මෙරට අපරාධ ගැන කරන කතාබහේදී අද වනවිට ලංකාවේ සිදුවන අපරාධ මැඬලීමේ සුවිශේෂී කාර්යය භාරය ගැන මුලින්ම කතාකළ යුතුය. මහජන ආරක්‍ෂක ඇමැති ටිරාන් අලස් මහතාගේ හා පොලිස්පති දේශබන්දු තෙන්නකෝන් මහතා හා සෙසු ආරක්‍ෂ අංශ සියල්ලේම මැදිහත්වීමෙන් ලංකාවේ සිදුවන අපරාධ සාර්ථක ලෙස මැඬලීමේ කාර්යය භාරය සිදුකරෙමින් පවතින්නේය. ඒ නිසා මනුෂ්‍ය ඝාතන, හෙරොයින්, අයිස්, කේරළ ගංජා ආදී විවිධ මත්ද්‍රව්‍ය ජාවාරම් හා අපරාධවලට සම්බන්ධ ජාවාරමුන් දැන් වැඩිමනක්ම සිටින්නේ බන්ධනාගාරගතවය. මහා පරිමාණ පාතාලයන්ගෙන් බොහෝ දෙනකු සිටින්නේ රටින් පැන ගොස් ඩුබායි රාජ්‍යයේය. නැතහොත් වෙනත් රටවලය. දැන් ඔවුන් කරන්නේ එරට සිට මෙරට මත්ද්‍රව්‍ය ජාලය ක්‍රියාත්මක කිරීමය. එහෙත් ‘යුක්තිය මෙහෙයුම’ යටතේ එයින් වැඩිහරියක්ම මෙරට ආරක්‍ෂක අංශ මගින් වැටලීම් සිදුකොට ඇත. එහෙත් මේ වනවිට උද්ගතවී ඇති ප්‍රශ්නය වන්නේ ලංකාවේ ක්‍රමයෙන් අපරාධ මර්දනය සිදුකොට සාමාන්‍ය තත්ත්වයකට රට ගෙන එද්දීම විදේශිකයන්ගේ ජාවාරම් තිප්පළක් බවට මෙරට පත්වීමය.
ලංකාව විදේශිකයන්ගේ ජාවාරම් තිප්පළක්
විදේශ රටවල සිට පැමිණි සංචාරකයන් සංචාරක වීසා මත හිඳිමින් මෙරට නොයෙකුත් අන්දමේ ජාවාරම්වල නියුතු වූ පුවත් පසුගිය කාලය පුරාම වාර්තාවන්නට විය. එහි ආසන්නතම හා සුවිශේෂී කාරණය වූයේ සංචාරක වීසා මත මෙරට තුළ රැඳී සිටිමින් අන්තර්ජාලය හරහා මෙරට මුදල් වංචා කිරීම් ඇතුළු ජාවාරම් සිදුකිරීමේ චෝදනාව යටතේ සතියක කාලය තුළදී විදේශිකයන් 197 ක් අත්අඩංගුවට පත්වීමය. එහි එක් සිද්ධියක් වන්නේ මීගමුව කුඩාපාඩුව ප්‍රදේශයේ චීන ජාතිකයන් 30 දෙනකු පසුගිය 28 දා අත්අඩංගුවට ගැනීමය. විදේශිකයන් පිරිසක් මෙරට රැඳීසිටිමින් අන්තර්ජාලය හරහා ජාවාරම් සිදුකරන බවට අපරාධ පරීක්‍ෂණ දෙපාර්තමේන්තුවට තොරතුරු ලැබීමත් සමඟ එම තොරතුරු ඔස්සේ විමර්ශන ආරම්භ කළ අපරාධ පක්‍ෂණ දෙපාර්තමේන්තුව කුඩාපාඩුව ප්‍රදේශයේ සංචාරක හෝටලයක් පසුගියදා වැටලීය. එහිදී අත්අඩංගුවට පත්වූ චීන ජාතිකයන් 30 දෙනකු සංචාරක සහ රැකියා වීසා මත මෙරටට පැමිණ ඇති අතර ඉන් 08 දෙනකුට විදෙස් ගමන් බලපත්‍ර පවා නොතිබී ඇත. එම අත්අඩංගුවට පත් වූ සැකකරුවන් අතර චීන ජාතික කාන්තාවක්ද වන්නට විය. ආරක්‍ෂක අංශ භාරයට ගත් භාණ්ඩ අතර පරිගණක 30 ක් සහ ජංගම දුරකථන 80 කට අධික සංඛ්‍යාවක්ද විය. ලැබෙන ආරංචි මාර්ග අනුව මෙම චීන ජාතිකයන් පිරිස මෙරටට පැමිණ ඇත්තේ රැකියා කිරීමේ අරමුණින් වන අතර අන්තර්ජාලය හරහා විදේශයන්හි රැකියා ලබාදෙන බව පවසා ඔවුන් මෙරටට ගෙන්වා ඇත. කාලයක් තිස්සේ කුලී පදනම මත මීගමුව ප්‍රදේශයේ ලැඟුම්හලක ඔවුන් රඳවා ඇති අතර ඔවුන්ගේ ගමන් බලපත්‍රද මෙම ජාවාරම මෙහෙයවනු ලබන පුද්ගලයා භාරයේ පවතින බවද තොරතුරු ලැබී ඇත. මෙම චීන ජාතිකයන් විසින් අන්තර්ජාලය හරහා ලොවපුරා සිටින ධනවතුන් සම්බන්ධ කර ගනිමින් දිනුම් ඇදීම් හා විවිධ මුදල් සම්බන්ධව සූදුවලට සහභාගි කරවාගෙන ඔවුන්ගේ බැංකු ගිණුම් විස්තර ලබාගනිමින් එම ගිණුම්වල ඇති මුදල් සොරකම් කිරීම සිදුකර ඇත. මේ එක් සිද්ධියකි.
අනෙක් සිදුවීම වාර්තාවූයේ මීගමුවෙන්ය. ඒ පසුගිය මස 24 දා මීගමුව කොච්චිකඩේ ප්‍රදේශයේදී අන්තර්ජාලය ඔස්සේ මූල්‍ය වංචා සිදුකිරීමේ චෝදනාවට විදෙස් ජාතිකයන් 30 දෙනකු අත්අඩංගුවට පත්වීමය. ඔවුන් පාකිස්තාන, නේපාල, මැලේසියා සහ බංගලාදේශ ජාතිකයන්ය. මේ අය සිදුකර ඇත්තේද ධනවතුන්ගේ බැංකු ගිණුම්වලින් මුදල් සොරකම් කිරීමය. පොලිසිය සඳහන් කරන පරිදි මෙම විදේශිකයන් එම මුදල් බි්‍රතාන්‍ය, ඩුබායි සහ ඉන්දීය බැංකු ගිණුම් වෙත බැර කොට ඇත.
