2014, 2016, 2017, 2018, 2019, 2024 යන වසර වලදී මෙරට සෞඛ්ය ක්ෂේත්රයේ ඉදිකිරීම් ආරම්භ කර අතරමඟ නතර කර තිබූ මහා පරිමාණ ව්යාපෘති 25ක වැඩකටයුතු යළි ආරම්භ කිරීමට රජය තීරණය කර තිබේ. ඒ සඳහා රුපියල් මිලියන 76,000ක වියදම් වන බවයි පැවසෙන්නේ.
මීට රට පුරා පිහිටි ප්රධාන රෝහල් රැසක සහ සෞඛ්ය ක්ෂේත්රයේ ආරම්භ කර අතරමඟ නවතා දමා තිබූ මහා පරිමාණ ව්යාපෘති අයත් වෙයි.
සෞඛ්ය හා ජනමාධ්ය ඇමැති වෛද්ය නලින්ද ජයතිස්ස මහතාගේ මැදිහත්වීමෙන් මෙම පුළුල් සහ කඩිනම් වැඩපිළිවෙළ ක්රියාත්මක වේ.
සෞඛ්ය අමාත්යාංශයේ ප්රධාන ගොඩනැඟිල්ල ඇතුළු අත්යවශ්ය බවට හඳුනා ගනු ලැබූ ප්රධාන මහා පරිමාණ සංවර්ධන ව්යාපෘති 25ක වැඩකටයුතු අවසන් කිරීම සඳහා 2025 අය – වැය ප්රතිපාදන මඟින් රුපියල් මිලියන 16,000ක මුදලක් වෙන් කරනු ලැබ ඇත. මෙම වසරේ වෙන් කළ මුදල රුපියල් මිලියන 19,000කි. රුපියල් මිලියන 38,000ක මුදලක් 2027 වසරේදී වෙන් කිරීමට සැලසුම් කර ඇත.
ළමා හා මාතෘ සෞඛ්ය නංවාලීම, පිළිකා ප්රතිකාර සේවා පුළුල් කිරීම, හෘද සහ තැලසීමියා රෝගී ප්රතිකාර සත්කාර, සෞඛ්ය අමාත්යාංශයේ ප්රධාන කාර්යාලය සහ ජාතික මධ්යස්ථාන, හදිසි අනතුරු සත්කාර සේවා ශක්තිමත් කිරීම, සෞඛ්ය කාර්ය මණ්ඩල නිල නිවාස සහ පරිසර හිතකාමී අපද්රව්ය කළමනාකරණය ආදි ක්ෂේත්රයන්ට අදාළ ගොඩනැඟිලි සහ අනෙකුත් ඉදිකිරීම් මෙම වැඩසටහනට ඇතුළත්ය.
ඒ යටතේ 2019 වසරේ ඉදිකිරීම් ආරම්භ කළ, ද සොයිසා කාන්තා රෝහලේ මාතෘ සහ වාට්ටු සංකීර්ණයේ (Maternity & Ward Complex) ඉදිකිරීම් අති නවීන පහසුකම් ද ඇතුළත් කර මේ වන විට අවසන් කර තිබේ. ඒ සඳහා වෙන් කළ මුදල රුපියල් මිලියන 389කි. 2017 වසරේ ආරම්භ කළ රිජ්වේ ආර්යා ළමා රෝහලේ (LRH) මහල් 12කින් යුත් “පුංචි හදවත්” ඒකකයේ (Little Heart Centre) ඉදිකිරීම් මේ වන විට අවසන් අදියරට ළඟා වී ඇත. ඒ සඳහා වෙන් කළ ඇස්තමේන්තු මුදල රුපියල් මිලියන 6218 කි. 2016 වසරේ ආරම්භ කර අතරමඟ නවතා දමා තිබූ මහනුවර ජාතික පිළිකා ප්රතිකාර ඒකකයේ (cancer Treatment Unit) අදියර 2 යටතේ වූ මහල් 8ක ඉදිකිරීම් මේ වනවිට අවසන් කර තිබේ. මෙවර අය – වැයෙන් වෙන් කළ මුදල රුපියල් මිලියන 400කි. එමෙන්ම බදුල්ල ශික්ෂණ රෝහලේ දස මහල් ගොඩනැඟිල්ල සහ සය මහල් පිළිකා රෝග ඒකකයේ ඉදිකිරීම් කටයුතු මේ වනවිටත් ක්රියාත්මක වෙමින් පවතින අතර එම ඉදිකිරිම් කටයුතු සඳහා වත්මන් රජය 2026 වර්ෂය සඳහා වෙන් කර ඇති මුදල රුපියල් මිලියන 1000කි. යාපනය ශික්ෂණ රෝහලේ අනතුරු සහ හදිසි ප්රතිකාර ඒකක ගොඩනැඟිල්ල, කරාපිටිය ශික්ෂණ රෝහලේ ශල්ය වෛද්ය ඒකක ගොඩනැඟිල්ල (Surgical Medical Unit), මඩකලපුව සහ හම්බන්තොට වකුගඩු සත්කාරක ප්රතිකාර ඒකක (Renal Care Units) ගොඩනැඟිලි සහ මහනුවර ජාතික රෝහලේ ඇටමිදුලු බද්ධ කිරීමේ ඒකක ගොඩනැඟිල්ල යනාදි ව්යාපෘතිවල ඉදිකිරීම් මේ වනවිට අවසන් අදියරේ පවතියි. මෙම ව්යාපෘති සඳහා 2026 වසරට රුපියල් මිලියන 1750ක මුදලක් වෙන් කර ඇත.
