබෙනවා.
ඒ පිළිබඳව නිවේදනයක් නිකුත් කරමින් මධ්‍යම පරිසර අධිකාරිය මහජනතාවගෙන් ඉල්ලා සිටියේ ඒ පිළිබඳ කලබලයට පත් නොවන ලෙසයි.
මධ්‍යම පරිසර අධිකාරිය වෙත ඊයේ (05) ලද තොරතුරකට අනුව, මධ්‍යම පරිසර අධිකාරියේ බස්නාහිර පළාත් කාර්යාලය විසින් එදිනම (05) මේ පිළිබඳ ක්‍ෂේත්‍ර පරීක්ෂණයක් සිදුකර තිබෙනවා.
වර්ණකයක් අදාළ ඇළ මාර්ගය වෙත මුදා හැරීම හේතුවෙන් ඇළ මාර්ගයේ ජලයේ වර්ණය මෙලෙස වෙනස්වී ඇති බවටයි මෙම ක්‍ෂේත්‍ර පරීක්ෂණයේ දී අනාවරණ වී ඇත්තේ.
මෙම වර්ණකය ජලයේ දියවන (ජල ද්‍රාව්‍ය) වර්ණකයක් වන බවත් පීච් (PH) අගයන් සහ පරාමිතීන්, පවතින පාරිසරික තත්ත්වයට අනුකූල වන බවත් ඉන් ඉහළ අගයන් නොපෙන්වන බවත් එම පරීක්ෂණවල දී අනාවරණ වී ඇති බවද මධ්‍යම පරිසර අධිකාරිය නිකුත් කළ නිවේදනයේ සඳහන්.
තවද, වැඩිදුර පරීක්ෂණ සිදුකිරීම සඳහා මධ්‍යම පරිසර අධිකාරියේ ජල තත්ත්ව පසු විපරම් රසායනාගාර නිලධාරීන් විසින් ජල නියැදි ලබා ගත් අතර එම ජල නියැදි පරීක්ෂණ සඳහා යොමු කර තිබෙනවා.