මේ වන විට පරිගණක අපරාධ ලොව පුරාම පිළිලයක් සේ පැතිර ගොස් ඇත්තේය. පසුගිය අවුරුද්දේ ද අන්තර්ජාලය භාවිත කොට සිදුකළ වංචාවක් මියන්මාරයෙන්ද වාර්තා විය. ඒ එම රටෙහි රැකියා දෙන බව පවසමින් අන්තර්ජාලයේ දැන්වීමක් පළකොට එහි ගිය ශ්‍රී ලාංකිකයන් ඇතුළු තවත් විදේශිකයන් පිරිසක් සිරකර ගනිමින් අන්තර්ජාල අපරාධ සඳහා යොදා ගැනීමය. තවද මෙරට සිට අන්තර්ජාලය ඔස්සේ ජාවාරම්වල නිරත වූ ඉන්දීය ජාතිකයන් පිරිසක්ද පසුගිය කාලය තුළ ප්‍රදේශ කිහිපයකින්ම අත්අඩංගුවට ගත්තේය. පසුගිය පසු 27 වැනිදා කොච්චිකඩේ ප්‍රදේශයේ ලැඟුම්හලක් වැටලීමෙන් පසු ඉන්දීය ජාතිකයන් 53 දෙනකු අත්අඩංගුවට පත්විය. එහිදී ද විමර්ශන නිලධාරීන් අනාවරණය කරගනු ලැබුවේ අදාළ ලැගුම්හල රුපියල් ලක්‍ෂ 02ක් වූ කුලී පදනම මත ලබාගත් එකක් බවටය. අත්අඩංගුවට ගැනීම් එතනින්ද නවතින්නේ නැත. නැවතත් එදිනම තලංගමදී ඉන්දියන් ජාතිකයන් 16 දෙනකුද, මාදිවෙල ප්‍රදේශයේදී තවත් ඉන්දීය ජාතිකයන් 13 දෙනකුද සහ මීගමුවේදී ඉන්දීය ජාතිකයන් 55 දෙනෙක්ද ආරක්‍ෂක අංශ අත්අඩංගුවට පත්වන්නේය. එම අත්අඩංගුවට පත්වූ ඉන්දීය ජාතිකයන්ගෙන් ප්‍රශ්න කිරීම් වලදී අනාවරණය වී ඇත්තේ ඉන්දියාවේ තහනම් කළ ඔන්ලයින් සූදු ජාවාරමක් ඔවුන් විසින් මෙරට තුළ ක්‍රියාත්මක කරගෙන ගිය බවය.
ඔන්ලයින් හරහා සිදුකළ මීළඟ මූල්‍ය වංචාව වූයේ පසුගිය පන්දුවාර 20 ක්‍රිකට් තරගයේදී ඔට්ටු ඇල්ලීමය. ඒ සඳහා විවිධ පුද්ගලයන් හා ක්‍රීඩා සඳහා ඔට්ටු ඇල්ලීම් සිදුකර ඇති අතර මෙම වසරේ (2024) ලෝක කුසලාන පන්දුවාර 20 ක්‍රිකට් තරගාවලියේ තරග සඳහාද විශාල සංඛ්‍යාවක් මෙම ක්‍රමය යටතේ ඔට්ටු අල්ලා ඇති බවද මේ වනවිට ආරක්‍ෂක අංශ පරීක්‍ෂණ වලදී තහවුරු කොට ගෙන ඇත. එහිදීද එම ඔට්ටු ඇල්ලීමේ ජාවාරම මෙහෙයවා ඇත්තේද එංගලන්තයේ සිටින පුද්ගලයකු බවටද තොරතුරු ලැබී ඇත.
තවත් සිද්ධියක් වාර්තා වන්නට වූයේ මහනුවර අනිවත්ත ප්‍රදේශයෙනි. ඒ අන්තර්ජාල මූල්‍ය අපරාධ සිදුකළ ඉන්දීය ජාතිකයන් දොළොස් දෙනකු එම ප්‍රදේශයේදී කොට්ඨාස අපරාධ විමර්ශන අංශයේ නිලධාරීන්ගේ අත්අඩංගුවට පත්වීමය. එසේ අත්අඩංගුවට පත්වූ ඉන්දීය ජාතිකයන් 12 දෙනා අනිවත්ත ප්‍රදේශයේ සුඛෝපභෝගී නිවසක් මාසිකව ලක්‍ෂ තුනක කුලියට ගෙන මෙම පරිගණක අපරාධ කරගෙන ගොස් ඇත. එහිදී ඔවුන් සතුව තිබී ලැප්ටොප් පරිගණක හතක් හා මොනිටර් 23ක්ද ජංගම දුරකථන 50ක් හා රවුටර්
11 ක් සමඟ සිම් කාඩ් තොගයක්ද පොලිසිය භාරගෙන ගෙන ඇත. මෙම ඉන්දීය ජාතිකයන් විසින් අන්තර්ජාලය ඔස්සේ මුදලට ඔට්ටු ඇල්ලීමේ ජාවාරම සිදුකර ඇති අතර මෙරට තුළ සිදුකරන ගනුදෙනු කටයුතු පහසුකරගැනීම පිණිස රජයේ සහ පෞද්ගලික බැංකු කිහිපයක ගිණුම්ද ආරම්භ කොට ඒටීඑම් කාඩ් 11ක් ද ඔවුන් සතුව තිබී ඇත.