2014 වසරේදී ඉදිකිරීම් ආරම්භ කර අතරමඟ නැවතී තිබූ සෞඛ්ය අමාත්යාංශයේ ප්රධාන කාර්යාල ගොඩනැඟිල්ලේ ඉදිකිරීම් කටයුතු මේ වන විට අවසන් අදියරට ළඟා වෙමින් පවතියි. මේ සඳහා 2026 වර්ෂයේ අය වැය මඟින් වෙන් කළ මුදල රුපියල් මිලියන 3000කි.
මුල්ලේරියාව ජාතික ආඝාත මධ්යස්ථානයේ (National Stroke Centre) රෝග විනිශ්චය අංශය, කෑගල්ල, ත්රිකුණාමලය, අම්පාර, හලාවත සහ මහනුවර යන රෝහල්වල බාහිර රෝගී සහ හදිසි අනතුරු ඒකක ඉදිකිරීම් සහ අදාළ කටයුතු මේ වන විට සාර්ථක කාර්යසාධනයක් පෙන්නුම් කරමින් ක්රියාත්මක වෙමින් පවතින අතර, එම සංවර්ධන කටයුතු සඳහා වෙන් කර ඇති මුදල රුපියල් මිලියන 1750කි.
මෙම වසර අවසන් වීමට පෙර මෙරට රෝහල් පද්ධතිය තුළ ආසාදිත අපද්රව්ය දහනය කරන යන්ත්ර (Incinerators) 15ක් ස්ථාපිත කර ක්රියාත්මක කිරීම අවසන් අදියරේ පවතින අතර ඒ සඳහා රජය සහ JICA ඒකාබද්ධ ව්යාපෘතියක් දැනට සාර්ථකව ක්රියාත්මක වේ.
මීට අමතරව රත්නපුර රෝහලේ හෘද රෝග සත්කාර සංකීර්ණය, කළුතර මහල් 04 කින් සමන්විත හෙද අධ්යයන හා පරිපාලන ගොඩනැඟිල්ල, අනුරාධපුර හෙද විදුහලේ අධ්යයන හා පරිපාලන ගොඩනැඟිල්ල සහ හෙද නිල නිවාසය, ශ්රී ජයවර්ධනපුර හෙද පීඨයේ මහල් 06කින් යුත් නේවාසිකාගාර ගොඩනැඟිල්ල යනාදී ඉදිකිරීම් කටයුතු ද මේ වන විටත් ඉතා සාර්ථකව සිදුවෙමින් පවතියි.
ඉහත ව්යාපෘතීන්වලට අමතරව රෝහල්වල යටිතල පහසුකම් නවීකරණය සහ පුනරුත්ථාපනය සඳහා රුපියල් මිලියන 8800කට අධික මුදලක් වෙන් කර ඒවායේ වැඩකටයුතු ද මේ වන විට ද ආරම්භ කර ඇත.
මෙම සියලු ඉදිකිරීම් කඩිනමින් නිම කර ජනතා සේවයට හැකි ඉක්මනින් එක් කරන ලෙස සෞඛ්ය හා ජනමාධ්ය අමාත්ය වෛද්ය නලින්ද ජයතිස්ස මහතා අදාළ අංශ වෙත අවශ්ය උපදෙස් දැනටමත් ලබා දී ඇත.