පසුගිය අවුරුද්ද තුළද මෙවැනිම අන්තර්ජාලය ඔස්සේ ජාවාරම් සිදුකළ චීන ජාතිකයන් 39 දෙනකු අලුත්ගමදී ද අත්අඩංගුවට පත්විය. එම චීන ජාතිකයන්ද ශ්‍රී ලංකාවද ඇතුළුව, විවිධ රටවල පුද්ගලයන්ගේ ගිණුම් වලින්, අන්තර්ජාලය හරහා මාස කිහිපයක් තිස්සේ මිලියන ගණනක මුදල් වංචා කර ඇති බවද අනාවරණය විය. එම පිරිසද අලුත්ගම කළුවාමෝදර ප්‍රදේශයේ සංචාරක නිකේතනයක ලැගුම්ගෙන සිට ඇති අතර තානාපති කාර්යාල කිහිපයක් හරහා ලැබුණු පැමිණිලි මත පොලිසිය ඔවුන් අත්අඩංගුවට ගත්තේය. ඊට චීන ජාතිකයන් 33 දෙනකු හා කාන්තාවන් 05 කුද කුඩා දරුවකුද අයත් විය. එහිදීද අත්අඩංගුවට පත්වූ විදේශිකයන් පවසා ඇත්තේ තම කැමැත්තට එරෙහිව තමන්ව ශ්‍රී ලංකාවේ රඳවාගෙන අන්තර්ජාල මූල්‍ය අපරාධවල නිරත වීමට බල කළ බවය. එමෙන්ම එම සිද්ධියට මාස කිහිපයකට පෙරද ඉහළ ප්‍රතිලාභ ලබාදෙන බව පවසමින් අන්තර්ජාලය ඔස්සේ “SPORTS CHAIN” නමින් චීන ජාතික යුවළක් විසින් කරගෙන ගිය පිරමීඩ මුදල් ජාවාරමට සම්බන්ධ චීන ජාතිකයන් දෙදෙනෙක් ඇතුළු 08 දෙනෙක් අපරාධ පරීක්‍ෂණ දෙපාර්තමේන්තුවේ මූල්‍ය හා අපාධ විමර්ශන කොට්ඨාසය විසින් අත්අඩංගුවට ගත්තේය. තවද ලෝකයේ ව්‍යාප්ත වෙමින් පවතින “ක්‍රිප්ටෝ කරන්සි” ඒකකයක් ලෙස පෙන්වමින් මෙම ජාවාරම කරගෙන ගොස් ඇති බවද හෙළිවිය. පසුව සිදුකරන ලද විමර්ශනවලදී හෙළිවී ඇත්තේද මෙය මහා පරිමාණයේ අන්තර්ජාල මූල්‍ය වංචාවක් බවය. මෘදුකාංගයක් ඔස්සේ ඉතා සංවිධානාත්මකව සිදුකරන මෙම ජාවාරම 2020 වසරේ සිට සිදුකරගෙන ඇත්තේ ඉතා සූක්‍ෂම ලෙස පිහිටුවන ලද SPORTS CHAIN ZS COCIETY SRI LANKA සමාජ ජාලයකින් බවද හෙළිවී ඇත. එමෙන්ම 2020 වසරේ සිට 2023 වසරේ අප්‍රේල් කාලය තුළ අන්තර්ජාලය උපයෝගී කොට ජාවාරමේ නියුතු වූවන් 8000 ක් පමණ අත්අඩංගුවට පත්වී ඇති අතර රුපියල් කෝටි 1500 කට අධික මූල්‍ය වංචාවක්ද එමගින් සිදුවී ඇත. එම සංඛ්‍යාවන් පසුගිය වසර තුනක් තුළ වූ අන්තර්ජාල මූල්‍ය වංචාවන්ය. මේ ආකාරයෙන් අන්තර්ජාල ජාවාරමේ තවත් සිද්ධීන්ද රාශියක්ම පවතින්නේය. ඒවාද පෙරකී ආකාරයේම විදේශ ජාතිකයන් විසින් මෙරට කේන්ද්‍රකොටගෙන පවත්වාගෙන ගිය අන්තර්ජාල මූල්‍ය ජාවාරම්ය. එහෙත් දැන් ගෙවෙමින් සිටින්නේ 2024 වර්ෂයය. මේ වනවිට සිදුකර ඇති වංචාව තවමත් හරියටම ගණන බලා නැතත් දිනෙන් දින ලැබෙන තොරතුරු මගින් අනාවරණය වන්නේ මෙරට විදේශිකයන්ගේ ජාවාරම් තිප්පළක් බවය. මේ ආදී වශයෙන් විදේශයන්හි සිට මෙහි පැමිණ අන්තර්ජාලය ඔස්සේ විවිධ ජාවාරම් සිදුකරන පුද්ගලයන් හා අපරාධ වැඩිවෙමින් පවතින බවද මෙවැනි පුවත් තුළින් පෙනී යනු ඇත.
මොකක්ද මේ සයිබර් අපරාධ..
අන්තර්ජාලය උපයෝගී කොටගෙන සිදුකෙරෙන පරිගණක අපරාධ හෙවත් සයිබර් අපරාධ ගැන එළියට එන්නේ මීට අවුරුදු කිහිපයකටත් ඉහතදීය.
පසුගිය කාලය තුළ චීන ජාතිකයන් හා වෙනත් විදේශ ජාතිකයන් මෙරටදී අත්අඩංගුවට පත්වීමත් සමඟ පෞද්ගලික තොරතුරු සොරකම් කිරීම හා ඊ-වාණිජ්‍යය වංචා ඇතුළු සයිබර් අපරාධවලට චීන ජාතිකයන්ගේ සම්බන්ධය හා අනෙකුත් විදෙස් ජාතිකයන්ගේ සම්බන්ධව මේ වනවිට දැඩිකතාබහකට ලක්ව ඇත. සෑම වසරකම පාහේ විවිධ රටවලින් මිලියන ගණනක් පුද්ගලයන් අන්තර්ජාල වංචාවලට ගොදුරුවන අතර සයිබර් අවකාශයේ සිදුවන ප්‍රධානම වංචා ලෙස සයිබර් අපරාධ නම් කළ හැක. එහිදී මෙරට ඇතුළු විවිධ රටවල පුද්ගලයන්ගේ ගිණුම්වලින්, අන්තර්ජාලය උපයෝගීකර ගෙන සිදුකරන වංචා අතර පෞද්ගලික තොරතුරු සොරකම් කිරීම, දේශසීමා හරහා සිදුකෙරෙන සූදුව, ඊ-වාණිජ වංචා, ආදර වංචා සහ තර්ජනාත්මක ක්‍රියාකාරකම් ආදී සයිබර් අපරාධ අතර ප්‍රධානය. මෙරටට සංචාරක වීසා මත පැමිණෙන විදේශිකයන් අන්තර්ජාලය හරහා ශ්‍රී ලංකාව තුළ සිදුකරන බව වංචාවන් සම්බන්ධයෙන් විමසිලිමත් වන්නැයිද ආරක්‍ෂක අංශ අනතුරුද අඟවා ඇත. මේ වනවිට ලෝකයටම පිළිකාවක් බඳු පරිගණක අපරාධ සීමාකිරීමට හා වැළැක්වීමට බොහෝ රටවල් ප්‍රතිපත්ති සම්පාදනය හා නොයෙකුත් සංවිධානද පිහිටුවා ඇත. පරිගණක අපරාධ සම්බන්ධයෙන් ලංකාවේ 2007 අංක 24 දරන පරිගණක අපරාධ පනත ක්‍රියාත්මකය. අන්තර්ජාලය ඔස්සේ සිදුකෙරෙන අපරාධ මැඬලීම සඳහාද ශ්‍රී ලංකා පොලිසිය, අපරාධ පරීක්‍ෂණ දෙපාර්තමේන්තුවේ අධීක්‍ෂණය යටතේ සෘජුවම පරිගණක අපරාධ විමර්ශන කොට්ඨාශයක් මෙරට පිහිටුවා ඇත. එහෙත් මේ වනවිට පරිගණක අපරාධ මෙරටින් දිනෙන් දිනම වාර්තාවීමෙහිද කිසිදු අඩුවක්ද දක්නට නැත. තවද මෙරට නීති පද්ධතියේ සාම්ප්‍රදායික අපරාධ විසඳීමේ මෙවලම්වලටද අභියෝග වෙමින් තාක්‍ෂණයේ දියුණුවත් සමඟ ඉදිරියට පැමිණ ඇති සයිබර් අපරාධ මේ වනවිට නොවිසදෙන ගැටලුවක් බවටද පත්ව ඇත.
සයිබර් අපරාධවලට පහසුම ඉලක්කය ලංකාවද?
අන්තර්ජාලය උපයෝගී කරගනිමින් විවිධ ජාවාරම් කිරීමට කදිම ස්ථානයක් බවට මයික්‍රොසොෆ්ට් ආයතනයේ ආරක්‍ෂක බුද්ධි වාර්තාවේ 21 වැනි සංස්කරණයට අනුව ශ්‍රී ලංකාව සයිබර් අපරාධකරුවන්ගේ සරල ඉලක්කයක් ලෙස හඳුනාගෙන ඇති බවද, සයිබර් අපරාධකරුවන් බිට්කොයින් වැනි ගුප්ත කේතන යොදාගනිමින් මුදල් වෙනුවෙන් පුද්ගලයන්ගේ පරිගණක භාවිත කරන බවත්, එමෙන්ම නීති විරෝධි ලාභ උපයන ක්‍රිස්ටෝ වැනි මෘදුකාංග රට තුළ වැඩිවී තිබෙන බවද අන්තර්ජාල ආරක්‍ෂණ පනත් කෙටුම්පත පිළිබඳ ශ්‍රේෂ්ඨාධිකරණ තීරණය යටතේ දක්වා ඇත. තවද ශ්‍රේෂ්ඨාධිකරණ තීරණයට අනුව මෙවැනි අපරාධ වැළැක්වීමට සහ ජනතාව ආරක්‍ෂා කිරීමට අවශ්‍ය නීති සම්පාදනය කිරීමේ වගකීම ඇත්තේ රජයටය. “එවැනි නීති සම්පාදනය ආණ්ඩුක්‍රම ව්‍යවස්ථාවේ 12(එල්) වගන්තියේ දක්වා ඇති නීතියේ සමාන ආරක්‍ෂාව සුරක්‍ෂිත කරනු ඇත” යනුවෙන් ශ්‍රේෂ්ඨාධිකරණ තීරණයෙන්ද පවසා ඇත.
එමෙන්ම පසුගිය කාලය තුළ විවිධ රටවල විදේශිකයන් විසින් අන්තර්ජාලය මූලිකකොට සිදුකරන ලද මූල්‍ය වංචා හේතුවෙන් මේ වනවිට විවිධ රටවල පුද්ගලයන්ගේ මෙන්ම මෙරට ධනවතුන්ගේ ගිණුම්වලින් රුපියල් මිලියන ගණනක් මුදල් වංචා සිදුකොට ඇත. නොයෙකුත් දිනුම් ඇදීම්, ක්‍රීඩා ආදියෙන් මුදල් ත්‍යාග ලබාදී පුද්ගලයන් මෙම ජාවාරමට හසුකර ගැනීමද මෙම ජාවාරමේ ක්‍රමය. බොහෝවිට වට්ස්ඇප් මාර්ගයෙන් අදාළ කෙනාගේ බැංකු ගිණුම්වල තොරතුරු ලබාගෙන ගිණුම්වල ඇති මුදල් වංචනික ලෙස සොරා ගැනීම මේ කියන අපරාධකරුවන් විසින් කරනු ලබයි. තානාපති කාර්යාල හරහා ලැබුණු පැමිණිලි මත මෙම වංචනිකයන් අත්අඩංගුවට ගත් බවද පොලිසිය පවසන්නේය. පසුගියදා අත්අඩංගුවට පත්වූ චීන ජාතිකයන් පවසා ඇත්තේද අන්තර්ජාලය හරහා ලොවපුරා සිටින ධනවතුන් සම්බන්ධ කර ගනිමින් දිනුම් ඇදීම් හා විවිධ තරගවලට ඔවුන් යොමුකරවා ගැනීම ඔවුන්ට පැවැරුණු බවය. එසේ නම් මේ වංචාවන් පිටුපස තවත් පුද්ගලයන් සිටින බවද පැහැදිලිය. අන්තර්ජාලය මගින් පෞද්ගලික තොරතුරු සොරකම් කිරීම, දේශසීමා හරහා සිදුකෙරෙන සූදුව, ඊ-වාණිජ්‍ය වංචා, ආදර වංචා සහ තර්ජනාත්මක ක්‍රියාකාරකම් ආදී සයිබර් අපරාධ අසල්වැසි රටවල සිදුකරන බවට ඉන්දීය බුද්ධි අංශ අනතුරු ඇඟවීමෙන් පසු මෙම පිරිස් අත්අඩංගුවට ගැනීම සිදුවිය. එමෙන්ම විදේශීය පුවත් සේවා අනාවරණය කරන ආකාරයට සූදුව, මුදල් විශුද්ධිකරණය, කාමුක දර්ශන සහ වෙනත් සයිබර් අපරාධවලට එරෙහිව චීනය නීති වෙනස් කිරීම හේතුවෙන් මෙලෙස රටින් පිටත චීන ජාතිකයන් විසින් අන්තර්ජාල අපරාධ සිදුකරන බවය.
ශ්‍රී ලංකා පොලිසිය, විශේෂකාර්ය බළකාය, නාවික හමුදාව, ගුවන් හමුදාව, යුදහමුදාව, සිවිල් ආරක්‍ෂක බළකාය ආදී ආරක්‍ෂක අංශ රැසක් මෙම මෙහෙවරට උරදෙන්නන්ය. එහෙත් සිදුවන අන්තර්ජාල ජාවාරම් සම්බන්ධව හා විදේශ ජාතිකයන් මෙරටදී සිදුකරන මූල්‍ය වංචාවන් හෝ වෙනත් අපරාධමය වැරදි සම්බන්ධව මෙරට පොලිසිය විසින් සිදුකරන විමර්ශන සාර්ථක බවක්ද පෙනෙන්නට නැත. මෙවැනි වංචා පිළිබඳ අත්අඩංගුවට පත්වන සැකකරුවන්ට නඩු අසා දඬුවම් පැමිණවීමක් පවා අද අඩුවෙන්ම අසන්නට ලැබෙන්නේ චීනය, ඉන්දියාව ඇතුළු රටවල් කිහිපයක් ආර්ථිකමය වශයෙන් මෙරටට සිදුකරන විශාල බලපෑම නිසාද විය හැකිය. මේ නිසා විවිධ අපරාධ සඳහා රිමාන්ඩ් බන්ධනාගාරගත කෙරෙන විදේශිකයෝ ඇප ලබා නඩු විභාගයකින් තොරවම ඇතැම්විට රටින් පිටවයන අවස්ථාද නැතිව නොවේය. ඇත්තෙන්ම මෙරට සිදුකෙරෙන අපරාධ වෙනුවෙන් ඕනෑම පුද්ගලයෙකුට එරෙහිව දඬුවම් ලබාදීමේදී විවිධ රාජ්‍යයන් වල බලපෑම්වලට යටත්නොවී,තෝරාගැනීමකින් තොරව කටයුතු කරන්නේ නම් ඉතා අගනේය. නොඑසේනම් සිදුවන්නේ විදෙස් අතපෙවීම් වලට යටවී මෙරට ලෝකයේ විවිධ ජාවාරමුන්ගේ කොළනියක් බවට පත්වීමය.
රමින්ද මාවතගේ